Ezequiel 41 - Mam Huehuetenango New Ortography

1Te tib'ajxi inx q'i'ne tu'n xinaq tuj tja Dios, ex xi techan tpimil pared junjun pak' ttzi tja Dios ex teyle junjun attoq ox metro tpimil.

2Aju tlamel tja Dios attoq jwe' metro twitz; ex qe kab'e pak' tkajonil tja Dios attoq kab'e metro tuk'il mey tpimil junjun. Ex xi techan xinaq cuart tkub' tuj tmij, ex attoq winqin metro tnuqb'il ex laj metro twitz.

3Te tib'ajxi xi' tuj ju cuart tokx max t-xe'pun, ex xi techan kypimil pared junjun pak' ttzi', ex teyle junjun attoq jun metro tpimil. Aju ttzi ja attoq ox metro twitz. Ex aju pared tkub' ttxlaj junjun pak' ttzi ja attoq ox metro tuk'il mey tnuqb'il junjun.

4Ex xi techan aju cuart tokx max t-xe'pun, attoq laj metro tnuqb'il ex laj metro tuj t-ẍkyin. Tzajtzun tma'n weye kyja': Atzun Lugar Mas Xjanxix jlu.

Qe cuart tok ti'jele tja Dios

5Te tib'ajxi xi techan xinaq tkajonil tja Dios, ex attoq ox metro tpimil. Ti'jele tja Dios ate'k tal cuart te kab'e metro kyuj.

6Qe cuart lu te ox kolin kyten, ex tuj junjun kol attoq 30 tal cuart. Aju tkajonil tja Dios mas ch'in tpimil tuj tkab'in kol ax ikx tuj toxin kol; ex tib'ajtzun junjun grad in che kub' ten qe viga kye tal cuart; kyja'tzun minti' okx laku'n tkajonil tja Dios tu'n tokx ten kywi' viga tuj.

7Qe tal cuart tuj tkab'in kol mas ma' kyuj ik tza'n qe cuart ate' tuj tnejel kol, ex qe cuart tuj toxin kol mas ma' kyuj ik tza'n qe cuart ate' tuj tkab'in kol. Ex tuj tnejel kol at grad tu'n qjapun tuj tkab'in kol, ax ikx tuj tkab'in kol tu'n qjapun tuj toxin kol.

8O wile tja Dios kyuk'ix qe tal cuart ate'k ti'jele kykub' qe tib'aj jun simyent. Aju simyent lu at ox metro twa'l,

9-10Aju kycajonil tal cuart te ti'jxi attoq kab'e metro tuk'il mey tpimil; kyxol qe cuart ate'k ti'jele tja Dios ex qe cuart kye pal, attoq jun cay te laj metro twitz.

11At jun ttzi ja tu'n qokx kyuj qe cuart kykub' tuj tumlal tb'anq'ab' q'ij, ex at juntl ttzi ja tu'n qokx kyuj qe cuart kykub' tuj tumlal tnayaj q'ij. Aju muro tok ttxa'nile ju cay, te kab'e metro tuk'il mey tpimil.

Aju ja tkub' tuj telex q'ij

12Ti'jxi tja Dios tuj telex q'ij, attoq jun ja te 35 metro twitz, ex 45 metro tnuqb'il, ex aju tkajonil ja kab'e metro tuk'il mey tpimil.

Aju echb'il te tkyaqil tja Dios

13Xi techan xinaq tja Dios, ex aju echb'ilte tu'n tkyaqil, 50 metro tnuqb'il. Atzun ju cay taj ti'jxi tja Dios tuj telex q'ij, tuk'ix ju ja ex qe tkajonil, ax ikx attoq 50 metro tnuqb'il.

14Aju twitz tja Dios, tuk'ix tkab'in ttxa'n pe'n tkub' tuj tjawitz q'ij at 50 metro twitz.

15Ex xi techan tnuqb'il ja aju tkub' ti'jxi tja Dios tuk'ix cay kyuk'ix qe twitz ja junjun pak', attoq 50 metro tnuqb'il.

Aju b'inchb'en te tja Dios

Aju Lugar Xjan ex aju Lugar Mas Xjanxix ex tuk'ixju tal cuart tkub' ttzi tja Dios

16-17toktoq tz'lom kyi'j. Qe ventan tok k'uxb'il xawk'in tten kyi'jele, ex qe kymarkil ventan tz'lomintoq tkyaqil kyi'jele, xi'ynix qe' twitz tx'otx' ex japun b'aj kyi'j ventan; ax ikx tib'aj tlamel tok tz'lom. Aju tkajonil tja Dios tujxi ex ti'jxi,

18toktoq kyilb'ilal querubín ex kyilb'ilal tqan xa'j twitz. T-xol jun querubín tuk'il juntl querubín toktoq jun tqan xa'j. Teyle junjun querubín at kab'e twitz;

19tuj jun pak' ik ke'yin kywitz ik tza'n ke'yin twitz jun xinaq ex kyja' in xi tke'yin ti'j tqan xa'j, atzun juntl kywitz ik ke'yin ik tza'n twitz jun b'alun, ex kyja' in xi tke'yin ti'j juntl tqan xa'j. Ex iklex xi'yni tkyaqil tujile tja Dios.

20Attoq kyilb'ilal querubín ex kyilb'ilal tqan xa'j tok twitz, xi'ynix qe' twitz tx'otx' ex japun b'aj max kyib'aj qe tlamel twitzile tkyaqil tkajonil tja Dios.

21Tuj ju Lugar Xjan, aqeju tmarkil ttzi ja junx ta' echb'in te tpimil tkyajil pak'.

Aju altar tze' ttx'otx'il

Twitz Lugar Mas Xjanxix attoq jun ti'xti ik ke'yin

22ik tza'n jun altar tze' ttx'otx'il, ex aju echb'in te, jun metro junjun pak' ttxlaj, ex jun metro tuk'il mey twa'l. Attoq qe tb'utx'; aju tq'uqb'il ex tkajonil puro tze' tkyaqil. Atzunte xinaq tzaj tma'n weye kyja': Atzun mes jlu tkub' twitz Qman.

Qe tlamel ja

23Tza'nx ju Lugar Xjan ax ikx ju Lugar Mas Xjanxix, attoq kylamel te kab'e tten junjun pak'.

24Teyle junjun tlamel ja attoq kab'e piẍ junjun pak' ex kykab'il plaj tlamel ja in che jaqet.

25Qe tlamel Lugar Xjan toktoq kyilb'ilal querubín ex kyilb'ilal tqan xa'j kywitz, ik qe ik tza'n qeju tok twitz tcajonil tja Dios. Ex attoq jun xmu'j tjax tib'aj ttzi ja teju cuart tkub' twitz tja Dios.

26Twitz tcajonil ju cuart tkub' twitz tja Dios attoq qe tventanil ex toklex k'uxb'il xawk'in tten kywitz, ex toktoq kyilb'ilal tqan xa'j kyi'j. Ax ikx qe tal cuart ate' ti'jele tja Dios attoq qe xmu'j tjax kyib'aj ttzi ja.