Hebreo 6 - Mam Huehuetenango New Ortography

1Kyja'tzun tten, qq'o'nk tilil tu'n tokxix qnab'l ik tza'n jun tij xjal, ex mya noq o'kx tu'n qyolin ti'j tuj tnejel xnaq'tzb'il ti'j Crist. Ex mi'n qo aj meltz'aj juntl maj tu'n ttzaj qe' qokslab'l ti'j Dios, ex tu'n tajtz ti'j qanmi ti'j qb'inchb'en minti' tajb'en.

2Ex mya ax tu'n qkyaj ten ti'j ju xnaq'tzb'il ti'j b'yab'l, ex ti'j ju xnaq'tzb'il tu'n tkub' qq'o'n qq'ab' tib'aj kywi' okslal, ex ti'j ju xnaq'tzb'il ti'j anq'ib'l kyxol kyimni, ex ti'j ju xnaq'tzb'il ti'j jwisi tzul te jumajx.

3Kyja'tzun k'okel tilil qu'n tu'n tok mastl qnab'l, qa tajb'il Dios.

4Porke aqeju ma spik'b'anjtz tuj kynab'l ex ma tz'el kynik' ti'j ju oyaj tzaj tuj kya'j, ex ma kyk'am kyoklen ti'j Xewb'aj Xjan,

5ex ma tz'el kynik' ti'j tyol Dios tb'anilxix, ex ma kyil qe tb'inchb'en nim kyipumal ktzajel tyek'un tuj tq'ijlalil tzul,

6qa ma che kub' tz'aq jlu, mlayx b'ant tu'n tajtz juntl maj ti'j kyanmi, tu'nju in jaw kyq'o'n Tk'wa'l Dios twitz crus juntl maj, ex in tzaj tch'ixwi kywitz xjal kyu'n.

7Porke ik tza'n jun piẍ tx'otx' in ak' tu'n jb'al kukx in kub' tib'aj, ex in tq'o'n tawal tu'n tajb'en kye qeju in che aq'nan twitz, in kub' tky'iwla'n Dios tx'otx' lu;

8atzunju tx'otx' in tq'o'n ch'i'x ex ch'i'x k'ul, minti'tl tajb'en; ex jakulo tma Dios tu'n tnaj, ex aju b'ajsb'il te tu'n tok tq'aq'al.

Mlay qo yukch qa q'uql qk'u'j ti'j Crist

9Erman at nk'u'je kyi'je, maske in chin yoline ikju, atzun kyeye, in qe'xix nk'u'je kyi'je ok kyb'incha'ye aju mas b'a'n; atzun jlu jun yek'b'il qa ax tok ma che klete.

10Porke ate Dios tz'aqlxix, mlay tzik' tna'l tu'n aju kyaq'unb'ene; xi kyyek'une qa at kyk'ujlalile ti'j Dios tu'nju e ajb'ene kye okslal ex kukx in che ajb'ene kye.

11Pero wajb'ile teyle junjun kyeye kukx tu'n tok tilil kyu'ne tu'ntzun tqe'xix kyk'u'je ti'j ju in che ayone ti'j.

12Mi'n waje tu'n kyoke ky'aj, noq o'kx tu'n kyok lpe'ye kyi'j qeju ma kyk'am aju yol tzaj ttziyan Dios, ma kyk'am tu'nju at kyokslab'l ex at kypasens.

13Porke tej ttzaj ttziyan Dios tyol te Abraham, ax tb'i tzaj tna'n ti'j tyol, porke minti' juntl mas ma' toklen twitz tu'n ttzaj tna'n tb'i ti'j tyol.

14Tzaj tma'n te Abraham: Ax tok nimxix kb'el nky'iwla'na, ex kchmetelxix tiyjila wu'ne, chi Dios.

15Kyja'tzun o tk'am Abraham aju tzaj ttziyan Dios te, tu'nju at tpasens tu'n tayon ti'j.

16Ax tok ok in xi kytziyan xjal jun yol axix tok, in tzaj kyna'n tb'i juntl mas ma' toklen kywitz; ex qa ma jaw jun yol kyxol, atzun in tzaj kyna'n tb'i Dios ti'j kyyol ex tu'n tkyaj segurxix.

17Kyja'tzun tzaj tna'n Dios ax tb'i ti'j tyol, ex atzun taj Dios, tu'n ttzaj tyek'unxix qa mlay ch'expet aju kub' t-ximan; tzaj tyek'un Dios jlu kye qeju at tu'n kyk'monte aju tzaj ttziyan kye.

18Tzaj tna'n Dios ax tb'i ti'j tyol tu'n tq'uqb'anjtzxix qk'u'j tu'nju kab'e yol mlay ch'expet, ex mlay b'ant tu'n tnik'an Dios yol ti'j jlu; kyja'tzun ma qo pon oq tuk'il Dios tu'n qklet ex tu'n qkamb'ante aju in qo ayon ti'j.

19Aju oyb'il lu ik tten ik tza'n taq'al barc, in ajb'en te tzuyb'il te qanmi tu'n tten qanmi segurxix ex tu'n mi'n qyyukch; aju oyb'il atzun tzajni tuj ju Lugar Xjanxix ti'jxi ju xb'alun te maqb'il tkub' tuj tmij tja Dios tuj kya'j.

20Atzun okx nej Jesús tu'n tjaqet qb'e. Kyja'tzun ma tz'ok Jesús te tnejel pal te jumajx, ax toklen ik tza'n te Melquisedec.