Isaías 35 - Mam Huehuetenango New Ortography

Ok kyul meltz'aj aj Israel tuj tnam Sión

1Ktzalajel aju lugar minti' kynajb'il xjal tuj, ex aju tzqij tx'otx' ktzalajel nimxix ex che jawil poq'l nim b'ech twitz,

2ktzajel tpoq'sa'n nim b'ech ik tza'n in tzaj poq'chaj nim b'ech lirio, ktzalajel nimxix ex kb'itzal tuk'il tzalajb'il. Tb'anilxix k'okel tu'n Dios, ik tza'n ju witz Líbano tb'anilxix ke'yin, ex ik tza'n ju witz Carmelo tuk'ix chq'ajlaj Sarón, tb'anil tx'otx' qe. Kykyaqil xjal k'okel kyke'yin aju t-spik'umal tajwalil Qman Dios.

3E tok kyipun qeju ma che sikt ex e tok kyipun qeju minti' kyipun.

4Kymanxe kyja' kye qeju b'a'n che xob': Kyq'onk kyipune, mi'n che xob'e, lu Kydiose lu tu'n kyklete, ex qe aj q'oj kyi'je kb'el tq'o'n kycastiw tu'ntzun t-xelin mya b'a'n o kyb'incha kyi'je.

5Kjaqetel kywitz qe moẍ ex kb'antel kyb'in qeju chkyin kywi',

6che jawil t'ikpaj qe kox ik tza'n masat, ex che jawil sch'in qe men tu'n tzalajb'il. Che jawitz jlet nim a' tuj lugar minti' kynajb'il xjal tuj, aju tzqij tx'otx'.

7Aju tzqij tx'otx' nim ta'w kyaq tuj, k'okel te jun nintz najab', ex nim twi a' che jawitz jlet tuj tzqij tx'otx'. Tuj lugar jatum najl qe xo'j, ktzajel ch'iy tqan ajlaj tuk'ix tqan chum in ch'iy ttzi a'.

8Kb'antel jun ninb'e ma chixin ex k'okel tb'i: Aju b'e Xjan. Qeju mya tx'jomaj tuj kyanmi ex qeju mib'an che niman, mlay che b'et tuj.

9Tuj b'e lu mlay che ten qe b'alun ex mlay che ul laq'e' qe txkup b'a'n che b'iyun. O'kx che b'etel tuj b'e lu qe xjal otoq che tzoqpet.

10Che ul meltz'aj qe xjal ma che kolpet tu'n Qman. Che okex tuj tnam Sión in che b'itzan tuk'il tzalajb'il, ex kukx che tel tuj tzalajb'il. Kukx che tzalajel ex che tel tuj txub'txaj, mlay che tentl tuj b'is ex mlay che ayayantl.