1At jun q'ij xi tma'n Samuel te Saúl:
—Aqine in tzaj sama'ne tu'n Qman tu'n tjaw nsk'o'na, tu'n toka te rey kye aj Israel aqeju etzan tu'n. Kyja'tzun b'intza aju in tma'n Qman teya:
2Chitzun Qman aju Tajaw Tkyaqil: Kb'el kycastiw aj Amalec wu'ne tu'n tlaj ju mya b'a'n kyb'incha kyi'j aj Israel, tu'nju e kub' ten tuj kyb'e tu'n kyok ten q'ojlel kyi'j tej kyetz tuj Egipto.
3Kyja'tzun txi'ya ex tok tzoqpaja kyi'j; xitun b'aja tkyaqilju at kye ex mi'n tzaj q'aq'an tk'u'ja kyi'j. B'yonkuya qe xinaq, qe xu'j, qe k'wa'l ex qe ne' kukx kych'u'n, ax ikx qe wakẍ, qe ẍne'l, qe chej camey ex qe bur, chi Qman.
4Xitzun tma'n Saúl tu'n kyxi txokb'aj qe xinaq, ex jaw ti'n kyajlal tuj lugar Telaim. Attoq kab'e syent mil xinaq in che b'et tu'n kyqan ex laj mil xinaq aj Judá.
5Te tib'ajxi jlu xi' Saúl tuj ju nintz tnam kye aj Amalec, ex e kub' tq'o'n qe t-soldad tuj jun tq'ab' xaq,
6ex xi tma'n kye aj Quenitas:
—Kypa'n el kyib'e, kyexe kyxol aj Amalec tu'ntzun mi'n kynaje wu'ne junx kyuk'il, porke o kyb'inchaye b'a'n kyi'j aj Israel tej lajo'ntoq kyb'e kyetzlen tuj Egipto.
Eltzun kypa'n kyib' aj Quenitas kyi'j aj Amalec.
7Oktzun tzoqpaj Saúl q'ojlel kyi'j aj Amalec ex kub' kyi'j tu'n, tzajx qe' q'oj kyu'n tuj lugar Havila, ex max pon b'aj twi' tuj lugar Shur aju tmojón tib' tuk'il Egipto.
8Tzyettzun rey Agag tu'n Saúl ex e kub' tb'yo'n kykyaqil qe t-soldad.
9Atzunte Agag minti' kub' b'yo'n tu'n Saúl ex kyu'n qe t-soldad; ax ikx minti' e kub' kyb'yo'n qe tb'anil ẍne'l, mi qe tb'anil wakẍ, mi qe tal wakẍ mas ulni kynab'l, mi qe tal ẍne'l, ex minti' e b'aj naj qe ti'xti wi'yilxix kyu'n, o'kx b'aj naj kyu'n tkyaqilju mya'xix tb'anil ex mya wi'yil.
10Tzajtzun yolin Qman tuk'il Samuel ex tma kyja':
11—Miwt ok nq'o'ne Saúl te rey, porke ma tz'el tpa'n tib' wi'je ex minti' ma japun tu'n aju yol xi nma'ne te, chi Dios.
Tu'ntzun jlu tzaj nim tb'is Samuel ex enter qonik'an o kub'san twitz Qman.
12Tejtzun qsqix tuj juntl q'ij, jaw we' Samuel primxix wen tu'n t-xi' tuk'il Saúl, ex tzaj q'ma'n te qa otoq txi' Saúl tuj lugar Carmel ex atzun ma chixin otoq jaw twab'an jun ab'j matij te nab'lte, ex tb'ajlenxi jlu txuk otoq txi' tuj Gilgal.
13Xi'tzun Samuel jatum ta' Saúl ex xi tma'n Saúl te:
—Awt Qman ky'iwlan teya. Ma japun tyol Qman wu'ne.
14Atzunte Samuel xi tqanin te:
—¿Ti t-xilen tq'ajq'ajel kywi ẍne'l ex kywi wakẍ in nb'i'ne?
15Atzunte Saúl xi tma'n:
—Max ma che tzaj qe tuj kytx'otx' aj Amalec, porke ma che kyaj kyklo'n xjal qe tb'anil ẍne'l kyuk'ix qe tb'anil wakẍ, tu'n t-xi q'ot te chojb'il te Qman Dios, atzun qe txqantl b'i'x ma che kub' qb'yo'ne, chi Saúl.
16—Mi'n q'ajta, ex kxel nma'ne teya aju saj tma'n Qman weye qonik'an may', chi Samuel.
—Yolina, chi Saúl, xi ttzaq'we'n.
17Xitzun tma'n Samuel te:
—Maske nej noq ch'in toklena tuj twitza, ex ma tz'ok q'o'na te nejenel kye kyiyjil aj Israel, ex ma tz'ok q'o'na te kyrey tu'n Qman.
18Ex at jun orden kyuwxix o txi tq'o'n Qman teya, tu'n kynaj qe aj Amalec tu'na tu'nju aj ilxix qe, ex tu'n tok tzoqpaja kyi'j max ok kykub' b'aj.
19¿Tiqu'ntzun minti' ma txi tnimana aju orden tzaj tma'n Dios teya, ex tza'n tten ma tz'ok tzoqpaja tu'n ttzaj ti'na aju ma tz'el kyi'ne kye aj q'oj, ex ma tb'inchaya mya b'a'n twitz Qman?
20Atzunte Saúl xi ttzaq'we'n:
—Ma txi nnimane aju orden tu'n Qman, ex ma japun wu'ne aju tzaj tma'n weye tu'n nb'inchanteye: Ma tzyet Agag wu'ne aju rey kye aj Amalec, ex ma tzaj wi'ne, ex ma che b'aj naj aj Amalec wu'ne.
21Ex aqe soldad ẍe tzaj q'inte qe ẍne'l ex qe wakẍ aqeju iltoq ti'j tu'n kynaj, ex aqeju mas tb'anil ma jaw kysk'o'n tu'n kykub' b'yet tuj Gilgal, ex tu'n kyxi q'ot te jun oyaj te Qman Dios, chi Saúl.
22Xitzun tma'n Samuel kyja':
—Mas b'a'n nne'l tuj twitz Qman tu'n t-xi qniman tyol twitzju tu'n t-xi qq'o'n qe chojb'il te, ex qe oyaj patun in che kub'; mas b'a'n tu'n t-xi qniman tyol ex tu'n t-xi qq'o'n qwi' ti'j ju in tma'n, twitzju tu'n kyxi qq'o'n qe chojb'il te ex kysebyil ẍne'l.
23Ax il in tb'incha'n jun xjal qa minti' in xi tniman tyol Qman ik tza'n ju mya b'a'n in tb'incha'n jun xjal b'a'n q'ijin; ex aju xjal chkyinwi' junx ta' ik tza'n jun xjal in k'ulun kywitz qe tilb'ilal. Ik tza'n teya minti' ma txi tnimana tyol Qman, ax ikxtzun te ma tz'el ik'una tu'n, tu'n mi'n ttentla te rey, chi Samuel.
Xitzun tma'n Saúl te Samuel kyja':
24—Ax tok ma chin b'inchane il, minti' ma che japun qe tmandamyent Qman wu'ne ex qe yol e tzaj tma'na weye, ex tzaj nxob'ile kywitz qe xjal ex xi nnimane aju o kyma.
25Ex in chin kub'sane twitza tu'n tkub' tnajsa'na wile ex qo' wuk'ile tu'n nk'ulune te Qman.
26Atzunte Samuel xi ttzaq'we'n te Saúl:
—Mlay chinxe tuk'ila, porke ma tz'el tik'una aju yol tzaj tma'n Qman teya, ex ja'lo ikx teya ma tz'el ik'una tu'n Qman, tu'n mi'n ttentla te rey kye aj Israel.
27Tej kyja'toq taj meltz'aj Samuel tu'n tkub' b'e tu'n, tzyet ttxa'n t-ẍjo'w tu'n Saúl, ex b'i'x xi sb'it'j ju ẍjo'w.
28Xitzun tma'n Samuel te Saúl:
—Ikxtzun ma tenb'a tkawb'ila kyxol aj Israel ja'lo, ma tz'el sb'it'un tu'n Qman. Ma tz'el ti'n teya tu'n t-xi tq'o'n te juntl t-xjalila mas b'a'n tmod ik tza'n teya.
29Porke ate Dios, aju tok te kyajwalil aj Israel, mib'an nik'an yol ex misikyer in b'aj tch'expu'n t-ximb'etz, porke mya ik tten ik tza'n jun xjal jaku b'aj tch'expu'n t-ximb'etz.
30Atzunte Saúl xi tma'n juntl maj:
—Ma chin b'inchane il, ex chin kub'sale twitza tu'n kukx tnimana weye ik tza'n rey kywitz qe kytijil xjal aj Israel, ex kywitz kykyaqil aj Israel. Kyja'tzun tzaja wuk'ile tu'n nk'ulune twitz Qman Dios.
31Ajtzun meltz'aj Samuel tuk'il Saúl ex ok ten Saúl k'ulul te Qman.
32Xitzun tma'n Samuel kye xjal:
—Kyi'ntze Agag nwitze, aju kyrey aj Amalec.
Pontzun q'i'n Agag twitz Samuel in tzalaj wen, ex ximan tu'n qa otoq tzik'x ti'j tkamik xob'ajilxix.
33Atzunte Samuel xi tma'n te:
—Tu'n t-spadiya nimku xu'j ma che kyaj tq'o'na minti' kyal, kyja'xtzun ktemb'il ttxu'ya kyxol txqantl xu'j, minti'tl tal kyjel.
Ex kub' tpaẍu'n Samuel t-ximlal Agag tuj Gilgal twitz Qman.
34Tb'ajlenxi jlu aj Samuel tuj tnam Ramá, ex atzunte Saúl aj meltz'aj tja ma tuj tnam Gabaa, aju ttanmi.
35Ex minti'tl ok tke'yin Samuel twitz Saúl juntl maj tuj tkyaqil tanq'ib'l, maske nim o b'isun Samuel ti'j Saúl. Atzunte Qman tzaj tb'is tu'nju otoq tz'ok tq'o'n Saúl te rey kyxol aj Israel.
Who We AreWhat We EelieveWhat We Do
2025 by iamachristian.org,Inc All rights reserved.
