Ezequiel 13 - Mam Huehuetenango New Ortography

Kb'el q'o'n kysentens qeju nno'k kyq'on kyib' te t-sanjel Dios

1Tzaj yolin Qman wuk'ile ex tma kyja':

2Q'manxa aju yol kxel nma'ne teya kyi'j qe xjal nno'k kyq'on kyib' te nsanjele kyxol aj Israel, aqeju in che yolin tu'n kyex kyximb'etz, q'manxa kye kyja': Kyb'intze aju Tyol Qman:

3Atzun jlu in tma'n Qman: Ay b'ek'b'il kywitz qeju minti' kynab'l, nno'k kyq'on kyib' te nsanjele, in che ok lpe' ti'j kyex kyximb'etz, ex aju in kyma'n mya ax tok at in tzaj yek'un kye tu'n Dios.

4Aqeye aj Israel, qe xjal ate' kyxole, aqeju nno'k kyq'on kyib' te nsanjele, ik kyten ik tza'n qe wech najl kyxol ttx'aqan ja.

5Minti' in che xq'uqin jatum o kub' tilj muro ti'jele tnam ex minti' in jaw kyb'incha'n juntl maj, ex tu'ntzun jlu minti' tumel tu'n kyklonte kyib' aj Israel tuj q'oj ok tpon tq'ijlalil castiw tu'n Qman.

6Aju nno'k kyke'yin ik tza'n tuj witzik' mya ax tok, ex nik'aj yol aju tqanil in kyma'n. In kyma'n qa aqine in chinx samante kye tu'n kyyolin, ex mya aqine in chinx samante kye. Ex in che ayon ti'j tu'n tjapun kyyol ik tza'nx otoq txi kyma'n.

7Aju nno'k kyke'yin ik tza'n tuj witzik' mya ax tok. Ex nik'aj yol aju tqanil in kyma'n. In kyma'n qa aqine in chinx samante kye tu'n kyyolin, ex minti' jun o txi nma'ne kye.

8Kyja'tzun aqine Dios kxel nma'ne jlu: In kyma'n qe yol mya ax tok ex aju nno'k kyke'yin ik tza'n tuj witzik' puro nik'aj yol, kyja'tzun chin okele aj q'oj kyi'j. Aqine Dios in chin q'mante jlu.

9Kb'el nq'o'ne kycastiw qe xjal nno'k kyq'on kyib' te nsanjele, in kyma'n at in tzaj yek'un kye ik tza'n tuj witzik' ex mya ax tok kyu'n, ex nik'aj yol aju tqanil in kyma'n, minti' kyoklen qe jlu tu'n tok kychmon kyib' kyuk'il qe xjal etzan wu'ne, ex mi tu'n tku'x tz'ib'et kyb'i tuj libro jatum tz'ib'amaj kyb'i aj Israel, ex mi tu'n kypon juntl maj tuj kytx'otx' aj Israel. K'eleltzun kynik'e ti'j, aqine Dios.

10Ax tok qe xjal etzan wu'ne ma che kub' sb'u'n, in q'manjtz kye kyja': Qo tel tuj txub'txaj che chi, ex minti' ma che ten xjal tuj txub'txaj; ik kyten ik tza'n jun xjal in jaw tb'incha'n jun tkajonil ja mya b'a'n b'inchb'en te ex nno'k tq'o'n ta'l txun ti'j.

11Q'manxa kye qeju nno'k kyq'o'n ta'l txun ti'j tkajonil ja, aju tkajonil ja lu kb'el xitj. Tzul jb'al tuk'il nim tipun, ex tzul saqb'aqun ik tza'n ab'j, ex ktzajel jun kyq'iq' jb'al nimxix tipun.

12Oktzun tkub' tilj tkajonil ja ok kyma' xjal kyeye kyja': ¿Ti ma b'aj ti'j ta'l txun ok kyq'o'ne ti'j?

13Kyja'tzun aqine Dios kxel nma'ne jlu: Tu'n ntx'u'jile ktzajel xupin jun kyq'iq' kyuwxix, ex tu'n ntx'u'jile ktzajel jb'al kyuwxix, ex ktzajel saqb'aqun ik tza'n ab'j, tu'ntzun tkub' b'aj xitj tkyaqil.

14Kb'el nxitune tkajonil ja ma tz'ok kyq'o'ne ta'l txun ti'j; b'i'x kb'el nxitune tkajonil ja ex che kymele tjaq' ttx'aqan. K'eleltzun kynik'e ti'j, aqine Dios.

15Kjawitz b'aj nq'oje ti'j tkajonil ja ex kyi'j qeju e ok q'onte ta'l txun ti'j, ex kxel nma'ne kyeye kyja': Minti' ch'in tkajonil ja ma kyaj ten ex mi qeju e ok q'onte ta'l txun ti'j,

16aqeju nno'k kyq'on kyib' te nsanjele kyxol aj Israel, in kyma'n qa at in tzaj yek'un kye mer ik tza'n tuj witzik', ex mya ax tok jlu, ex in kyma'n tqanil kye aj Jerusalén: Che tele tuj txub'txaj che chi, ex minti' ma che ten tuj txub'txaj. Aqine Dios in chin q'mante jlu.

Kb'el kycastiw qe xu'j nno'k kyq'on kyib' te t-sanjel Dios

17Atzun ja'lo aya xjal, txi'ya ex q'ma'nka tib'aj kywitz qe xu'j ate' tuj ttanmiya, aqeju in kyma'n qa wu'ne in xi nma'ne tqanil kye ex in che yolin tu'n kyex kyximb'etz,

18ex q'manxa kye kyja': Atzun jlu in tma'n Qman: B'ek'b'il kywitz qe xu'j b'a'n mañ kyu'n tu'n kykamb'ante kyi'j xjal; in b'aj kyslapun jun piẍ xb'alun tu'n tok kyq'o'n tqul kyq'ab' xjal tu'n mi'n kykyim, che chi, ex in kub' kyb'incha'n xb'alun tu'n tjax kyq'o'n tuj kywi' xjal. Ex tuj kyximb'etz qa jaku che anq'in xjal kyu'n, aqeju etzan wu'ne, ex qa jaku che kyim, ik tza'nx kyajb'il.

19Nne'l nch'ixwiye kyu'ne kywitz qe xjal etzan wu'ne noq tu'n tknet junjun yub' sebad ex junjun piẍ pan kyu'ne; in che kyim xjal kyu'ne, aqeju minti' tu'n kykyim, ex in che kyaj anq'in xjal kyu'ne, aqeju minti' tu'n kykyaj anq'in. Kyja'tzun in kub' kysb'u'ne qe xjal etzan wu'ne, in xi kyniman tkyaqil nik'aj yol in kyma'ne.

20Kyja'tzun aqine Dios kxel nma'ne jlu: Ma chin oke aj q'oj kyi'je tu'n tlaj xb'alun nno'k kyq'o'ne tqul kyq'ab' xjal, porke in che tzyet qe xjal kyu'ne ik tza'n in che tzyet qe chyu'j tuj k'ob'il. Ex che elel ntzaqune qe xb'alun toksa'n kyi'j, ex che tzoqpetel qe xjal wu'ne, aqeju otoq che tzyet kyu'ne, ik tza'n in che etz tzoqpaj qe chyu'j tuj k'ob'il.

21Che elel ntzaqune qe xb'alun ok kyk'alo'ne tuj kywi' xjal, ex che tzoqpetel tuj kyq'ab'e qe xjal etzan wu'ne ex mlay che tzyet juntl maj kyu'ne. K'eleltzun kynik'e ti'j, aqine Dios.

22Noq tu'n nik'aj yol kyu'ne ma b'aj kyk'u'j qe xjal tz'aqlxix, a jlu mi'n waje tu'n tb'ant ikju, atzun kye xjal b'inchal mya b'a'n ma txi kykyuwsa'ne mastl kyk'u'j tu'n kukx kyb'inchante mya b'a'n, tu'ntzun mi'n kyklet.

23Kyja'tzun mlay txi kyma'ntle qa at in tzaj yek'un kyeye ik tza'n tuj witzik' mya ax tok, ex mi tu'n kymanteye tqanil nik'aj yol. Che kletel qe xjal etzan wu'ne tuj kyq'ab'e ex k'eleltzun kynik'e ti'j, aqine Dios.