2 Reyes 7 - Mam Huehuetenango New Ortography

1Atzunte Eliseo xi ttzaq'we'n:

—B'intza aju tyol Qman chi in tma'n: Ax or jlu nchi'j, barat ktel twi arin ttzi tlamel tnam Samaria, noq jun saq pwaq twi' jun alm, ax ikx sebad noq jun saq pwaq twi' kab'e alm.

2Atzunte xjal onil te rey xi ttzaq'we'n te t-sanjel Dios:

—Maske che jaqet qe tventanil kya'j tu'n Qman, ex baqa jaku tzul twi k'aẍjel ik tza'n ma tmaya.

Atzunte Eliseo xi ttzaq'we'n:

—Ok tila'ya tu'n twitza, ex teya mlay wa'na ti'j, chi Eliseo.

3At kyaje xjal at tx'a'k kyi'j minti' q'anb'il ti'j ate' ttzi tlamel tnam, in kyma'n kyxolx:

—¿Ti in b'ant qu'n noq q'uqlqo tzalu, noq in qo ayon ti'j tu'n qkyim?

4Qa ma kub' qximan tu'n qokx tuj tnam qo kymel, tu'nju at nim we'yaj tuj tnam; ex qa ax ma qo kub' qe' tzalu, ax ikx qo kymel. Mejor qo' tuj campament jatum ate' qe soldad aj Siria; qa minti' ma qo kub' b'yo'n kyu'n, qo anq'il; ex qa ma qo kub' b'yo'n, malo b'ant-x qkyim.

5Kyja'tzun, tej tok qax e jaw we' ex kub' b'e kyu'n tu'n kypon tuj campament jatum ate'toq qe soldad aj Siria; ex tej kypon laq'e' niqayin, o kyil mi jun xjal at.

6Ex tb'incha Qman tu'n kyb'inte qe kysoldad aj Siria tq'ajq'ajel carwaj in che ajb'en tuj q'oj, tuk'ix tq'ajq'ajel kyqan chej kyjax soldad kyib'aj, ex kyuk'ix nimku soldad. Tu'ntzun jlu kub' kyximan aj Siria qa ate rey kye aj Israel otoq txi tq'o'n pwaq kye qe rey kye aj Heteo, ex kye qe rey kye aj Egipto, tu'n kytzaj ex tu'n kyok tzoqpaj kyi'j.

7Kyja'tzun, tej tok qax, e jaw we' ex e je'l oq, ex ax kyaj kyq'o'n kyja, xb'alun ja, kyuk'ix qe kychej ex qe kybur, ex kyaj kykolin tkyaqil ik tza'nx tten, tu'ntzun kykolpaj ex tu'n mi'n kynaj.

8Tejtzun kypon qe kyaje xjal at tx'a'k kyi'j tuj campament jatum otoq che ten qe soldad aj Siria, e okxtzun tuj jun xb'alun ja, e ok ten wa'l ex k'al; etz kyi'n saq pwaq ex q'an pwaq ex xb'alun, ex e je'x ewal te. E aj juntl maj, ex e okx tuj juntl xb'alun ja, ax ikx kyb'incha, etz kyi'n qe ti'xti, ex e je'x ewal te.

9Ex ul tuj kyximb'etz ex kyma:

—Mya tuj tumel aju in qb'incha'n. Aju q'ij lu jun q'ij tu'n t-xi q'ot jun b'a'n tqanil, ex atzun qe minti' in qq'o'n tqanil. Qa ma kub' qyo'n te nchi'jxi, at qil ti'j jlu. Mejor qo' ma tja rey q'malte tqanil.

10E ultzun, ex tzaj kytxko'n qe kwentil tnam ex xi kyma'n kye:

—Ma qo'x aje tuj campament jatum ate'toq qe soldad aj Siria, ex mi jun xjal at, ex minti' tq'ajq'ajel twi' jun xjal in yolin. O'kx qe chej ex qe bur k'alo'n, ex qe xb'alun ja ate' qe ik tza'nx kyten.

11E je'xtzun qe xq'uqil ttzi tlamel tnam q'malte tqanil kyuk'il qeju ate' tuj tja rey.

12Jawtzun we' rey, maske te qonik'an, ex xi tma'n kye qeju at kyoklen ttxlaj:

—Kxel nchik'b'a'ne kyeye aju ma kub' kyximan qe aj Siria qi'j. B'a'ntl kyu'n in qo yajlanjtz tu'n we'yaj, kyja'tzun ma che ex tuj campament jatum ate' qe, ma txi kyewan kyib' tuj kojb'il, ex in che ayon qi'j tu'n qex tuj tnam tu'ntzun qtzyet kyu'n itz'x qo', ex tu'n kyoktz tuj tnam, chi rey.

13Ex o tma jun kyxol qeju at kyoklen ttxlaj rey:

—E kytzaj q'it jwe' chej kyxol qeju itz'x qe, e kyxi samet junjun xinaq kyib'aj, ex oktzun qila' ti ma b'aj. Qa tu'n kyanq'in ex qa tu'n kykyim qeju che xel samet, ex mya mas b'a'n ex mya mas ploj te kye kywitz txqantl aj Israel, aqeju che najel ok kykyaj ten tzalu.

14E tzajtzun q'i'n kab'e carwaj kyuk'ix qe chej te jawolte kye, e je'xtzun sama'n tu'n rey tu'n kyxi lpe' kyi'j qe soldad aj Siria, ex xi tma'n kye yukul kye carwaj tu'n tb'aj kyke'yin jatum ate' qe.

15E je'xtzun, ex ax e je'x lpe' ti'j texlen kyqan aj Siria tejxi kypon ttzi nima Jordán, ex o kyil tuj tkyaqil b'e at nim xb'alun tuk'ix txqantl ti'xti otoq kyaj tz'aq kyu'n aj Siria, tu'n tlaj noq elakyim e je'l oq qe tu'n kykolpaj. E ajtztzun meltz'aj qe xjal otoq che'x t-sama'n rey, ex xi kytx'olb'a'n te rey ti'j tkyaqilju otoq kyil tuj b'e.

16Atzun qe xjal tuj Samaria e je'x naj, ex tzaj kyi'n tkyaqilju o knet kyu'n tuj kycampament aj Siria. Ex atzun o japun ju yol otoq tma Qman, o k'ayinjtz arin tu'n jun saq pwaq twi' jun alm; ex jun saq pwaq twi' kab'e alm sebad.

17Xitzun tma'n rey te xjal aju at toklen ttxlaj tu'n tkub' ten kwentil ttzi tlamel tnam, ex b'i'x kyaj tjaq' kyqan xjal ttzi tlamel tnam, ex axtzun kyim, ik tza'nx otoq tma t-sanjel Dios tej t-xi aj rey tuk'il.

18Kyja'tzun tten o b'ant jlu ik tza'nx otoq tma t-sanjel Dios te rey, tej tmante qa ttzi tlamel tnam Samaria tu'n tlaq'et jun alm arin noq tu'n jun saq pwaq twi', ex noq tu'n jun saq pwaq tu'n tlaq'et kab'e alm sebad.

19Ex atzunte xjal aju at toklen ttxlaj rey otoq txi ttzaq'we'n te t-sanjel Dios: Maske che jaqet qe tventanil kya'j tu'n Qman, ex baqa jaku b'ant ik tza'n in tma'na, chi xjal. Atzunte Eliseo xi tma'n te qa attoq tu'n tik' twitz ti'j, ex mya ajun tu'n twa'n ti'j.

20Ex o japun ikju, porke b'i'x o kyaj tjaq' kyqan xjal ttzi tlamel tnam, ex b'i'x kyim.