Éxodo 40 - Mam Huehuetenango New Ortography

Tej t-xjanset tja Dios

1Tzaj tma'n Qman te Moisés kyja':

2Tuj tnejel q'ij te tnejel xjaw kjawil twab'ana njaye, aju ja xb'alun te mojb'ab'l tib'il.

3K'okex tq'o'na kax k'ub'l nleye tuj, ex kb'el tq'o'na xb'alun te maqb'il tuj tmij ja, tu'ntzun mi'n tq'ancha'lin kax.

4K'okex tq'o'na aju mes tuj, ex che b'el tq'o'na tuj ttxolil qeju che b'el ten tib'aj. Ax ikx k'okex tq'o'na aju kykub'il kandil ex che okel ttxaqo'na qe kandil.

5Kb'el tq'o'na aju altar q'an pwaq ttx'otx'il te patb'il storak twitz kax k'ub'l nleye, ex kjawil tyob'ina xb'alun ttzi njaye.

6Te tib'ajxi kb'el tq'o'na aju altar te patb'il chojb'il twitz ttzi njaye, aju ja xb'alun te mojb'ab'l tib'il.

7Kb'eltzun tq'o'na aju tkub'il a' t-xol ja xb'alun te mojb'ab'l tib'il tuk'il altar, ex kb'elex tnojsa'na tu'n a'.

8Kb'el tb'incha'na jun ttxa'n pe'n ti'jele ex kjawil tyob'ina xb'alun te maqb'il ttzi pe'n.

9Ktzajeltzun ti'na aju aseyt in ajb'en ok tok toklen jun xjal, kb'el tqo'na ch'in tib'aj njaye ex tib'aj tkyaqilju tokx tuj. Tkyaqilju in ajb'en tuj, kxjansetel tu'na ex k'okel te xjan.

10Ax ikx kb'el tqo'na ch'in aseyt tib'aj altar te patb'il chojb'il, ex kyib'aj kykyaqil qe makb'il in che ajb'en ti'j. Kxjanseteltzun tu'na ex k'okel te jun altar xjanxix.

11Ax ikx kb'el tqo'na ch'in aseyt tib'aj tkub'il a' ex tib'aj tq'uqb'il, ex kxjanseteltzun tu'na.

12Kxe'ltzun ti'na Aarón kyuk'ix qe tky'ajal ttzi ja xb'alun te mojb'ab'l tib'il, ex che b'ajel ttx'jo'na tu'n a'.

13Che okel tq'o'na qe xb'alun xjan ti'j Aarón, kb'el tqo'na aseyt tib'aj twi' ex kxjansetel tu'na tu'n tok te pal te weye.

14Te tib'ajxi che pol tlaq'b'a'na qe tky'ajal, ex k'okel tq'o'na qe ẍjo'w kyi'j.

15Kb'el tqo'na aseyt tib'aj kywi', ik tza'n kub' tqo'na aseyt tib'aj twi kyman, ex che okel te pal te weye. K'okeltzun kyoklen te pal, ex aju kyoklen lu kukx ktel te jumajx tuj tkyaqil tab'q'iyil, chi Qman.

16O tb'incha Moisés tkyaqil ik tza'n otoq tzaj tma'n Qman te.

17Tuj tnejel q'ij te tnejel xjaw te tkab'in ab'q'i kyetzlen aj Israel tuj Egipto, jaw wab'it tja Dios.

18Tej tjaw twab'an Moisés tja Dios, e kub' tq'o'n qe tq'uqb'il, e ok ttxolb'a'n qe tz'lom, e ok tq'o'n qe tze' te tq'e'lil, ex e ku'x tq'o'n qe tqan.

19Jax tq'o'n xb'alun twi tja Dios ex jax tq'o'n juntl tmaqsil tib'aj, ik tza'n otoq tzaj tma'n Qman te.

20Tzajtzun ti'n Moisés aju ley ex ku'x tq'o'n tuj kax. E ok tq'o'n qe tze' tolin kyi'j ti'j kax ex kub' tq'o'n tmaqsil.

21Okxtzun tq'o'n Moisés aju kax k'ub'l tley Dios tuj ja xb'alun, ex kub' tq'o'n xb'alun te maqb'il tuj tmij ja tu'ntzun mi'n tq'ancha'lin kax, ik tza'n otoq tzaj tma'n Qman te.

22Okx tq'o'n aju mes tuj ja xb'alun te mojb'ab'l tib'il, tuj tumlal tb'anq'ab' q'ij ex ti'jtzi xb'alun te maqb'il,

23ex tib'aj mes lu, e kub' ttxolb'a'n qe pan in che kub' q'o'n twitz Qman, ik tza'n otoq tzaj tma'n Qman te.

24Okx tq'o'n aju kykub'il kandil tuj ja xb'alun te mojb'ab'l tib'il, tuj tumlal tnayaj q'ij, twitz mes ex ti'jtzi xb'alun te maqb'il,

25ex e ok ttxaqo'n qe kandil twitz Qman, ik tza'n otoq tzaj tma'n Qman te.

26Okx tq'o'n aju altar q'an pwaq ttx'otx'il te patb'il storak tuj ja xb'alun te mojb'ab'l tib'il, twitz xb'alun te maqb'il,

27ex kub' tpatun storak at tk'ok'jal tib'aj, ik tza'n otoq tzaj tma'n Qman te.

28Jaw tyob'in aju xb'alun ttzi tja Dios.

29Kub' tq'o'n aju altar te patb'il chojb'il twitz ttzi tja Dios, aju ja xb'alun te mojb'ab'l tib'il, ex e kub' tpatun qe alumaj tib'aj, tuk'ix twitz awal, te jun oyaj te Qman, ik tza'n otoq tzaj tma'n te.

30Kub' tq'o'n aju tkub'il a' t-xol ja xb'alun te mojb'ab'l tib'il tuk'il altar, ex ku'x tnojsa'n tu'n a' te tx'ajb'il.

31Atzun in che el ttx'jo'ntoq tq'ab' Moisés kyuk'ix qe tqan, ikx te Aarón ex qe tky'ajal.

32Ok kyokx tuj ja xb'alun te mojb'ab'l tib'il ex ok kypon laq'e' ti'j altar, tnejel in che tx'ajintoq, ik tza'n otoq tzaj tma'n Qman te Moisés.

33Te b'ajsb'il ok tq'o'n Moisés pe'n ti'jele tja Dios, ex ti'jele ttxa'n tpe'n jatum tkub' altar te patb'il chojb'il, ex jaw tyob'in aju xb'alun ttzi pe'n. Kyja'tzun tten b'aj b'ant aju aq'untl tu'n Moisés.

Kub' ten muj tib'aj ja xb'alun te mojb'ab'l tib'il Números 9.15-23

34Kub' ten muj tib'aj ja xb'alun te mojb'ab'l tib'il ex o noj tuj tu'n tajwalil Qman.

35Minti' o b'ant tu'n tokx Moisés tuj ja xb'alun te mojb'ab'l tib'il, tu'nju otoq kub' ten muj tib'aj ex nojnitoq tuj tu'n tajwalil Qman.

36Ok tjaw laq'e' muj tib'aj ja xb'alun te mojb'ab'l tib'il, in jaw kyi'ntoq aj Israel kyja ex in che ik' b'ettoq.

37Qatzun minti' in jaw laq'e' muj, minti' in jaw kyi'n kyja, ex maxi in che ik' b'et ok tjaw laq'e' muj.

38Te q'ijl in kub' tentoq aju muj te Qman tib'aj ja xb'alun te mojb'ab'l tib'il, atzun te qonik'an in kub' tentoq q'aq' tib'aj, ex q'ancha'ltoq jlu kywitz kykyaqil aj Israel. Iklex tten tkyaqil maj ok kyik' b'et ex noq jatum ok kykub' ten.