1Nman Dios, ¿tiqu'n ma qo kyaj tkolina te jumajx? ¿Tiqu'n ma tzaj ttx'u'jila qi'je aqo'ye t-ẍne'la ato'ye tuj tpe'na?
2Na'ntza qo'ye, aqo'ye jun tnam etzan tu'na, aju knet tu'na atxix ojtxi, aju o kolpet tu'na tu'n tok te jun tnam etzan tu'na; na'ntza aju witz Sión jatum o najana.
3Tzaja ke'yilte kye qe ja te jumajx ma che kub' xitj; ma b'aj kyxitun aj q'oj tkyaqil aju at tuj lugar xjan teya.
4Qe aj q'oj ti'ja in che sch'in tuj tjaya. Ma kub' kyq'o'n qe kybander te jun techal tu'nju ma che kamb'an.
5Mer ik tza'n tx'emil si' qe tuj tmijil jun chk'ul pin tze' tuj,
6tu'n siwb'il k'uxb'il ex tu'n martiy el kypa'n qe tilb'ilal k'ochimaj twitz ja.
7Ok kyqoptz'in q'aq' ti'j tjaya jatum najliya, ex b'aj kytz'ilsa'n ex kub' kyxitun.
8Kub' kyximan tu'n qkub' b'aje kyu'n; b'aj kypatun kykyaqil lugar jatum in kub' qchmon qib'e tu'n qk'ulune teya.
9Minti'tl in qile qe techal xjan qe, minti'tl jun t-sanjela atx ex minti'lpe b'a'n qu'ne jtoj b'aj jlu.
10Nman Dios, ¿jtoj tu'n t-xi kykolin aj q'oj tu'n kyyolin mya b'a'n qi'je? ¿Kukxpe che okel ten aj q'oj xmayil ti'ja?
11¿Tiqu'n minti'tl in qo tzaj tonina? ¿Tiqu'n in che kub' ttz'ulina qe tq'ab'a?
12Atxix tuj tq'ijlalil ojtxi aya nreye. Nman Dios, nimku maj o qo klete tu'na;
13tu'n tipumala kub' tpa'n tib' mar, kub' tpa'na kywi' qe nintz txkup ate' tuj mar,
14kub' tpach'u'na qe twi' ju nintz txkup Leviatán tb'i, ex xi tq'o'na te kychi' qe txkup ate' tuj lugar minti' kynajb'il xjal tuj.
15Tu'na jaqet kywi a' ex qe nima, ex e aj tzqij qe nima aqeju b'ajx che aj tzqij.
16Teya ju q'ij ex qonik'an; tu'na o b'ant xjaw ex q'ij;
17tu'na kub' tq'o'na techal jatum ponin b'aj tx'otx'; tu'na b'ant tq'ijlalil koresma ex tq'ijlalil jb'alil.
18Q'o'nk tkwenta ti'j Nman, in ik'un aj q'oj ti'ja ex aju xjal minti' tnab'l in yolin mya b'a'n ti'ja.
19Mi'n tzik' qna'njtze tu'na. Minti' qipune. Ik qtene ik tza'n qe ẍpo'q; mi'n qo'x tq'o'na kye qe txkup te tjaq' k'ul.
20Na'ntza aju yol o kyaj b'ant ti'j tu'na, ex nojni tuj tkyaqil twitz tx'otx' tu'n k'ixb'isab'l.
21Mi'n taq'a amb'il tu'n tkub' kych'ixwi qe xjal in che b'aj yajla'n; kjawil nimsa'na kyu'n qe xjal meb'a ex qe mans.
22Nman Dios, we'ktza ex klom tib'a. Na'ntza, minti' in xi kykolin xjal minti' kynab'l tu'n tok ik'le'na kyu'n.
23Mi'n tzik' tna'l tu'na aju tq'ajq'ajel kywi' aj q'oj ti'ja in che sch'in, tuk'ix tq'ajq'ajel nimxix kyu'n qeju in jaw kyi'n kyib' ti'ja.
Who We AreWhat We EelieveWhat We Do
2025 by iamachristian.org,Inc All rights reserved.
