Ester 8 - Mam Huehuetenango New Ortography

Ex tq'o'n Rey Asuero orden tu'n kyxtalinjtz qe xjal Judiy

1Tujx q'ij lu xi tq'o'n rey Asuero tja Amán te Ester. Ate Amán aj q'ojtoq kyi'j qe xjal Judiy. Ex pontzun Mardoqueo tuk'il rey tu'nju otoq txi tma'n Ester te rey alkye t-xilen tuk'il Mardoqueo.

2Eltzun ti'n rey t-xmulq'ab', aju otoq tz'el ti'n te Amán, ex xi tq'o'n te Mardoqueo. Atzunte Ester ok tq'o'n toklen Mardoqueo te kwentil tkyaqil q'inumab'l aju tetoq Amán tnejel.

3Xi' juntl maj Ester yolil tuk'il rey, kub' mutze' twitz tqan rey, in oq' wen, ex xi tma'n te tu'n tkub' q'uchit aju orden mya b'a'n otoq b'ant tu'n Amán, ex tu'n mi'n tjapun aju b'animaj ti'j tu'n tu'n tb'inchante kyi'j qe xjal Judiy.

4Atzunte rey xi tnuqpi'n tbastón q'an pwaq ti'j Ester. Jawtzun we' Ester, kub' we' twitz rey,

5ex tma:

—Qa b'a'n jaku tz'ela tuj twitza Tat Rey, ex qa tuj tumelxix jaku tz'ela nqanb'etze tuj twitza, qa axix tok at tganiya ex tk'ujlalila wi'je, ex e tkub' tz'ib'et jun orden tu'n kykub' q'uchit qe u'j xi t-sama'n Amán aju tky'ajal Hamedata, jatum tz'ib'an ju orden tu'n kykub' b'aj b'yet qe xjal Judiy kyuj kykyaqil partament ate' tjaq' tkawb'ila.

6Ex ¿tza'n tten tu'n nlonteye aju mya b'a'n ch'ix ttzaj kyib'aj qe nxjalile, ex tu'n tkub' wipa'ne ok kykub' b'aj b'yo'n qeju at nxilene kyuk'il?

7Xitzun ttzaq'we'n rey Asuero te Ester ex te Mardoqueo aju xjal Judiy:

—O txi nq'o'ne tja Amán te Ester, ex o jaw yob'it Amán ti'j jun tze' tu'nju xi tq'o'n orden tu'n kynaj qe xjal Judiy.

8Atzun ja'lo kxel nma'ne kyeye tu'n tkub' kytz'ib'ane noq alkye b'a'n tuj kywitze, tu'n tajb'en tu'n kyklet qe xjal Judiy. Jaku tz'ok npirmaye ti'j, ex kyseyarin kub'e qe u'j tu'n weye nsey.

(Jun u'j tok tpirma rey ti'j tuk'ix t-sey mlay kub' q'uchin.)

9Jurat naj e je'x txokb'aj qe aj tz'ib'al te rey tuj 23 tajlal toxin xjaw, ex qa aju xjaw Siván tb'i. Tkyaqilju xi tma'n Mardoqueo kye aj tz'ib'al, xi kytz'ib'an kye xjal Judiy, kye qe xjal at kyoklen ttxlaj rey, kye qe gobernador kyuj partament ex kye txqantl xjal at kyoklen kyuj 127 partament, xi'ynix qe' tuj tnam India ex ponin b'aj max tuj tnam Etiopía. Kub' tz'ib'an ik tza'n che yolin ex ik tza'nx tz'ib'ante kyyol junjun k'loj xjal tuj junjun partament. Ax ikx kye xjal Judiy xi tz'ib'an tuj kyex kyyol ex ik tza'nx tz'ib'bante kyyol.

10Ok tpirma rey Asuero kyi'j qe u'j lu, ex kyb'ajlenxitzun seyarin qe u'j tu'n t-sey rey, e je'xtzun sama'n qe sanjel sipal kye, kyjax qe kyib'aj qe tchej rey kye che qelan.

11Kyujtzun qe u'j lu xi tma'n rey kye xjal Judiy tu'n tok kychmon kyib' kyuj noq alkyex tnam jatum najlqe, tu'ntzun kyklonte kyib' ex tu'n tkub' kyb'yo'n kykyaqil qe xjal b'anin kyten tuk'il kymakb'il in che ajb'en tuj q'oj tu'n kyok tzoqpaj kyi'j, tuk'ix kyi'j kyxu'jil ex qe kyk'wa'l, aqeju ate' tuj noq alkyex tnam ex qa partament. Ax ikx tu'n kyok xjal Judiy te tajwil kyq'inumab'l aj q'oj kyi'j.

12Tkyaqil jlu il ti'j tu'n tb'ant tuj junx q'ij kyuj kykyaqil partament ate' tjaq' tkawb'il rey Asuero, ex aju q'ij b'animaj ti'j, atzun tuj oxlaj tajlal tkab'lajin xjaw, aju xjaw Adar tb'i.

13Il ti'j tu'n tex chik'b'et jun copya te ley lu, ex tu'n t-xi q'ot kyuj kykyaqil tnam ex qe partament, tu'ntzun tb'ant kyten qe xjal Judiy tuj q'ij lu tu'n kyklonte kyib' kywitz qe aj q'oj kyi'j.

14Tu'nju orden tu'n rey, aqeju sipal u'j jurat naj b'aj kysipan qe u'j, kyjax qe kyib'aj qe chej te rey. Ax ikx ex chik'b'et orden lu tuj tnam Susa.

15Etztzun Mardoqueo tuj tja rey, tok t-xb'alun rey ti'j, cha'x tuk' saq ke'yin, ex tjax jun tb'anil coron tuj twi', q'an pwaq ttx'otx'il, ex tok juntl tb'anil xb'alun ti'j, lino tb'i, ẍjulin ke'yin. Ex kykyaqil xjal najlqe tuj tnam Susa nimxix e tzalaj.

16Tkyaqil jlu ok te nim tzalajb'il ex te jun nimb'il kye kykyaqil xjal Judiy, ex e ten tuj txub'txaj.

17Kyuj kykyaqil partament, kyuj kykyaqil tnam ex qe lugar jatum pon ju orden lu tu'n rey, nimxix e tzalaj qe xjal Judiy, ok nintz wa'n kyu'n ex kub' kyik'sa'n ninq'ij. Ax ikx qe xjal ax najlqe tuj tx'otx', at nimku ok kyq'on kyib' te Judiy, ex tzaj kyxob'il kywitz qe xjal Judiy.