1 Reyes 9 - Mam Huehuetenango New Ortography

Kyaj b'ant ti'j jun yol tu'n Dios tuk'il Salomón 2 Crónicas 7.11-22

1Tej tb'aj b'ant tja Qman tu'n Salomón, tuk'ix ju tex tja ex tuk'ix tkyaqilju ximamaj tu'n,

2kub' tyek'un tib' Qman twitz Salomón tkab'majin, ik tza'n tej tkub' tyek'un tib' tuj lugar Gabaón,

3ex tzaj tma'n te: Ma nb'iye aju tkub'sb'ila ex aju ma tzaj tqanina weye, ex ma kub' nky'iwla'ne aju ja lu aju ma jaw tb'incha'na, jatum tu'n ttzaj na'n nb'iye tuj te jumajx. Kukx k'okel nkwentine aju ja lu, ex kukx tzul nna'ne.

4Atzun ja'lo, qa ma b'eta tuj tumelxix nwitze ex minti' tpaltila, ik tza'n o tb'incha David aju qtzan tmana, ex qa ma japun tu'na tkyaqilju o txi nma'ne teya, ex qa ma che'x tnimana qe nleye ex qe nxnaq'tzb'ile,

5aqine chin kyuwsalte tkawb'ila te jumajx kyxol aj Israel, ik tza'n o txi ntziyane te David aju qtzan tmana, tej t-xi nma'ne te qa ax kyxol qe tiyjil kukx tu'n kyjaw nsk'o'ne qe xjal tu'n kyok te kawil kyib'aj aj Israel.

6Ex qa aqeye, ex qa aqe kyk'wa'le ma tz'el kypa'n kyib'e wi'je, ex qa mi'n ẍe japun qe nmandamyente ex qe nleye kyu'ne, aju o txi nma'ne kyeye, ex qa ma che k'ulune kywitz junxitl dios, ex qa ma che ajb'ene kye,

7aqine chin elex lajonte kye aj Israel tuj tx'otx' o txi nq'o'ne te kyetzb'il, ex aju ja ma b'aj nky'iwla'ne kyjel nkoline, ex qe aj Israel che okel xmayin kyu'n kykyaqil nasyon ex che elel ik'un.

8Ex aju ja lu kb'el q'uchj, ex kykyaqil xjal che ik'el b'et ttxlaj ttx'aqan ja che jawil lab'in ti'j ex che okel ten xmayil ti'j ex ok kyma': ¿Tiqu'n ma tb'incha Dios ikju ti'j tnam lu ex ti'j ja lu?

9Ex ktzajel tzaq'we'n kye: Tu'nju ma tz'el kypa'n kyib' ti'j Kydios aju etz q'inte kye kyxe'chel tuj Egipto, ex tu'nju ma che ok ten k'ulul kywitz junxitl dios ex ma che ajb'en kye; tu'ntzun tlaj tkyaqil jlu ma tzaj tq'o'n Dios jun nintz mya b'a'n kyib'aj, che chilo xjal, chi Dios.

Txqantl aq'untl e b'ant tu'n Salomón 2 Crónicas 8.1-18

10Winqin ab'q'i xi ti'n tu'n tb'ant kab'e ja tu'n Salomón, aju tja Dios ex tuk'ix ju tex tja,

11ex tb'ajlenxi jlu xi tq'o'n Salomón winqin tnam ate' tuj Galilea te Hiram aju rey te tnam Tiro, te kyxel qe tze' wi'ten, qe tze' tzaj, ex tkyaqil q'an pwaq aju otoq tzaj tq'o'n Hiram te.

12Tejtzun t-xi' Hiram ke'yil kye qe tnam aqeju otoq che tzaj tq'o'n Salomón te, minti' o tzalaj kyi'j,

13ex tma: ¿Erman, maj atzun qe tnam lu ma che tzaj tq'o'na weye? Chi Hiram. Kyja'tzun aju lugar jatum ate' qe tnam lu ok tq'o'n tb'i Cabul, ex axtzun tb'i tok ja'lo.

14Aju q'an pwaq xi tq'o'n Hiram te rey Salomón, japun jun tajlal te 87 quintal.

15Atzun qe aq'untl lu ok tq'o'n rey Salomón lajwers ti'j tu'n tb'ant kyu'n qe xjal mya aj Israel qe tej tb'ant tja Qman, tuk'ix tja rey, tuk'ix tu'n tnojset jul tu'n tok te chq'ajlaj, ex xi tb'incha'n ju muro toksa'n ti'j Jerusalén, ex e jaw tb'incha'n juntl maj qe tnam Hazor, Meguido ex Gezer.

16Otoq tzyet tnam Gezer tu'n Faraón aju rey tuj Egipto, kub' tpatun ex e kub' tb'yo'n kykyaqil aj Canaán najlqetoq tuj tnam, ex xitzun tq'o'n te jun oyaj te tme'jel tej tmoje' tme'jel tuk'il Salomón.

17Jawtzun tb'incha'n Salomón juntl maj ju tnam Gezer, tuk'ix ju tnam Bet-horón aju tkub' kub'ni,

18kyuk'ix qe tnam Baalat ex Tamar, aqeju ate' tuj lugar tzqij tx'otx' te Judá.

19Ax ikx jaw tb'incha'n juntl maj kykyaqil tnam jatum in xi k'u't twitz awal, ax ikx qe cuartel jatum in che okx ten qe carwaj in che ajb'en tuj q'oj, kyuk'ix qe cuartel kye soldad in che b'et kyib'aj chej, ex tkyaqil aju tajb'iltoq tu'n tb'ant tuj Jerusalén, tuj tiwitz tx'otx' Líbano ex tuj tkyaqil tx'otx' attoq tjaq' tkawb'il.

20Atzun qe xjal najlqe kyuj, aqeju aj Amorreo, qe aj Heteo, qe aj Ferezeo, qe aj Heveo ex qe aj Jebuseo, aqeju e kyaj anq'in, aqe jlu mya aj Israel qe,

21aqeju kyiyjil e kyaj ten te tib'ajxi tuj tx'otx' ex minti' e naj kyu'n aj Israel, atzun qe jlu e ok lajwersin ti'j aq'untl tu'n Salomón, ax ikx in b'ant kyi'j ja'lo.

22Ex minti' e ok tq'o'n qe aj Israel aq'nal ti'j aq'untl lajwers in b'ant, noq o'kx e ok tq'o'n te soldad, ex at xi tq'o'n kyoklen tu'n kyten ttxlaj, ex at e ok te nejenel kye soldad ex te nejenel kye soldad kyokx kyuj carwaj in che ajb'en tuj q'oj ex kye qe soldad kyjax kyib'aj chej.

23Ax ikx ok tq'o'n jwe' syent tuk' 50 te caporal; tuj kykwenttzun qe jlu kyaj tq'o'n Salomón aq'untl, ex atzun qe jlu in che q'mante kye xjal noq alkye aq'untl tu'n tb'ant.

24Aju tme'jel Faraón etz tuj tnam Ttanmi David tb'i ex xi' najal tuj ja otoq jaw tb'incha'n Salomón te te. Ku'xtzun tnojsa'n Salomón jul tu'n tok te chq'ajlaj.

25Tb'ajlenxi b'ant tja Dios, ox maj tuj ab'q'i in xi tq'o'n Salomón qe oyaj patun in che kub', kyuk'ix qe chojb'il te mojb'ab'l tib'il in kub' tq'o'n tib'aj altar aju otoq jaw tb'incha'n te Qman, ax ikx in kub' tpatun storak twitz Qman.

26Ax ikx kub' tb'incha'n rey Salomón qe barc tuj lugar Ezión-geber, aju tkub' junx tuk'il tnam Elat tuj kytx'otx' aj Edom, aju ta' ttzi' ju mar Kyaq Ke'yin.

27Xi t-sama'n Hiram qe xjal at kynab'l tu'n kyyukun barc, tu'n kyxi' tuj barc junx kyuk'il xjal at kyoklen ttxlaj Salomón.

28E pon tuj ju lugar Ofir tb'i, ex atzun tzaj kyi'n ox syent tuk' laj quintal q'an pwaq, ex ul kyi'n tu'n tpon tuk'il rey Salomón.