1Tb'ajlenxi jlu ch'iy kyajlal okslal. Ex tzaj jun kyyol qe judiy b'a'n che yolin tuj griego kyi'j qe judiy b'a'n che yolin tuj hebreo, tu'nju minti' pon k'a'chb'il kye meb'a xu'j ate' kyxol ok in sipanjtz wab'j junjun q'ij.
2Atzun kye kab'laj apostol ok kychmo'n kykyaqil okslal ex xi kyma'n kye:
—Mya tuj tumel tu'n tkyaj tuj qkwente aju k'a'chb'il kye okslal ex tu'n t-xi qkoline tu'n t-xi qpakb'a'ne tyol Dios.
3Kyja'tzun erman, kysk'o'n jawe wuq xinaq kyxole, b'a'nxix kyten, ex nojni tuj kyanmi tu'n Xewb'aj Xjan, ex at kynab'l, tu'ntzun kyok qq'o'ne ti'j ju aq'untl lu.
4Atzun qeye, o'kx qaq'une tu'n qna'ne Dios ex tu'n t-xi qq'o'ne xnaq'tzb'il ti'j tyol Dios, che chi apostol.
5B'a'ntzun ela ju yol lu tuj kywitz kykyaqil okslal; ex jaw sk'o'n Esteban kyu'n, at-xix tokslab'l xinaq lu ex nojni tuj tanmi tu'n Xewb'aj Xjan, tuk'ix Felipe, tuk'ix Prócoro, tuk'ix Nicanor, tuk'ix Timón, tuk'ix Parmenas, ex tuk'ix Nicolás aju aj Antioquía, aju otoq toksla kyley xjal judiy.
6E pontzun kyi'n kywitz apostol; atzun kye apostol e ok ten na'l Dios kyi'j, ex kub' kyq'o'n kyq'ab' tib'aj kywi'.
7Ex in ch'iyxi tyol Qajaw, ex in chmet-xi nimxix kyajlal okslal tuj Jerusalén; ax ikx nimku pal kye judiy xi kyoksla'n aju okslab'l lu.
Tej ttzyet Esteban kyu'n xjal8Atzunte Esteban nim t-xtalb'il Dios tkub' tib'aj ex at tipumal Dios tuk'il, ex e tb'incha qe b'inchb'en nim kyipumal ex qe señ kyxol xjal.
9E jaw tzoqpaj junjun xinaq at kyoklen tuj ja te k'ulb'il tok tb'i ja kye xjal Tzoqpi'maj qe, kyuk'ix junjun aj Cirene, ex kyuk'ix junjun aj Alejandría, kyuk'ix junjun aj Cilicia ex kyuk'ix junjun aj Asia, e ok ten yolil ti'j tley Moisés tuk'il Esteban.
10Ex minti' b'ant tu'n tmaqet tyol Esteban kyu'n, ex tzaj tq'o'n Xewb'aj Xjan tnab'l tza'n tten tu'n tyolin.
11Tu'n jlu e chjet junjun xjal kyu'n tu'n t-xi kyma'n kyja': Ma qb'iye in yolin jlu mya b'a'n ti'j Moisés ex ti'j Dios, che chi.
12Kyja'tzun e jaw tilj xjal kyu'n kyuk'ix qe kytijil xjal ex kyuk'ix qe xnaq'tzal ti'j ley; e pon tilj ti'j Esteban, tzyettzun kyu'n, ex xi kyi'n kywitz Aj Sanjelal kye xjal judiy.
13Ex ok kyq'o'n junjun testiw nik'al yol tu'n t-xi kyma'n kyja':
—Ate xjal lu kukx tyolin ex kukx t-xmayin ti'j tja Dios xjan te ex ti'j tley Moisés.
14Porke ma qb'iye in tma'n qa tu'n tkub' xitj tja Dios lu tu'n Jesús aj Nazaret ex tu'n kych'expet qe costumr tu'n, aqeju e kyaj tq'o'n Moisés qe, che chi testiw nik'al yol.
15Kykyaqiltzun aj sanjelal q'uql qe'toq, tej tok kyke'yin twitz Esteban, o kyil twitz ik tza'n twitz jun anjel.
Who We AreWhat We EelieveWhat We Do
2025 by iamachristian.org,Inc All rights reserved.
