Génesis 43 - Mam Huehuetenango New Ortography

Xi q'i'n Benjamín tuj Egipto kyu'n terman

1Kukx at nim ta'w we'yaj kyib'aj xjal.

2Tej tb'aj kywa'n Jacob kyuk'ix qe tk'wa'l aju triw tzaj kyi'n tuj Egipto, xi tma'n Jacob kye tk'wa'l kyja':

—Kyxi'ye juntl maj ex kylaq'ontze ch'intl triw te qwa, chi Jacob.

3Xi tma'n Judá te tman:

—Aju xinaq tzaj tkyuwsa'nxix qeye kyja': Mi'n che ultle wuk'ile qa mi'n ma tzul kyi'ne kyitz'ine, chi xinaq.

4Qa ma txi ttzoqpi'na qitz'ine tu'n t-xi' quk'ile, jakutzun qo'xe laq'ol triw;

5qatzun mi'n ma txi ttzoqpi'na, mlayx qo'xe, tu'nju tzaj tma'n xinaq qeye kyja': Mi'n che ultle wuk'ile qa mi'n ma tzul kyi'ne kyitz'ine, chi xinaq, chi Judá.

6Tmatltzun Israel:

—¿Tiqu'n kyb'inchaye mya b'a'n lu wi'je? ¿Tiqu'n xi kyma'ne te xinaq qa attoq juntl kyitz'ine? Chi Israel.

7Xitzun kytzaq'we'n:

—Axte xinaq tzaj qaninte ti'j qten ex kyi'j qeju ate' tuj qja, chi kyja': ¿Itz'xpe kymane? ¿Atpe juntl kyermaniye? Chi xinaq. Atzun qeye xi qma'ne ik tza'nx tten. ¿Baqa o na'ne ti'j qa tu'n ttzaj tqanin tu'n t-xi qi'ne qitz'ine tuk'il? Che chi.

8Xitzun tma'n Judá te Israel aju tman kyja':

—Q'ontza ku'xun tuj nkwente. Jaku qo'x naje tu'ntzun qanq'in ex tu'ntzun mi'n qkyim, mi aya, mi qo'ye ex mi qe qk'wa'le.

9Tuj nkwente jaku ten ku'xun, ex weye ktzajel tqanina tajlal. Qa minti' ma tzul wi'ne juntl maj, qa minti' ma kub'tl nq'o'ne twitza, atzun qine at wile twitza te jumajx.

10Noqwit minti' o we'ye, mawtlo b'ant-xi kab' maj qqane ja'lo, chi Judá.

11Xitzun ttzaq'we'n Israel aju kyman kyja':

—Qa ik tten, kyb'inchamniye jlu: Kyq'onkuxe tuj kysake aqeju ti'xti tb'anilxix in che tzaj tq'o'n tx'otx', ex kyi'nxe teju xinaq te jun oyaj: kyi'nxe ch'in bálsamo, ch'in ta'l kab', ch'in perjum, ch'in tq'olil tze' mirra, ex jun b'yuj kywitz tze' b'a'n kyk'axunjtz.

12Kyi'nxe kab' maj tajlal pwaq ik tza'n xi kyi'ne tnejel maj, ex kywitzelkuye che okex q'onte pwaq aju ajtz q'o'n tuj kysake, tu'nju b'alo noq e tzpet ti'j.

13Kyuk'inxe kyitz'ine ex kyxi'ye juntl maj tuk'il xinaq lu.

14Awt Dios, aju at tipumal tu'n tb'ant tkyaqil tu'n, tz'aq'nan tuj tanmi xinaq lu tu'n ttzaj q'aq'an tk'u'j kyi'je, ex tz'etzwit ttzoqpi'n juntl kyermaniye tuk'ix Benjamín. Atzun weye, qa ma chin kyaj tene minti' nk'wa'le, malo b'ant-x, chi kyman.

15Xitzun kyi'n tky'ajal Jacob qe oyaj ex kab' maj tajlal pwaq ik tza'n tnejel maj, tuk'ix Benjamín xi kyi'n. Kub'tzun b'e kyu'n, e ku'x tuj Egipto ex e okx twitz José.

16Tej ttil José uk'intoq Benjamín kyu'n, xi tma'n te tmayordom tuj tja:

—Q'inxa qe xjal lu max njaye. B'yon kub'a jun wakẍ ex b'inchan b'aja tu'nju che wa'l qe xjal lu wuk'ile te chilkuq'ij ja'lo, chi José.

17Tb'inchatzun mayordom tkyaqil ik tza'nx otoq tma José, ex e je'x ti'n qe xjal tuj tja José.

18Atzun kye tzaj t-xob'il kyi'j tej kyxi q'i'n tja José, ex in kyma'ntoq kyxolx: Ma qo tzaj q'i'n tzalu b'alo tu'n tlaj pwaq aju aj q'o'n tuj qsak tej qaj. Ja'lo k'okel tzoqpaj qi'j ex qo okel te tmajen kyuk'ix qe qbur, che chi.

19Tejtzun kypon ttzi ja, e je'x laq'e' ttxlaj mayordom tu'n kyyolin tuk'il,

20ex xi kyma'n te kyja':

—Ay tat. Tej qul aje tnejel maj, axix tok laq'ol triw qo'ye,

21ex tej qpone tuj lugar jatum tu'n tex aq'b'il qu'ne, jaqet ttzi qsake, jatz knet pwaq ttzi t-sak teyle te junjun qeye, ex cabalx ta'toq tajlal pwaq. Ja'lo, lu ma tzul qi'ne.

22Ax ikx ma tzaj qi'ntle pwaq tu'n tlaq'et triw qu'ne. Minti' b'a'n qu'ne alkye ku'x q'onte pwaq ttzi qsake tej qul aje tnejel maj, che chi.

23Xitzun ttzaq'we'n mayordom kye kyja':

—Qe' kyk'u'je ex mi'n che xob'e. Aju Kydiose ex Tdios kymane, aloju ku'x q'onte pwaq kytzi' qe kysake. O nk'ame aju kypwaqe oktz kyq'o'ne twi triw, chi mayordom.

Etztzun q'i'n Simeón tu'n mayordom tuj pres ex xi ti'n kyuk'il qe terman.

24Jurat e okx ti'n mayordom tuj tja José, xi tq'o'n a' kye tu'n tel tx'jet kyi'j kyqan, ex xi tq'o'n kywa kybur.

25Atzun kye, b'ant tten oyaj kyu'n, ex e ayon akux nnu'l José te chilkuq'ij, tu'nju otoq kyb'i atzun tu'n kywa'n tja.

26Tejtzun tul José tja, xi kyq'o'n te qe oyaj otoq tzaj kyi'n, ex e kub' ẍmeje' twitz tejxi tpon takl tib'aj kywitz max twitz tx'otx'.

27Xitzun tqanin José kye tza'ntoq ate', ex xi tqanintl:

—¿Tza'n ta' kymane, aju tij xjal tzaj kyma'ne weye? ¿Itz'xpe? Chi José.

28E kub'tzun mok'e' twitz ex xi kytzaq'we'n:

—B'a'n ta' qmane aju ajb'el teya, ex itz'x, che chi.

29B'aj tke'yin José ex o til Benjamín aju titz'in, aju tal ttxu', ex xi tqanin kye:

—¿Apetzun kyitz'ine lu, aju kymaye weye?

Xitzun tma'n te kyja':

—Awt Dios ky'iwlante teya nky'ajal, chi José.

30Ẍib'xix pon tuj tanmi José tej ttil aju titz'in, xi tjyo'n jatum tu'n tok ten oq'el ex ax okx naj tuj tkwart, ex atzun ok ten oq'el.

31Tejtzun tb'aj oq', el ttx'jo'n twitz, etz tuj tkwart, ex xi tma'n kye tmajen: Kyq'on kub'e wab'j, chi José.

32Part o wa'n José, part o che wa'n qe terman, ax ikx part o che wa'n qe aj Egipto, aqeju ate'toq tuk'il, porke ik'b'ilxix tuj kywitz aj Egipto tu'n kykub' ten wa'l junx kyuk'il aj Hebreo.

33E kub' qe' qe terman José ik tza'nx otoq txi tma'n kye ex ik tza'nx kyab'q'iyil; tnejel kub' qe' aju tnejel tzikb'aj, ex mankb'il kub' qe' aju ch'i'p. B'i'xtzun e lab'in tu'n jlu, ex noq o b'aj kyke'yin tuj kywitz.

34Xi tq'o'n José aju chib'j tkub' twi tmes te kychi' qe terman; atzun te Benjamín jwe' maj tchi' tzaj tq'o'n twitz kye ttzik. E k'an ex e tzalaj junx tuk'il.