1Tzaj yolin Qman tuk'il Moisés ex tma:
2Atzun qe ley lu tu'n t-saqset jun xjal yab' tu'nju tx'a'k minti' q'anb'il ti'j: Kxel q'it xjal yab' tuk'il pal,
3atzunte pal k'elex ti'jxi campament tu'ntzun tb'aj tke'yin. Qa ma til pal otoq b'anix xjal tu'n tx'a'k minti' q'anb'il ti'j,
4kxel t-sama'n jun xjal lolte kab'e tal chyu'j itz'x qe, kyxol qeju mya tz'il qe, tuk'ix jun piẍ tze' wi'ten, tuk'ix jun piẍ xb'alun kyaq ke'yin ex jun wiq tal k'ul hisopo, tu'ntzun t-saqset xjal yab'.
5Kxel tma'n pal tu'n tkub' b'yet jun tal chyu'j tib'aj jun k'il tx'otx' ttx'otx'il at a' tuj, ex aju a' lu ktzajel q'it max ti'j a' saq in b'et.
6Ktzajeltzun ti'n pal aju tal chyu'j itz'x, tuk'ix tze' wi'ten, tuk'ix xb'alun kyaq ke'yin ex tuk'ix tal k'ul hisopo, ex che b'elex tmu'n tuj tchk'el tal chyu'j otoq kub' b'yo'n tib'aj a' otoq tzaj q'i'n ti'j a' in b'et.
7Wuq maj kxel ttx'ito'n pal chik' lu tib'aj xjal ksaqsetel te tx'a'k minti' q'anb'il ti'j, ex kxe'ltzun tma'n qa otoq saqix xjal lu. Atzunju tal chyu'j itz'x kxel ttzoqpi'n tuj kojb'il.
8Aju xjal ksaqsetel, kjawitz ttx'jo'n ti'j t-xb'alun, ax ikx te kchil ex k'elel tmatzo'n tkyaqil t-xmatz tu'ntzun t-saqix. Te tib'ajxitzun, b'a'n tu'n tokx tuj campament, ex il ti'j tu'n tkyaj ten wuq q'ij ti'jxi tja.
9Tujtzun twuqin q'ij k'elel k'oẍit ti'j twi', ex k'elel ti'n t-xmatz kyuk'ix qe t-xi'witz ex tkyaqil xya'n tok ti'j, kjawitz ttx'jo'n kyi'j qe t-xb'alun, ax ikx il ti'j tu'n tchin, ex ksaqseteltzun.
10Tujtzun twajxaqin q'ij, ktzajel ti'n kab'e tal tman ẍne'l minti' kypaltil, tuk'ix jun tal ttxu ẍne'l ma te jun ab'q'i, ax ikx minti' tpaltil; tuk'ix qaq libr arin tb'anilxix ex kab'e octav tuk' mey chib'j aseyt, te jun oyaj ti'j twitz awal xyoq'amaj tuk'il aseyt.
11Aju pal ksaqsalte xjal kb'el tq'o'n aju xjal twitz Qman, kyuk'ix qe toyaj, ttzi ja xb'alun te mojb'ab'l tib'il.
12Ktzajeltzun ti'n pal jun tal tman ẍne'l, ex kxel tq'o'n junx tuk'il kab'e octav tuk' mey aseyt te chojb'il tpaltil xjal, ex kxel tyukun te jun oyaj yukun in xi' twitz Qman.
13Atzun kb'el tb'yo'n tal tman ẍne'l tuj lugar xjansamaj jatum in che kub' b'yo'n qe alumaj te chojb'il il ex qe oyaj patun in che kub'. Aju chojb'il ti'j tpaltil xjal, te pal k'ajb'el, ik tza'nx in tenb'a ju chojb'il ti'j il. A jlu xjanxix qe.
14Te tib'ajxi ktzajel ti'n pal ch'in tchk'el tal tman ẍne'l, aju otoq txi q'ot te chojb'il tpaltil xjal, ex k'okel t-su'n ch'in ti'j tje' t-ẍkyin xjal tuj tb'anq'ab', aju ksaqsetel, tuk'ix ti'j tal tman tb'anq'ab' ex ti'j tal tman tqan tuj tb'anq'ab'.
15Ktzajel ti'n pal ch'in aseyt ex kb'el tq'o'n tuj tlaqil tq'ab' tuj tnayaj;
16ex kb'elex tmu'n twi' tal tb'anq'ab' tuj aseyt at tuj tlaqil tq'ab' tuj tnayaj, ex tu'nx twi' tal tq'ab' kxel ttx'ito'n aseyt wuq maj twitz Qman.
17Ti'j aseyt kyjel tentl tuj tq'ab' pal, k'okel t-su'n ch'in ti'j tje' t-ẍkyin xjal tuj tb'anq'ab', aju ksaqsetel, tuk'ix ti'j tal tman tb'anq'ab' ex ti'j tal tman tqan tuj tb'anq'ab', ax jatum otoq tz'ok q'ot tchk'el alumaj, aju otoq txi q'ot te chojb'il ti'j tpaltil xjal,
18ex aju aseyt kjel ten tuj tlaqil tq'ab' pal, kb'el tqo'n tuj twi' xjal ksaqsetel. Kyja'tzun kchjetel til xjal twitz Qman tu'n pal.
19Ex kb'el tb'yo'n pal aju tal tman ẍne'l te chojb'il il, tu'ntzun t-saqset xjal tz'iltoq ta'; ex te tib'ajxi kb'el tb'yo'n aju alumaj te oyaj patun in kub',
20ex kb'el tq'o'n tib'aj altar, junx tuk'il oyaj ti'j twitz awal. Kyja'tzun kchjetel til xjal tu'n pal twitz Qman, ex ksaqseteltzun.
21Qatzun meb'a te xjal yab' ex minti' tumel tu'n ttzaj tq'o'n tkyaqil jlu, ktzajeltzun ti'n junx tal tman ẍne'l te chojb'il tpaltil, ex kxel toyin te Qman te jun oyaj yukun in xi' tu'ntzun tchjet til, tuk'ix kab'e libr arin aju mas tb'anil xyoq'amaj tuk'il aseyt, te jun oyaj ti'j twitz awal, tuk'ix kab'e oktav tuk' mey aseyt,
22kyuk'ix kab'e ẍpo'q ex qa kab'e tal paloma, noq alkye jaku laq'et tu'n, jun te chojb'il il ex juntl te oyaj patun in kub'.
23Tuj twajxaqin q'ij kxel ti'n tkyaqil jlu tuk'il pal, te saqsab'l te; ex kxel tq'o'n twitz Qman ttzi ja xb'alun te mojb'ab'l tib'il.
24Atzunte pal ktzajel ti'n tal tman ẍne'l te chojb'il tpaltil xjal, tuk'ix kab'e oktav tuk' mey aseyt, ex kxel tyukun twitz Qman te jun oyaj yukun in xi'.
25K'okex tqesin tjaq' tqul tal tman ẍne'l te chojb'il tpaltil xjal, ktzajel ti'n ch'in tchk'el tal tman ẍne'l, ex k'okel t-su'n ch'in ti'j tje' t-ẍkyin xjal tuj tb'anq'ab', aju ksaqsetel, tuk'ix ti'j tal tman tb'anq'ab' ex ti'j tal tman tqan tuj tb'anq'ab';
26ex ktzajel ti'n pal ch'in aseyt ex kb'el tq'o'n tuj tlaqil tq'ab' tuj tnayaj,
27ex wuq maj kxel ttx'ito'n twitz Qman tu'nju tal tb'anq'ab' aju aseyt tkub' tuj tlaqil tq'ab' tuj tnayaj.
28Ax ikx aju xjal ksaqsetel, k'okel t-su'n pal ch'in aseyt ti'j tje' t-ẍkyin tuj tb'anq'ab' ex ti'j tal tman tb'anq'ab' ex ti'j tal tman tqan tuj tb'anq'ab', ax jatum otoq tz'ok su'n tchk'el alumaj te chojb'il ti'j tpaltil xjal.
29Atzunju aseyt kyjel ten tuj tlaqil tq'ab' pal, kb'el tqo'n pal tuj twi' xjal ksaqsetel. Kyja'tzun kchjetel til xjal twitz Qman tu'n pal.
30Kxe'ltzun tq'o'n pal aju ẍpo'q ex qa paloma noq alkye otoq knet tu'n xjal ksaqsetel,
31jun kxel tq'o'n te chojb'il il, atzun juntl te oyaj patun in kub', ex part oyaj ti'j twitz awal. Kyja'tzun kchjetel til xjal twitz Qman tu'n pal ex ksaqsetel.
32Atzun qe ley lu kyi'j qe xjal yab' tu'n tx'a'k minti' q'anb'il ti'j, aqeju minti' tumel tu'n t-xi kyq'o'n jun kyoyaj matij te saqsab'l kye.
Qe ley tu'n kysaqset qe ja at q'ux kyuj33Tzaj yolin Qman tuk'il Moisés ex tuk'il Aarón, chi kyja':
34Ok kyokxe tuj tx'otx' Canaán, aju kxel nq'o'ne te kyetzb'ile, qa ma txi nq'o'ne amb'il tu'n tjaw jlet q'ux tuj kyjaye tuj tx'otx' jatum che najalaye,
35aju xjal tajaw ja kxe'l tuk'il pal, ex kxel tma'n te kyja': Mer ik tza'n nib'an tjaw jlet q'ux tuj njaye.
36Atzunte pal kxel tma'n tu'n tetz q'i'n tkyaqilju at tuj ja na'nxtoq tokx pal tuj, tu'ntzun mi'n kytz'ilix kykyaqil ti'xti at tuj. Te tib'ajxitzun k'okex pal ke'yilte q'ux.
37Oktzun tb'aj tke'yin pal aju q'ux, ex qa ma til tik'len q'ux twitz ja cha'xyin ke'yin ex qa kyaqyin ke'yin, ex qa otoq tz'okx lo'n twitz ja tu'n,
38k'eletz pal tuj ja ex kyjel tlamo'n ja wuq q'ij.
39Tujtzun twuqin q'ij kxe'l pal ke'yilte juntl maj, ex qatzun otoq tz'el laq'e' q'ux twitz ja,
40kxe'ltzun tma'n tu'n kyel q'i'n qe ab'j at q'ux kyi'j, ex tu'n kyex xo't ti'jxi tnam tuj jun lugar tz'il.
41Ax ikx kxel tma'n tu'n tel jaqut tkyaqil twitz ja te tujxi, ex aju quq k'elel ok tel jaqut twitz ja, k'elex xo't ti'jxi tnam tuj jun lugar tz'il.
42Ktzajeltzun q'it txqantl ab'j te kyxel qeju otoq che el q'i'n, ex ktzajel q'it ak'aj mescla tu'n tok q'ot repey twitz tkajonil ja.
43Qatzun ma jaw jlet juntl maj q'ux tuj ja kyel-lenxi q'it qe ab'j, tel-lenxi jaqut twitz ja ex toklenxi ak'aj repey ti'j,
44k'okextzun juntl maj pal ke'yilte. Qatzun otoq tz'el laq'e' q'ux tuj ja, xob'ajiltzun te q'ux lu, ex aju ja lu tz'il ta'.
45Kyja'tzun il ti'j tu'n tkub' xitit ja lu, ex kykyaqil ab'j, tkyaqil tze' ex tkyaqil ttx'aqan repey k'elex xo't ti'jxi tnam tuj jun lugar tz'il.
46Qa at jun xjal ma tz'okx tuj ja tuj q'ij tej lamo'ntoq tu'n pal, k'okel xjal lu te tz'il, ex max k'okel te saq okxi ttzaj qlolj.
47Qa at jun ma wa'n ex qa ma tan tuj ja lu, il ti'j tu'n tjatz ttx'jo'n ti'j t-xb'alun tu'ntzun t-saqix.
48Oktzun tokx pal ke'yilte ja, qa ma til minti' otoq tz'el laq'e' q'ux tb'ajlenxi q'ot repey ti'j, kxel tma'n pal qa saq ta' ja, porke aju q'ux otoq kub' naj.
49Tu'n t-saqset ja lu, ktzajel ti'n pal kab'e tal chyu'j tuk'ix jun piẍ tze' wi'ten, tuk'ix jun piẍ xb'alun kyaq ke'yin ex jun wiq tal k'ul hisopo.
50Kb'el tb'yo'n jun tal chyu'j tib'aj jun k'il tx'otx' ttx'otx'il tku'x a' tuj, aju a' lu ktzajel q'it ti'j a' saq in b'et.
51Ktzajeltzun ti'n pal tze' wi'ten tuk'ix tal k'ul hisopo, tuk'ix jun piẍ xb'alun kyaq ke'yin ex tal chyu'j itz'x, ex che b'elex tmu'n tuj tchk'el tal chyu'j otoq kub' b'yo'n, ex tuj a' otoq tzaj q'i'n ti'j a' saq in b'et, ex kxel ttx'ito'n wuq maj ti'j ja.
52Kyja'tzun ksaqsetel ja tu'n tchk'el tal chyu'j ex tu'n a' otoq tzaj q'i'n ti'j a' saq in b'et, tu'n tal chyu'j itz'x, tu'n tze' wi'ten, tu'n tal k'ul hisopo ex tu'nju xb'alun kyaq ke'yin.
53Te tib'ajxi kxel ttzoqpi'n pal tal chyu'j itz'x ti'jxi tnam tuj kojb'il, ex kyja'tzun tten kjapunel aju at tu'n tb'ant tu'n t-saqset jun ja.
54Atzun qe ley lu kyi'j kykyaqil txkaj tx'a'k minti' q'anb'il kyi'j, ti'j sal,
55ti'j sb'ak nno'k ten ti'j xb'alun, ti'j q'ux ti'j ja,
56ti'j mal in jaw ti'j xjal, ti'j tx'a'k in jlet poj tuj ex kyi'j manch saq ke'yin;
57tu'ntzun tel kynik'e ti'j alkye saq ex alkye tz'il. Atzun qe ley lu ti'j tx'a'k minti' q'anb'il ti'j ex ti'j sb'ak ex q'ux.
Who We AreWhat We EelieveWhat We Do
2025 by iamachristian.org,Inc All rights reserved.
