Deuteronomio 22 - Mam Huehuetenango New Ortography

1Qa ma kyile twakẍ jun kyxjalile ex qa t-ẍne'l otoq kyaj tzpet, mi'n noq kukx tz'ok kyke'yine, noq o'kx kyinxe tu'n tpon tuk'il kyxjalile.

2Qatzun mya kyvesine ex qa minti' ojtzqi'n kyu'ne aju tajwil alumaj, kxe'ltzun kyi'ne max kyjaye, ex ax ktel kyuk'ile. Oktzun tpon kyxjalile qanil te, kxe'ltzun kyq'o'ne.

3Ax jlu kb'antel kyu'ne ti'j jun bur, jun xb'alun ex qa noq alkyex juntl ti'xti otoq kyaj tz'aq te jun kyxjalile, qa ma che ok noje ti'j. Mi'n noq kukx tz'ok kyke'yine.

4Qa ma kyile tbur jun kyxjalile ex qa twakẍ otoq kub' tz'aq tuj b'e, mi'n tz'el kykumin kyib'e ti'j, noq o'kx tu'n kyonine tu'n tjaw twab'an.

5Mi'n tz'ok tq'o'n xu'j t-xb'alun xinaq ti'j, ax ikx te xinaq mi'n tz'ok tq'o'n t-xb'alun xu'j ti'j, porke ik'un tu'n Qman Dios aju xjal in b'inchante jlu.

6Qa ma che ok noje ti'j jun q'u' chyu'j tjax twi' jun tze' ex qa tkub' twitz tx'otx', qa ate' qe tal chyu'j tuj tq'u' ex qa tjos, ex qa b'unl kytxu' kyib'aj, mi'n tzaj kyi'ne aju kytxu' kyuk'ix qe tal;

7noq o'kx qe tal tu'n ttzaj kyi'ne, atzun kytxu' kxel kytzoqpi'ne, tu'ntzun tten b'a'n kyeye ex tu'n kyxi laq'e' tuj kyq'ije.

8Ok tjaw kyb'incha'ne jun kyjaye, il ti'j tu'n tjaw kyb'incha'ne jun tal maqb'il ti'jele twi ja, tu'ntzun mi'n ttzaj kyil qeju ate' tuj kyjaye ti'j tkamik jun xjal qa ma tzaj tz'aq twi ja.

9Mi'n ku'x kyawa'ne juntl wiq iyaj kyxol tqan uva, tu'ntzun mi'n tel q'i'n tkyaqil kyeye tu'n tajb'en tuj tja Dios, tza'nx ju iyaj otoq ku'x kyawa'ne, ax ikx twitz uva.

10Mi'n tz'ok kyq'o'ne jun bur ch'okil tuk'il jun wakẍ.

11Mi'n tz'ok kyq'o'ne kyxb'alune smo'n lan ex noq' lino tuj.

12Kyq'onke xk'alo'xin kyi'j kykyajil ttxa'n kymante tok kyi'je.

Qe ley kyi'j xinaq in kub' kymojb'an kyib' kyuk'il xu'j

13Qa at jun xinaq ma tzaj ti'n jun txin tu'n tok te t-xu'jil, ex qa ma tz'el tik'un toklenxi moje' tuk'il,

14qa ma tz'ok ten yolil mya b'a'n ti'j ex qa ma tma' kyja': In moje'ye tuk'il xu'j lu, ex tej nmoje'ye tuk'il el nnik'e ti'j otoq til xinaq, qa chi,

15atzun kye tman txin kxel kyi'n jun yek'b'il kywitz qe tij xjal te tnam, tu'n kyyek'unte qa na'nxtoq ttil txin xinaq;

16ex kxel tma'n tman txin kye tij xjal kyja': Xi nq'o'ne nme'jele te t-xu'jil xinaq lu, atzun ja'lo minti'tl tgan ti'j

17ex in tma'n qa at tpaltil ex qa otoq tilxi nme'jele xinaq, ex lu yek'b'il q'i'n wu'ne tu'n tyek'unjtz ax tok na'nxtoq ttil nme'jele jun xinaq, chi tman txin kxel tma'n. Ex kb'el kylik'un xb'alun kywitz qe tij xjal te tnam.

18Ktzajeltzun kytzyu'n qe tij xjal aju xinaq lu, ex kb'el kyq'o'n tcastiw,

19k'elel kyi'n syen saq pwaq tmult tu'n t-xi q'ot te tman txin, tu'n tlaj otoq yolin mya b'a'n ti'j jun txin aj Israel b'ajxtoq til xinaq; ex ax xu'j lu k'okel te t-xu'jil, ex mlay kub' tpa'n tib' tuk'il xu'j tuj tkyaqil tanq'ib'l.

20Qatzun ax tok otoq tilxi txin xinaq,

21k'eletztzun kyi'n ttzi tlamel tja tman, ex k'okel xo'n ab'j ti'j kyu'n qe tij xjal te tnam tu'ntzun tkyim, tu'nju otoq tb'incha jun mya b'a'n ma'xix kyxol aj Israel ex otoq yaẍin tuj tja tman. Kyja'tzun ktelb'a tu'n tnaj mya b'a'n kyxole.

22Qa at jun xinaq ma tz'el knet in tan tuk'il jun xu'j mejeb'ni, kykab'il che b'el byet. Kyja'tzun ktelb'a tu'n tnaj mya b'a'n kyxole, aqeye aj Israel.

23Qa at jun txin na'nxtoq ttil xinaq ex otoq b'ant ti'j tu'n tmoje', qa ma tz'ok noj juntl xinaq ti'j tuj tnam, ex qa ma kub' tan tuk'il,

24kykab'iltzun che xel q'it ttzi tlamel tnam, ex che okel xo't tu'n ab'j tu'n kykyim. Kymel txin tu'n tlaj minti' jaw sch'in ex tuj tnam ta'toq, ex kymel xinaq tu'n tlaj otoq kub' tmojb'an tib' tuk'il t-xu'jil tuk'il. Kyja'tzun ktelb'a tu'n tnaj mya b'a'n kyxole.

25Qatzun at jun xinaq ma tz'ok noj ti'j jun txin tuj kojb'il ex qa otoq b'ant ti'j tu'n tmoje' txin, ex qa ma tz'ok tq'o'n il ti'j tu'n tkub' tan txin tuk'il, o'kx te xinaq lu kb'el b'yet, aju otoq kub' tan tuk'il txin.

26Atzunte txin mi'n kub' b'yet, porke minti' otoq tb'incha jun il tu'n tkyim. Junx ta' jlu ik tza'n jun xinaq nno'k tzoqpaj ti'j juntl ex in kub' tb'yo'n,

27tu'nju otoq tz'ok noj ti'j txin tjunalx ta'toq tuj kojb'il, ex maske jaw sch'in, ex mi a'l jun jaku kolin ti'j.

28Qa at jun xinaq ma tz'ok noj ti'j jun txin na'nx ttil xinaq ex minti' ttrat tuk'il juntl tu'n tmoje', qa ma tz'ok tq'o'n il ti'j tu'n tkub' tan txin tuk'il, ex qa ma che el knet,

29ate xinaq lu kxel tq'o'n 50 saq pwaq te tman txin; il ti'j tu'n tjaw t-xu'jla'n, tu'nju otoq kub' tmojb'an tib' tuk'il, ex mi'n kub' tpa'n tib' tuk'il tuj tkyaqil tanq'ib'l.

30Mi jun xinaq kjawil t-xu'jla'n t-xu'jil tman, mi tu'n tkub' tan tuk'il t-xu'jil tman.