2 Crónicas 8 - Mam Huehuetenango New Ortography

Txqantl aq'untl e b'ant tu'n Salomón 1 Reyes 9.10-28

1Winqin ab'q'i xi ti'n tu'n tb'ant tja Qman tu'n Salomón, tuk'ix ju tex tja,

2ex te tib'ajxi jaw tb'incha'n juntl maj qe tnam aqeju otoq txi tq'o'n rey Hiram te, ex e pon ti'n qe aj Israel tu'n kynajan kyuj.

3Te tib'ajxi jlu kub' b'e tu'n Salomón tu'n tok tzoqpaj ti'j tnam Hamat, aju at tuj tx'otx' Soba, kub' ti'j tu'n ex ok te tajwil tx'otx'.

4Ax ikx jaw tb'incha'n juntl maj tnam Tadmor tuj lugar tzqij tx'otx', kyuk'ix kykyaqil tnam ate' ti'jele tnam Hamat, jatum in che'x k'u't qe twitz awal.

5Ax ikx jaw tb'incha'n juntl maj tnam Bet-horón te jawni ex ju tnam Bet-horón te kub'ni, aqeju tnam lu ok tq'o'n muro kyi'j, ax ikx e ok tq'o'n qe kylamel kyuk'ix qe trank kyi'j.

6Ax ikx jaw tb'incha'n juntl maj tnam Baalat ex qe txqantl tnam jatum in che'x k'u't qe twitz awal, ex e b'aj tb'incha'n kykyaqil qe cuartel jatum in che okx ten qe carwaj in che ajb'en tuj q'oj, kyuk'ix qe cuartel kye qe soldad in che b'et kyib'aj chej, ex b'aj tb'incha'n tkyaqilju tajb'iltoq tu'n tb'ant tuj Jerusalén, tuj tiwitz tx'otx' Líbano ex tuj tkyaqil tx'otx' attoq tjaq' tkawb'il.

7Atzun qe aj Heteo, aj Amorreo, aj Ferezeo, aj Heveo ex aj Jebuseo, aqeju mya aj Israel qe,

8aqe jlu kyiyjil qeju e kyaj anq'in ex minti' e kub' b'yo'n kyu'n aj Israel noq o'kx ax e kyaj ten kyxol, atzun qe jlu ok tq'o'n Salomón il kyi'j tu'n kyaq'nan ti'j taq'un, ax ikx in b'ant kyi'j ja'lo.

9Ex mi jun aj Israel ok tq'o'n Salomón tu'n tok te tmajen, noq o'kx e ok tq'o'n te soldad, te nejenel kye soldad, ex te nejenel kye soldad kyokx kyuj carwaj in che ajb'en tuj q'oj ex te nejenel kye soldad kyjax kyib'aj chej.

10Atzun qe caporal, aqeju kyaj q'o'n aq'untl tuj kykwent tu'n rey Salomón, attoq kab' syent tuk' 50 kyb'aj.

11Tzaj ti'n Salomón tme'jel Faraón tuj tnam tok tb'i Ttanmi David, ex pon ti'n tuj ja otoq jaw tb'incha'n tu'n tajb'en te, ex tma: Aju nxu'jile mlay najan tuj tja David aju qtzan rey kye aj Israel, porke aju lugar jatum o tz'okx ten ju kax k'ub'l tley Dios, xjansa'maj.

12Ex kukx in xi tq'o'ntoq Salomón qe oyaj patun in che kub' tib'aj altar te Qman, aju altar tu'nx Salomón otoq b'aj tb'incha'n twitz tja Dios,

13in xi tq'o'n kyuj qe q'ij b'anin ti'j ik tza'nx tz'ib'an tuj tley Moisés, ex atzun qe q'ij lu: Qe q'ij te ojlab'l, qe ninq'ij ok ttzaj ke'yin juntl ak'aj xjaw ex qe ox q'ij ninq'ij in che kub' ik'set tuj junjun ab'q'i: Aju ninq'ij ok kywa'n xjal pan minti' t-samel tuj tu'n tjaw mal tk'u'j, ju ninq'ij ok tjapun wuq seman tb'ajlenxi xjan q'ij, ex ju ninq'ij ok kyb'ant qe tal ja t-xaq tze'yin kywi'.

14Ex b'aj tpa'n Salomón qe pal tuj k'lojin tu'n kyajb'en tuj taq'un Dios ik tza'n b'animaj ti'j tu'n David aju qtzan tman, ax ikx qe aj Leví xi q'o'n kyoklen tu'n kyb'itzan ex tu'n kyonin kyuk'il qe pal ti'j noq alkye tu'n tb'ant junjun q'ij. Ax ikx e b'aj pa'n tuj k'lojin qe kwentil ttzi ja, tu'n kykub' ten ttzi junjun tlamel, ex kyja'tzun tten q'ma'maj tu'n David aju tmajen Dios.

15Kyja'tzun, minti' el kypa'n kyib' qe pal ex qe aj Leví ti'j ju kyaj tma'n rey David, ax ikx qe kwentil jatum k'u'n ju q'inumab'l.

16Kyja'tzun, tkyaqilju kub' t-ximan Salomón tu'n tb'ant o japun tu'n, tzyet taq'nan ti'j atxix tuj q'ij tej kykub' qe' t-simyentil tja Dios, ex tejxi tb'aj b'ant tkyaqil.

17Xi'tzun Salomón tuj tnam Ezión-geber ex tuj Elat, aqeju tnam ate' ttzi'yile mar tuj kytx'otx' aj Edom.

18Atzunte rey Hiram tzaj t-sama'n txqan barc kyuk'ix qe xjal ma' kyoklen ttxlaj, kyuk'ix qe xinaq yukul barc in che ajb'en te ex at kynab'l tu'n kyyukun barc. Atzun qe jlu e je'x junx kyuk'il qe xjal ma' kyoklen ttxlaj rey Salomón, ex e pon tuj tnam Ofir, atzun tzaj kyi'n ox syent tuk'il 40 quintal q'an pwaq ex ul kyi'n tuk'il rey Salomón.