1Nk'wa'l, nimanxa nyole; k'u'nxa qe nmandamyente tuj tanmiya.
2Nimanxa qe nmandamyente ex qe nxnaq'tzb'ile; kwentinxa qe ik tza'n nno'k tkwentina qe t-santil tb'aq' twitza, tu'ntzun tanq'ina.
3K'alo'n oka qe kyi'j qe tal tq'ab'a, ex awa'n ku'xa qe tuj tanmiya.
4Q'o'nka ju nab'l ik tza'n tanb'a, ex q'o'nka ju ojtzqib'l ik tza'n tamiwoya.
5Porke aqe jlu che klol teya twitz ju xu'j aj pajil ex twitz juntl xu'j kye'yix tponlen tyol.
6At jun q'ij in chin ke'yintoqe ttzi nventaniye,
7o wile jun k'loj ku'xun minti' in che ximan ti'j alkye b'a'n tu'n tb'ant kyu'n, ex ok nq'o'ne kwent ti'j jun jumajx minti' tnab'l.
8Tej tpon tuj skyin, ik'x tuj cay tu'n tpon tja ju xu'j aj pajil,
9otoq tz'ok qax ex kyja'toq tok yupj.
10Etz naj ju xu'j kanul ti'j ku'xun lu, tb'inchanxix tib' tuj t-xb'alun, aju in ajb'enxix tu'n tu'n tyaẍin, ex jawni xmoxin,
11noqxix lonx jun xu'j jawni twitz tu'n tb'inchante mya b'a'n ex minti' in ten tja,
12noq in b'et tik' tuj cay, tuj plas ex tuj skyin ex in xq'uqin ti'j noq alkyexku xinaq ma tzik'x tuj cay.
13Tzajtzun chle'n ku'xun tu'n xu'j ex el ttz'ub'an twitz minti' tch'ixwi ti'j, ex xi tma'n te:
14O txi ntziyane tu'n t-xi nq'o'ne jun alumaj te oyaj te mojb'ab'l tib'il ex ma japun wu'ne ja'lo.
15Kyja'tzun ma chin tzaje kanul ti'ja, tu'nju at nim nganiye tu'n tok nke'yine twitza ex lu ma kneta wu'ne.
16Ma kub' nlik'une ju xnoq'al twi nwatb'ile qtz'umin twitz, tzajni tuj Egipto,
17ex ma b'aj nq'o'ne perjum ti'j; atzun qe jlu: Mirra, áloe, ex canela.
18Ttzaja, ex jaku qo achin wen tuj enter qonik'an,
19ex mi a'l nchmile, ma txi' tuj jun tb'e najchaq;
20ma txi ti'n jun ch'u'ẍ pwaq ex maxi tzul meltz'aj okxi ttijin xjaw, chi xu'j.
21Kub' ti'j tnab'l ku'xun tu'n tyol xu'j kye'yix tponlen wen;
22minab'enku ok lpe' naj ku'xun ti'j ju xu'j, ik tza'n nno'k lpe' jun wakẍ ti'j jun xjal tu'n t-xi q'i'n tuj b'iyb'il te, ex ik tza'n jun masat ok in tzyet tu'n tramp;
23in tzaj xo'n naj jun plech ti'j tanmi tu'ntzun tkyim. Ik tten ik tza'n jun chyu'j nno'kx tq'on tib' tuj k'ob'il, minti' b'a'n tu'n qa te tzuyb'il te tu'n tnaj.
24Kyja'tzun nk'wa'l, chin tb'inkuya ex q'ontz twi'ya ti'j nyole.
25Mi'n txi tq'o'na t-ximb'etza ti'j ju xu'j lu, mi'n tz'ok lpe'ya ti'j, ex jaku naja,
26ex nimxi xjal o che kub' tb'yo'n ex nimxi jumajx o che naj tu'n.
27Aju tu'n qxi' tuj b'e in pon ma tja, junx ta' ik tza'n tu'n qku'pun max tuj kynajb'il kyimni.
Who We AreWhat We EelieveWhat We Do
2025 by iamachristian.org,Inc All rights reserved.
