Isaías 40 - Mam Huehuetenango New Ortography

In tq'uqb'a'n Qman Dios kyk'u'j qe aj Jerusalén

1Chi Kydiose kyja':

Kyq'uqb'ame kyk'u'j qe xjal etzan wu'ne, kyq'uqb'ame kyk'u'j,

2che yoline tuj k'ujlalil kye qe xjal aj Jerusalén, kymanxe kye: Ma pon b'aj ju k'ixb'isab'l kye tuj aq'untl, ma b'aj chjet kyil ex cabal ma kyk'am kycastiw wu'ne tu'n tlaj tkyaqil kyil.

3In jaw tq'ajq'ajel twi' jun xjal chi kyja': Kyb'inchame jun tb'e Qman tuj lugar tzqij tx'otx', kyjaqome jun b'e jiqun ti'j te Qdios tuj lugar minti' kynajb'il xjal tuj.

4Kynojsa'n b'aje qe tqan xaq, kychq'ajlajin b'aje qe nmaq witz ex qe tal witz, aju tx'otx' nim tqan xaq tuj ex nim witz tuj, kyparejin b'aje tu'n tkyaj ten chq'ajlaj.

5Ktzajeltzun tyek'un Qman tajwalil ex ok kyila' kykyaqil xjal. Axte Qman ma q'mante jlu.

6At jun tq'ajq'ajel wib'aj in tma'n: Sch'inxa; atzun weye xi nqanine te: ¿Alkye yol kxel nsch'i'ne? Atzun jlu kxel t-sch'i'na: Kykyaqil xjal ik kyten ik tza'n k'ul, ex junx ta' kyoklen ik tza'n t-xmakal k'ul tuj kojb'il noq ch'in in ten.

7Ate k'ul in tzqij ex in tzaj tz'aq t-xmakal ok in tzaj t-xupin Qman ti'j. Ax tok kykyaqil xjal ik kyten ik tza'n k'ul.

8Ate k'ul in tzqij ex in tzaj tz'aq t-xmakal, atzunte tyol Qman Dios kukx ktel te jumajx, chikuya, chi tzaj q'ma'n weye.

9Aqeye aj Sión, kyjaxe max twi' jun witz ma' twa'l, kysch'inxe kyuw wen tu'n t-xi kyma'ne jun tqanil b'a'n. Mi'n che xob'e tu'n tjaw tq'ajq'ajel kywi'ye kyuw, aqeye aj Jerusalén kymanxe tqanil kye qe tnam tuj Judá: Lu Kydiose tzul, che chikuye.

10Ate Qman ch'ix tul tuk'il tipumal, tu'nx tipumal in kyaj ten tkyaqil tjaq' tkawb'il. Qe xjal etzan tu'n che ul ti'n junx tuk'il okxi kykolpet tu'n.

11Tzul ik tza'n jun pastor kwentin qe t-ẍne'l tu'n, in che jaw tchle'n qe tal t-ẍne'l tuj tq'ab', q'i'n qe tu'n ttzi t-xu'k ex kwentinxix qe ttxu ẍne'l tu'n, aqeju matoq tkub'len kyal.

Aju Kydios aj Israel ma'xix toklen

12¿Alkye jun jaku b'ant tmalonte ju mar tu'n tlaqil tq'ab'? ¿Alkye jun jaku b'ant t-xk'uchb'ante twitz kya'j tu'n tq'ab'? ¿Alkye jun jaku b'ant tmalonte tuj jun malb'il tkyaqil tquqil tx'otx', ex qa tu'n tmalonte tuj balans qe nimaq witz ex qe tal witz?

13¿Alkye ma txi yek'unte te Qman alkye tu'n tb'ant tu'n, alkye ma txi q'onte tnab'l ex alkye ma txi xnaq'tzante te?

14¿Alkye o txi q'onte tconsej tu'n tel tnik' ti'j tkyaqil? ¿Alkye o xnaq'tzante te tu'n tkawin tuj tumelxix? ¿Alkye o xnaq'tzante te tu'n tten tojtzqib'l? ¿Alkye o txi xnaq'tzante te tu'n tten tnab'l?

15Ik kyten qe nasyon tuj twitz Qman ik tza'n jun txut a', nne'l txutpaj ti'j tkub'il, ex ik kyten ik tza'n ch'in tpujil tx'otx' in kyaj ten tuj balans; qe nasyon ate' ttzi'yile mar ik kyten ik tza'n jun twitz ttxa tz'a'n minti' talil.

16Tuj tkyaqil tiwitz tx'otx' Líbano mlay che kanun qe alumaj tu'n t-xi q'ot jun chojb'il te Dios, ex maske at nim tze' tuj, pero mlay kanun tu'n tk'ant q'aq' tu'n tkub' patit ju chojb'il.

17Minti' ch'in nne'l b'ant kyi'j kykyaqil nasyon tuj twitz Qman ex misikyer ch'in kyoklen tuj twitz.

18¿Alkye jun jaku che yoline ti'j qa ik tten ik tza'n Dios? ¿Alkye jun tilb'ilal jaku b'ant kyu'ne ex tu'n kymanteye qa ik ke'yin ik tza'n tilb'ilal Dios?

19Jun xjal at tnab'l tu'n taq'nan tu'n kyb'ant qe tilb'ilal tu'n, nno'kx tq'o'n qe k'uxb'il tuj q'aq' tu'n kykub' ulj tu'ntzun tb'ant jun tilb'ilal ti'j, ex jun xjal tx'inol q'an pwaq in b'aj tlo'tzin ti'j tilb'ilal tu'n q'an pwaq, ex in che b'ant qe caden saq pwaq tu'n, tu'n tok tq'o'n ti'j tilb'ilal.

20Aju xjal meb'a minti' tumel tu'n t-xi tq'o'n jun oyaj wi'yilxix in tzaj tjyo'n jun tze' aju minti' in pok'ix, ex in tzaj tjyo'n jun calpinter at tnab'l ti'j tu'n tjaw twab'an tilb'ilal ex tu'n mi'n tik' tz'aq.

21¿Baqa minti' b'i'n kyu'ne alkye Dios? ¿Ex na'nxpetzun kyb'inteye ti'j? ¿Minti'petzun nne'l kynik'e ti'j ju yol lu, aju o q'manjtz atxix tej tb'ant twitz tx'otx'?

22Ate Dios at tq'uqb'il twitz kya'j tib'ajle tx'otx', ex in che tke'yin Dios qe xjal mer ik tza'n ẍplon. In xi tlik'un ju kya'j mer ik tza'n jun xb'alun xaxj wen ex in xi tlik'un mer ik tza'n jun ja lona te tnajb'il.

23Qe xjal ma' kyoklen in che ok tq'o'n te minti' kyajb'en, ax ikx qe nejenel ate' twitz tx'otx' b'i'x nne'l ti'n kyoklen.

24Ik kyten xjal ik tza'n awal a'laj tqan, tu'nju k'itzqe tkuxlen awet ex ma in xi' tlok' tuj tx'otx'. Qa ma txi t-xupin Dios kyi'j, in che tzqij ex in che'x iqan tu'n nintz kyq'iq' mer ik tza'n ttxa triw.

25Chi Dios kyja', aju Dios Xjan: ¿Alkye jun jaku che yoline ti'j qa ik tten ik tza'n qine? ¿Alkye jun jaku pon ik tza'n qine?

26Kyi'n jaw kywitze twitz kya'j ex kyke'yinxe: ¿Alkye o b'inchante tkyaqil jlu? Aju ok q'onte teyle junjun che'w tuj tlugar ex in che tzaj ttxko'n teyle junjun ik tza'n tb'i tok. Mi a'l jun nnik' tib'aj ju txokb'il te, tu'nju at nim tipumal Dios ex in kawin tib'aj tkyaqil.

27Aqeye aj Israel tiyjil Jacob, ¿tiqu'n kukx kyyoline mya b'a'n wi'je? ¿Tiqu'n in kyma'ne kyja'?: Minti' nno'k tq'o'n Qman kwent qi'je tza'n qtene, ex minti' taj Dios qi'je, che chiye.

28¿Minti'petzun b'i'n kyu'ne? ¿Na'nxpetzun kyb'inteye? Ate Qman atzunte Dios, minti' b'ajsb'il te, ate o b'inchante tkyaqil twitz tx'otx', minti' in kub' numj ex minti' in sikt ex mlay tz'el qnik' ti'j tnab'l Dios ma'xix.

29In tzaj tq'o'n tipun aju xjal sikni, ex aju minti' tipun in tzaj tq'o'n txqantl tipun.

30Qe ku'xun jaku che sikt ex jaku che kub' numj, ax ikx qeju maxix q'i'n kyipun, jaku che kub' tz'aq,

31atzun qeju q'uql kyk'u'j ti'j Qman, kukx ktzajel q'o'n kyipun, jaku che lipan mer ik tza'n t'iw, jaku che ojqelan ex mlay che sikt, jaku che b'et ex mlay che kub' numj.