Éxodo 15 - Mam Huehuetenango New Ortography

Aju tb'itz Moisés

1Oktzun ten Moisés b'itzal kyuk'ix aj Israel, te nimsab'l te Qman ex kyma:

Chin b'itzale te Qman tu'nju ma'xix toklen o tzaj tyek'un. O che kyaj tmulq'i'n qe chej tuj mar kyuk'ix qeju kyjaxtoq kyib'aj.

2Ate Qman q'olte wipumale ex o tz'ok te klol weye, chin b'itzale te. Atzun we Ndiosju, ex chin b'itzale tb'i; atzun Tdios nmane, ex kjawil nnimsa'ne.

3At tipumal Qman tu'n tkub' kyi'j aj q'oj tu'n, ex Qman tb'i.

4Qe tcarwaj Faraón kyuk'ix qe t-soldad o che kyaj tmulq'i'n tuj mar. Qe nejenel kye t-soldad sk'o'maj qe tu'n, o che kyaj mulq'aj tuj Mar Kyaq Ke'yin.

5O che ku'x maqu'n tuj a' ma' t-xe', ex o che ku'pun max t-xe mar, mer ik tza'n ab'j qe.

6Nman, tu'n tb'anq'ab'a o tzaj tyek'una tipumala ma'xix. Tu'n tb'anq'ab'a Nman o che b'aj naj qe aj q'oj.

7Tu'n tipumala ma'xix o che kub' t-xituna qeju o jaw kyi'n kyib' ti'ja; tzaj ttx'u'jila ex o che kub' tz'e'y tu'na, mer ik tza'n ch'im.

8Tu'n t-xewa ok tchmon tib' a', jaw ch'iy ik tza'n muro ex b'aj kyuwix a' tmij mar.

9Chi aj q'oj kyja': Chin xel lpe'ye kyi'j, che pol knet wu'ne, kb'ajel nsipane aju k'elel wi'ne kye, ex chin tzalajele ok tkub' kyi'j wu'ne. Kjawitz wi'ne nspadiye ex che kymel wu'ne.

10Atzun teya Nman, xi t-xupina ex o che kyaj mulq'aj tuj mar. O che ku'x tz'aq t-xe a' nim tipun, ik tza'n in ku'x tz'aq plom.

11Nman, ¿Alkye jun kyxol kydios xjal jaku pon ik tza'n teya? ¿Alkye jun jaku pon ik tza'n teya? Xjanxixa wen, xob'ajilxix qe tb'inchb'ena, ex in tb'incha'na qe b'inchb'en nim kyipumal.

12Ma tzaj tyek'una tipumala ex ma che'x b'alq'u'n qe aj q'oj tu'n tx'otx'.

13Ex aqeju ma che klet tu'na che xel t-ẍaqlu'na tu'n tq'aq'b'il tk'u'ja, ex che xel ti'na tuk'il tipumala tuj tnajb'ila xjan.

14Ok tb'injtz jlu kyu'n txqantl nasyon, che tzajel lu'lun, ex kb'el kyxqutz'in kyib' aj Filisteo tu'n ta'w.

15B'i'x knajel kynab'l qe nejenel te Edom, che tzajel lu'lun qeju at kyipun tuj Moab, ex b'i'x kb'ajel kyipun qeju najl tuj Canaán.

16Nman, ktzajel kyxob'il ex che tzajel lu'lun tu'n tipumala; che okel ik tza'n ab'j mib'an yukch okxi kyik'x b'aj qe xjal etzan tu'na, aqeju e kolpet tu'na.

17Nman, tu'na che okex ti'na tu'n kynajan twi witz etzan tu'na, tuj lugar sk'o'maj tu'na tu'n ttena tuj, ex tuj ja xjanxix aju o b'aj tb'incha'na.

18Kkawil Qman tuj tkyaqil tab'q'iyil te jumajx, che chi tuj kyb'itz.

Aju tb'itz María

19Tej toktz Faraón tuj mar kyuk'ix qe tcarwaj ex qe t-soldad kyjaxtoq kyib'aj chej, ajtz mulq'aj mar kyib'aj tu'n Qman; atzun kye aj Israel e ik'tz tuj tzqij tmij mar.

20Atzunte María aju xu'j t-sanjel Dios ex tanb' Aarón, tzaj ti'n jun tal chnab' tuj tq'ab', ik tza'n tal tampor, ex kykyaqil xu'j e je'tz lpe' ti'j q'i'mlex tal chnab' lu kyu'n, ex in che b'ixuntoq.

21Atzunte María in b'itzantoq kyxol kyja':

Che b'itzane te Qman tu'nju ma'xix toklen o tzaj tyek'un. O che kyaj tmulq'i'n qe chej tuj mar kyuk'ix qeju kyjaxtoq kyib'aj, chi María.

Aju a' k'a tuj lugar Mara

22E ik'tzun ti'n Moisés qe aj Israel ttzi Mar Kyaq Ke'yin, ex e kanun tuj tzqij tx'otx' Shur. E b'et ox q'ij tuj tx'otx' lu ex minti' knet a' kyu'n.

23E pontzun tuj lugar Mara, knet ch'in a' kyu'n, pero minti' xi kyk'a'n ti'j tu'nju k'atoq. Tu'ntzun jlu, Mara tb'i lugar lu ok kyq'o'n.

24E oktzun ten xjal yolil mya b'a'n ti'j Moisés ex kyma: ¿Titzun kxel qk'a'ne? Che chi.

25Tu'n jlu o kub'san Moisés twitz Qman, ex tzaj tyek'un Qman jun wi' tal tze' te. Ku'xtzun tq'o'n Moisés tal tze' lu tuj a'; atzunte a' o b'ant tk'anjtz.

Atzun tzaj tq'o'n Qman ju ley ex ju mandamyent kye, atzun e jo'k qe xjal tuj malb'il tu'n,

26ex tzaj tma'n kye kyja': Aqine Kymane aju Kydiose: Qa ma txi kyb'i'nxixe nyole, qa ma che b'ete b'a'n nwitze, qa ma tzaj kyq'o'ne kyẍkyine kyi'j qe nmandamyente ex qa ma che japun qe nleye kyu'ne, mi jun yab'il ktzajel kyi'je ik tza'n tzaj nsama'ne kyi'j aj Egipto, porke aqine Kymane aju q'anal kyeye, chi Qman.

27E pon tuj Elim jatum attoq kab'laj twi a' ex 70 tqan palm, ex atzun e kub' ten kytzi a'.