Amós 1 - Mam Huehuetenango New Ortography

Tzul castiw kyib'aj qe nasyon kyvesin kyib' kyuk'il aj Israel

1Atzun tqanil jlu tzaj tma'n Dios te Amós aju pastor ẍne'l tuj tnam Tecoa; in yolin kyi'j aj Israel tej atxtoq kab' ab'q'i tu'n ttzaj kyaqnajnab' tuj tq'ijlalil Uzías aju rey kye aj Judá, ex tuj tq'ijlalil Jeroboam aju tky'ajal Joás ex rey kye aj Israel.

2Chi in tma'n:

Ok ttzaj tq'ajq'ajel twi Qman in julin wen max twi witz Sión tuj Jerusalén, aju lugar te kywab'l alumaj kb'ajel tzqij ex kb'ajel tzqij tiwitz tx'otx' Carmelo.

3Atzun yol lu in tma'n Qman: Nimku mya b'a'n ma kyb'incha aj Damasco, kyja'tzun mlayx tzik'x ti'j wu'ne tu'n mi'n tkub' kycastiw tu'n tlaj ma che ok ten yajlal kye xjal aj Galaad, ex ik ma che ok kyu'n ik tza'n in b'aj wab'at triw tu'n k'uxb'il kyu'n chej ok nne'l b'ajut.

4Tu'n tlaj jlu k'okel nq'o'ne tq'aq'al tja rey Hazael, ex tu'n q'aq' lu che b'ajel tz'e'y qe tja Ben-hadad jatum in kawin.

5K'okex npa'ne tlamel tnam Damasco ex knajel rey wu'ne, aju in kawin tuj chq'ajlaj Avén, tuk'ix ju rey in kawin tuj Bet-edén; atzun qe xjal aj Siria che xel q'i'n pres tuj tx'otx' Kir, chi Qman.

6Atzun yol lu in tma'n Qman: Nimku mya b'a'n ma b'ant kyu'n aj Gaza, kyja'tzun mlay tzik'x ti'j wu'ne tu'n mi'n tkub' kycastiw, tu'nju ma txi kyi'n pres enter jun tnam xjal ex ma che'x kyk'ayin kye aj Edom tu'n kyok te majen.

7Tu'n tlaj jlu k'okel nqoptz'i'ne q'aq' ti'j muro tok ti'jele tnam Gaza, ex tu'n q'aq' lu che b'ajel tz'e'y qe tja rey jatum in kawin.

8Knajel rey tuj tnam Asdod wu'ne, tuk'ix ju kawil at tuj tnam Ascalón. Tu'n tkyaqil wipumale chin okel tzoqpaje ti'j tnam Ecrón ex mi jun aj Filisteo kyjel anq'in, chi Qman Dios.

9Atzun yol lu in tma'n Qman: Nimku mya b'a'n ma kyb'incha aj Tiro, kyja'tzun mlay tzik'x ti'j wu'ne tu'n mi'n tkub' kycastiw, tu'nju ma txi kyk'ayin enter tnam xjal kye aj Edom tu'n kyok te majen ex minti' ma japun kyu'n aju kyyol kyaj b'ant ti'j kyuk'il txqantl tnam qa tu'n kyonin kyib'.

10Tu'n tlaj jlu, k'okel nqoptz'i'ne q'aq' ti'j muro tok ti'jele tnam Tiro, ex tu'n q'aq' lu che b'ajel tz'e'y qe tja rey jatum in kawin.

11Atzun yol lu in tma'n Qman: Nimku mya b'a'n ma kyb'incha aj Edom, kyja'tzun mlay tzik'x ti'j wu'ne tu'n mi'n tkub' kycastiw, tu'nju e ok lpe' kyi'j aj Israel aqeju kyerman, e q'ojin kyi'j tuk'il kyspad tuj kyq'ab' tu'n tkub' kyi'j kyu'n. Minti' tzaj q'aq'an kyk'u'j kyi'j kyerman, kukx e q'ojin kyi'j ex b'i'x ma txi kyk'u'n kytx'u'jil tuj kyanmi.

12Tu'n tlaj jlu k'okel nqoptz'i'ne q'aq' ti'j tnam Temán, ex tu'n q'aq' lu che b'ajel tz'e'y qe tja rey jatum in kawin tuj tnam Bosra.

13Atzun yol lu in tma'n Qman: Nimku mya b'a'n ma kyb'incha aj Amón, kyja'tzun mlay tzik'x ti'j wu'ne tu'n mi'n tkub' kycastiw, porke noq tu'n tel laq'e' kytx'otx' ku'x kyjaqo'n kyk'u'j qe xu'j otoq tz'ok ten kyal ate' tuj tx'otx' Galaad.

14Tu'n tlaj jlu k'okel nqoptz'i'ne q'aq' ti'j muro tok ti'jele tnam Rabá, ex tu'n q'aq' lu che b'ajel tz'e'y qe tja rey jatum in kawin ok matoq in che sch'in qe xjal tuj q'oj ex in xumin kyq'iq' jb'al wen.

15Atzunte rey kxel q'i'n tuj juntl tnam najchaq junx kyuk'il qe xinaq at kyoklen ttxlaj, chi Qman.