1Kjawil tb'incha'na ja xb'alun kyi'j laj xb'alun lino, chub'emaj ttze'yil, ex ti'j noq' ẍq'ilun ke'yin, ẍjulin ke'yin ex kyaq ke'yin, tb'anil b'inchb'en kye; ex chmo'maj kyilb'ilal querubín kywitz.
2Kykyaqil qe xb'alun lu, junx kyjel echb'il kye; kyajlaj var kynuqb'il, ex kab' var kywitz.
3Slapun oka jwe' xb'alun, jun ttxlaj juntl. Ax ikx che temb'il jwe'tl.
4Che okel tq'o'na taq'al ẍq'ilun ke'yin te t-ẍkyin ttxlaj mankb'il xb'alun kyi'j qeju jwe' otoq che ok slapit. Ax ikx che okel tq'o'na ttxa'n jun xb'alun kyi'j qe jwe'tl.
5Che okel tq'o'na 50 taq'al ttxa'n tnejel xb'alun ex 50 ti'j ttxa'n juntl, tu'n kykyaj ten qe taq'al jun tuk'il juntl.
6Ax ikx b'inchama 50 ganch q'an pwaq kytx'otx'il. Kyu'ntzun qe ganch lu che okel tmojb'a'na qe ttxa'n xb'alun jun tuk'il juntl. K'okeltzun ja xb'alun junx tten.
7Ax ikx b'inchama junlaj xb'alun ti'j kytzmal chip tu'n tjax q'ot tib'aj xb'alun ja.
8Kykyaqil qe xb'alun lu junx kyjel echb'il kye; olaj var kynuqb'il, ex kab' var kywitz.
9Slapun oka jwe' xb'alun jun ttxlaj juntl. Ax ikx slapun oka qaq xb'alun jun ttxlaj juntl, ex paqtz'u'n ajtza aju tqaqin xb'alun twitz tuk'il.
10Che okel tq'o'na 50 taq'al ti'j ttxa'n tnejel xb'alun, ex 50 ti'j ttxa'n juntl.
11Ax ikx b'inchama 50 ganch q'an k'uxb'il kytx'otx'il, aqeju che okex tq'o'na kyuj qe taq'al ex che okel tmojb'a'na qe xb'alun jun tuk'il juntl. K'okeltzun tmaqel junx tten.
12Atzun qe ttxa'n che kyjel ten, che elex jowe' ti'jxi ja xb'alun.
13Kyja'tzun kmaqsetel ja xb'alun kyu'n qe ttxa'n xb'alun che kyjel jowe' kykab'il pak': Kab'e xk'achub' kyjel jowe' jun pak' ex kab'e juntl pak'.
14B'inchama jun maqsib'l te xb'alun ja ti'j ttz'umal ẍne'l tok tk'a' kyaq ke'yin; ex tib'ajxi jlu b'inchama juntl maqsib'l ti'j tz'u'm tb'anilxix.
15B'inchama txqan tz'lom ti'j tze' ch'i'x acacia tu'n kyok q'ot wa'l kyten ti'j ja xb'alun.
16Teyle te junjun tz'lom jwe' var tnuqb'il, ex ox xk'achub' twitz.
17Kyjel ten kab'e t-ẍkyin teyle te junjun tz'lom tu'n tok moje' jun tuk'il juntl. Iklex che temb'il kyu'ne kykyaqil qe tz'lom ti'j ja xb'alun.
18B'inchama winqin tz'lom tu'n kyok ti'j ja xb'alun tuj tumlal tnayaj q'ij;
19ex kyjaq' qe tz'lom lu, q'on kub'a 40 tq'uqb'il saq pwaq kytx'otx'il; che kyjel ten kab'e tq'uqb'il tjaq' teyle te junjun tz'lom tu'n kyku'x qe' kykab'il kyẍkyin kyuj.
20Ax ikx ti'j juntl pak' xb'alun ja, tuj tumlal tb'anq'ab' q'ij, b'inchama winqin tz'lom,
21ax ikx 40 tq'uqb'il saq pwaq kytx'otx'il, tu'n kyten kab'e tjaq' teyle te junjun tz'lom.
22Atzunte ti'jxi ja xb'alun tuj tumlal telex q'ij, b'inchama qaq tz'lom,
23ex kab'etl tz'lom k'okel tq'o'na kyi'j kab'e tb'utx' te ti'jxi,
24aqeju che okel mojb'et xi'ynix t-xe', atzun twi' tu'n kyok mojb'et tu'n jun argoy. Atzun jlu kb'antel tu'na kyi'j kykab'il tz'lom che okel kyi'j kykab'il tb'utx'.
25Kb'anteltzun wajxaq tz'lom ex qaqlaj kyq'uqb'il saq pwaq kytx'otx'il, kab'chaq tjaq' teyle junjun tz'lom.
26Ax ikx b'inchama jwe' tze' ti'j ch'i'x acacia te tq'e'lil, tu'n kyok ten qe tz'lom kyi'j tuj jun pak' ja xb'alun,
27jwe'tl tq'e'lil tu'n kyok ten qe tz'lom kyi'j tuj juntl pak' ex jwe'tl tq'e'lil tu'n kyok ten qe tz'lom ti'jxi ja xb'alun tuj tumlal telex q'ij.
28Aju tq'e'lil te tuj tmij kxel qe' ti'j jun ttxa'n ex kpol b'aj ti'j juntl.
29Lo'tzin oka q'an pwaq kyi'j qe tz'lom, ex b'inchama qe argoy q'an pwaq kytx'otx'il jatum tu'n kyex qe tq'e'lil. Ax ikx lo'tzin oka q'an pwaq kyi'j qe tze' lu.
30B'inchama ja xb'alun ik tza'nx tzaj nyek'une teya twi witz.
31B'inchama jun xb'alun te maqb'il, ti'j noq' ẍq'ilun ke'yin, ẍjulin ke'yin, kyaq ke'yin, ex lino chub'emaj ttze'yil, tb'anil b'inchb'en te ex chmo'maj kyilb'ilal querubín twitz.
32Q'on oka tganchil q'an pwaq kytx'otx'il, ex yob'in oka kyi'j kyaje tqan, aqeju otoq che b'aj tb'incha'na ti'j tze' ch'i'x acacia, lo'tzin oka q'an pwaq kyi'j ex wa'l kykub' qe kyib'aj kyaje kyq'uqb'il saq pwaq kytx'otx'il.
33Kjawil tyob'ina xb'alun te maqb'il kyi'j qe ganch; atzun ti'jxi xb'alun te maqb'il lu tuj Lugar Xjanxix, k'okex tq'o'na aju kax te k'ub'l nleye. Kyja'tzun kb'el ten aju xb'alun te maqb'il t-xol Lugar Xjan ex Lugar Xjanxix.
34Aju kax te k'ub'l nleye, aju k'okex tq'o'na tuj Lugar Xjanxix, kb'el tq'o'na tmaqsil tib'aj.
35Atzunju mes kb'el tq'o'na tuj ja xb'alun ti'jtzi xb'alun te maqb'il ex tuj tumlal tb'anq'ab' q'ij, ex kb'el tq'o'na kykub'il kandil tuj tumlal tnayaj q'ij twitz mes.
36B'inchama jun xb'alun te maqb'il ttzi ja xb'alun; kb'antel tu'na ti'j noq' ẍq'ilun ke'yin, ẍjulin ke'yin, kyaq ke'yin ex lino chub'emaj ttze'yil, ex chmo'maj qe twitz.
37B'inchama jwe' tqan ti'j tze' ch'i'x acacia tu'n tjaw yob'it xb'alun te maqb'il ttzi ja xb'alun, lo'tzin oka q'an pwaq kyi'j, ex b'inchama qe ganch q'an pwaq kytx'otx'il, ex jwe' kyq'uqb'il tqan q'an k'uxb'il kytx'otx'il.
Who We AreWhat We EelieveWhat We Do
2025 by iamachristian.org,Inc All rights reserved.
