Hechos 14 - Mam Huehuetenango New Ortography

Tej kypakb'an Pablo tuk'ix Bernabé tuj tnam Iconio

1Junxtzun e okx Pablo tuk'ix Bernabé tuj ja te k'ulb'il kye xjal judiy tuj tnam Iconio, e yolintzun tuj tumelxix, kyja'tzun e okslan nim xjal, qe xjal judiy ex qe xjal mya judiy.

2Atzun kye xjal judiy mya okslal qe, b'aj kytzpet-sa'n kynab'l txqantl xjal mya judiy qe tu'n kyq'ojin kyi'j erman.

3Kyja'tzun ax e ten apostol nim q'ij, in che yolin minti' in che xob', q'uql kyk'u'j ti'j Qajaw; ex tzaj tyek'un Qajaw qa ax tok ju yol ti'j t-xtalb'il Dios, tzaj tq'o'n kyoklen apostol tu'n kyb'inchanjtz qe señ ex qe b'inchb'en nim kyipumal.

4Atzun kye xjal tuj tnam attoq jun pab'l tib' kyxol; jun k'loj in che ok lpe' kyi'j qe xjal judiy, ex juntl k'loj kyi'j apostol.

5Tu'n jlu b'ant ti'j kyu'n xjal judiy kyuk'ix txqantl xjal mya judiy qe ex qe nejenel kyxol, tu'n kyyajlanjtz apostol kyu'n ex tu'n kyok kyxo'n tu'n ab'j.

6Ex tej kyb'inte apostol jlu, e ex oq e pon tuj tnam Listra ex tuj tnam Derbe, ex kyuj txqantl tnam ti'jele, atzun ate' tnam lu tuj tx'otx' Licaonia,

7ex atzun e pakb'an ti'j tqanil kolb'il.

Tej tok xo'n Pablo tu'n ab'j tuj tnam Listra

8Ex at jun xjal aj Listra minti' tipun tqan tu'n tb'et, q'uqltoq porke kox titz'jlenx, ex minti' b'ant ch'in tb'et.

9Tb'itzun xjal lu in yolin Pablo, atzunte Pablo ok tke'yinxix, ex tej tlonte qa at tokslab'l xjal tu'n tb'anix,

10jaw tq'ajq'ajel twi' Pablo kyuw ex tma:

—We'ktza, jiqumanx ti'ja, chi Pablo.

Atzunte kox jaw t'ikpaj ex ok ten b'etel.

11Tejtzun kyke'yinte xjal aju tb'incha Pablo, e jaw sch'in in kyma'n tuj kyyol xjal aj Licaonia:

—Ma che k'u'l dios quk'ile, ik che ke'yin ik tza'n qe xjal.

12Oktzun kyq'o'n tb'i Bernabé Júpiter, atzunte Pablo ok kyq'o'n tb'i Mercurio, tu'nju ate Pablo o yolin.

13Atzun tja dios Júpiter tkub' ttxa'n tnam; atzunte pal teju dios Júpiter pon ti'n kab'e tor tuk'ix b'ech ttzi tlamel tnam, ex o tajb'e pal ex qe xjal tu'n kykub' qe wakẍ te jun oyaj kywitz apostol.

14Tejtzun kyb'inte Bernabé tuk'ix Pablo jlu, el kysb'it'un kyxb'alun, e okx qelan kyxol xjal ex jaw tq'ajq'ajel kywi' kyuwxix:

15—Aqeye xinaq. ¿Tiqu'n in kyb'incha'ne jlu? Ikx qeye xjal qo'ye ikx tza'n kyeye, ex in xi qpakb'a'ne kyeye tu'n tkyaj kyq'o'ne aju noqx gan, ex tu'n kyok lpe'ye ti'j Dios itz', aju b'inchante kya'j tuk'ix tx'otx' ex tkyaqilju at twitz, tuk'ix mar ex tkyaqilju at tuj.

16Kyuj qe tq'ijlalil ojtxi xi tq'o'n Dios amb'il kye kykyaqil xjal tu'n kyb'et tuj kyex kyb'e;

17ex minti' kyaj ten Dios minti'wt testiw ti'j, ex tzaj tq'o'n aju b'a'n kye, ex in ku'tz tq'o'n jb'al qib'aj, ex in tzaj tq'o'n tq'ijlalil tu'n tchmet qawal, ex in tzaj tq'o'n qwa tu'n ttzalaj qanmi, che chi apostol xi kyma'n kye xjal.

18Penitzun e mayet qe xjal kyu'n apostol tu'nju yol lu, tu'n mi'n tkub' kyb'yo'n qe wakẍ te jun oyaj kywitz apostol.

19E ultzun junjun xjal judiy tzajni qe tuj Antioquía ex tuj Iconio, kub' ti'j kynab'l xjal kyu'n, oktzun xo'n Pablo tu'n ab'j kyu'n; ex ex kyjawo'n ti'jxi tnam, tuj kynab'l qa otoq kyim.

20Ex b'aj kytxolb'a'n kyib' okslal ti'j, atzunte Pablo jaw we' ex okx tuj tnam; ex te juntl q'ij ex tuj tnam tuk'ix Bernabé, pon tuj tnam Derbe.

21Xi kypakb'a'n tqanil kolb'il tuj tnam Derbe, ex nim xjal e okslan; e ajtztzun meltz'aj qe apostol tu'n kyul tuj tnam Listra, ex tuj tnam Iconio, ex tuj tnam Antioquía.

22In kykyuwsa'ntoq kyanmi qe okslal, ex in kyq'o'ntoq kynab'l tu'n kywe'xix tuj kyokslab'l, ex in kyma'n qa ilxix ti'j tu'n ttzaj nim yajb'il qe, tu'ntzun qokx tuj tkawb'il Dios.

23Ex oktzun kyq'o'n kyoklen anciano kyxol okslal tuj junjun tnam, ex kyb'ajlenxi na'n Dios ex tkub'lenxi kyyo'n we'yaj, kyajtzun kyoqxenan tuj tq'ab' Qajaw, aju otoq che okslan ti'j.

Tej tul meltz'aj Pablo tuk'ix Bernabé tuj Antioquía tuj tx'otx' Siria

24E ik'xtzun tuj tx'otx' Pisidia, e pon tuj tx'otx' Panfilia.

25Ex t-xilenxi kypakb'a'n tyol Dios tuj tnam Perge, e ku'pun tuj tnam Atalía.

26E etztzun tuj tnam Atalía, e okx tuj barc tu'n kypon tuj tnam Antioquía, atzun tzaj xe't kyaq'un tuj tnam lu nej, ex ok na'j Dios kyi'j tu'n ttzaj tq'o'n Dios t-xtalb'il kye tu'n kyex aq'nal; japuntzun aq'untl kyu'n aju otoq tzaj q'ma'n kye.

27Tejtzun kypon tuj tnam Antioquía e b'aj kychmo'n qe okslal, ex xi kytx'olb'a'n tkyaqilju otoq tb'incha Dios tu'n kyaq'unb'en, ex tza'n tten otoq txi tq'o'n Dios amb'il kye txqantl xjal mya judiy qe tu'n kyokslan.

28Ex axtzun e kyaj ten Pablo tuk'ix Bernabé nim q'ij kyuk'il qe okslal.