1Nman, b'intza tq'ajq'ajel nwi'ye, q'ontz twi'ya ti'j nna'j Diose, ex tz'aqlxix qine twitza, porke minti' nne'tz jun nik'aj yol tuj ntzi'ye.
2Tu'na ktzajel tb'incha'na wi'je, porke b'a'n tu'na alkye aju tz'aqlxix.
3Aya in b'aj ke'yinte qe nximb'etze; nnu'l aja ke'yil weye te qonik'an; o chin ok tq'o'na tuj malb'il ex minti' ma knet jun mya b'a'n wi'je tu'na. B'ajx txi nma'ne jun ti'xti mya tuj tumelxix,
4ik tza'n in kyb'incha'n txqantl xjal; ma chin el laq'e'ye ti'j kyb'e qeju o'kx in che ximan ti'j tu'n tkub' jun xjal kyu'n, ma nb'inchaye ik tza'nx in kyma'n qe tmandamyenta.
5Kukx wa'lxix qine tuj tb'eya; b'ajx tz'el npa'n wib'e ti'j.
6Aya Dios, ti'ja in jaw tq'ajq'ajel nwi'ye, porke in chin tzaj ttzaq'we'na; q'ontz twi'ya ti'j, ex b'intza qe nyole.
7Yek'untza weye aju tk'ujlalila tb'anilxix, ex tu'na in che klet qe xjal, aqeju in pon kyklon kyib' ti'ja tu'ntzun mi'n kynaj kyu'n qe aj q'oj kyi'j.
8Chin tkwentin oka ik tza'n t-santil qe tb'aq' twitza; chin tkloma tjaq' t-xlekumal t-xik'a
9kywitz qe xjal mya b'a'n in che ok tzoqpaj wi'je, ex kywitz qe aj q'oj wi'je kytxolin kyib' wi'je tu'n nkub'e kyu'n.
10Aqeju xjal lu kyuwxix kyanmi, in che yolin tuk'il kynimb'il kyib';
11niqayin lepch qe wi'je ex in che ayon ti'j noq jnik' or ok nkub' tz'aqe kyu'n twitz tx'otx'.
12Ik kyten ik tza'n qe b'alun in che kub' ten xq'uqil tu'n ttzyet jun kykanb', ex ik tza'n jun tal tman b'alun nno'kx yut'e' tuj tewb'il.
13We'ktza Nman, we'kuya kywitz qe jlu. Xon kub'a qe twitz tx'otx'. Chin tkloma tu'n t-spadiya kywitz qe xjal mya b'a'n;
14chin tkloma tu'nju tipumala kywitz qe xjal lu, Nman; lajo'n exa qe twitz tx'otx' lu, ex atzunju kyetzb'il at tuj kychwinqlal lu. Noq kukx ke'yinxa qe, e tchmet nim kyq'inumab'l tu'ntzun kywa'nxix qe kyk'wa'l ti'j, ex tu'n tkyajtentl kye qe tal kychman.
15Atzun weye, k'okel nke'yine twitza tu'nju tz'aqlxix qine; ok chin jawil tzalaje ok tok nke'yine twitza, ok tel nwatle.
Who We AreWhat We EelieveWhat We Do
2025 by iamachristian.org,Inc All rights reserved.
