1Xi'tzun David tuk'il pal Ahimelec tuj tnam Nob, ex b'i'x naj tnab'l pal tej tetz kanul ti'j David ex xi tma'n te:
—¿Tiqu'n saja tjunala ex mi a'l jun tuk'ila uk'in?
2Atzunte David xi ttzaq'we'n:
—Ate rey ma tzaj tma'n jun mandar weye ex ma tzaj tma'n tu'n mi a'l jun tu'n tb'inte tiqu'n ẍin tzaj sama'ne tu'n, ex alkye mandar q'i'n wu'ne. Atzun qe xinaq ate' tjaq' nkawb'ile ma kyaj nma'ne kye alkye lugar tu'n nk'ulb'ante wib'e kyuk'il.
3Atzun ja'lo: ¿ti ch'in nik'b'eb'l at tuk'ila? Q'ontza jwe' pan weye ex qa noq alkye at tuk'ila.
4Atzunte pal xi ttzaq'we'n:
—Minti' pan at wuk'ile aju noq elaj pan; at pan, ex ky'iwla'maj, jaku txi nq'o'ne teya qa iqan ti'j kyu'n qe xinaq ate' tuk'ila.
5Atzunte David xi tma'n jun yol te kyuwsab'l:
—Ik tza'n in qo etze tuj qb'eye syempr iqan ti'j qu'ne maske noq ch'in t-xilen ju qb'eye, ex aqeju xinaq ate' wuk'ile syempr iqan ti'j kyu'n, pyortzun tej xqo etze ja'lo.
6Xitzun tq'o'n pal qe pan ky'iwla'maj ex minti'toq juntl pan at tuk'il, noq o'kx ju pan ky'iwla'maj te Qman at, ex ax q'ij lu tej kyjaw q'i'n pan tib'aj altar tu'n tkub' q'o'n txqantl ak'aj pan te t-xel.
7Attoq jun tmajen Saúl otoq kyaj ten tuj tja Dios tuj q'ij lu, Doeg tb'i, aj Edom te ex nejenel kye qe tpastor Saúl.
8Xitzun tma'n David te Ahimelec:
—¿Atpe jun lans ex qa jun spad at tuk'ila? Ex tej saj tq'o'n rey aju orden weye, minti' xtaq' amb'il tu'n ttzaj wi'ne nspadiye ex qe txqantl makb'il in che ajb'en wu'ne.
9Atzunte pal xi ttzaq'we'n:
—Ax ta' t-spad Goliat wuk'ile, aju aj Filisteo kub' ti'j tu'na tuj chq'ajlaj Ela tb'i. Atzun tkub' ti'jxi kapiẍay in ajb'en kyu'n pal, tokx tuj jun piẍ xb'alun. Qa taja, b'a'n tu'n t-xi ti'na, porke o'kxku jlu at wuk'ile ex minti' txqantl.
Xitzun tma'n David te pal:
—B'alo minti' juntl mas b'a'n twitz jlu. Q'ontza, kxel wi'ne.
10Texju q'ij lu xi tlajo'n David tb'e tu'n tel oq twitz Saúl, ex pon max tuk'il Aquis aju rey tuj tnam Gat.
11Atzun qeju at kyoklen ttxlaj Aquis xi kyma'n te:
—¿Myapetzun a David jlu aju rey tuj tx'otx' ma chixin? ¿Myapetzun ti'j in kyma'ntoq xjal tej matoq in che b'itzan ex in che b'ixan, qa jun mil xjal otoq kub' tu'n Saúl atzunte David otoq che kub' laj mil tu'n?
12Tej tb'inte David qe yol lu, tzaj t-xob'il twitz Aquis aju rey tuj tnam Gat.
13Kyja'tzun kywitzx qe jlu ch'expet tmod ex ok tq'on tib' ik tza'n jun lok, ex ok ten skatil twitz tlamel ja ex ku'tz b'eqin ta'l ttzi' tuj txmaltzi'.
14Xitzun tma'n Aquis kye qeju at kyoklen ttxlaj:
—¿Minti'pe sok kyke'yine qa lok ju xinaq lu? ¿Ti tiltzun saj kyi'ne wuk'ile?
15¿Baqa minti' lok at tzalu, tu'nju ma tzaj kyi'ne juntl lok tuj njaye tu'ntzun tok nke'yine ju tlok-yil?
Who We AreWhat We EelieveWhat We Do
2025 by iamachristian.org,Inc All rights reserved.
