1Nman Dios, chin tb'intza ex chin ttzaq'wentza porke b'isxix atine ex meb'a qine;
2chin tkloma porke in chin nimane teya. Aya Ndiose chin tkloma, aqine tmajena q'uql nk'u'je ti'ja.
3Nman, q'aq'antz tk'u'ja wi'je, tkyaqil or in jaw tq'ajq'ajel nwi'ye ti'ja.
4Nman, tzalajsama nk'u'je aqine tmajena, porke twitza in chin kub'sane.
5Porke b'a'na Nman ex in kub' tnajsa'na kyil xjal; nimxix tk'ujlalila kyi'j qeju in che kub'san kywitz teya.
6Nman, b'intza nna'j Diose, q'ontz twi'ya ti'j nkub'sb'ile twitza.
7Ok in tzaj yajb'il weye in xi nqanine onb'il teya, porke in chin tzaj ttzaq'we'na.
8Minti' juntl aju nno'k kydiosin xjal jaku pon ik tza'n teya Nman. Mlay pon kyaq'unb'en txqantl ik tza'n teya taq'unb'en.
9Nman Dios, tu'na o che b'ant kykyaqil nasyon, ok che tzajel k'ulul teya ex kjawil kynimsa'n tb'iya.
10Porke o'kxku aya Dios nim toklena, ex in che b'ant qe b'inchb'en nim kyipumal tu'na.
11Nman Dios, yek'untza tb'eya weye tu'ntzun wok lpe'ye ti'j tyola axix tok, ex o'kx tu'n nnimane teya.
12Nman Dios, kjawil nnimsa'ne tu'n tkyaqil wanmiye ex kukx kjawil nnimsa'ne tb'iya.
13Ma'xix tk'ujlalila wi'je. Ma chin klete tu'na tu'n mi'n nxi tz'aqe tuj kynajb'il kyimni.
14Nman Dios, at jun k'loj xjal in jaw kyniman kyib' ex jawni kywitz tu'n kyq'ojin, minti' kyaj ti'ja, ma jaw kyi'n kyib' wi'je ex kyaj tu'n nkub' kyb'yo'n.
15Atzun teya Nman Dios, at tk'ujlalila ex at tq'aq'b'il tk'u'ja, at tpasensa, ma'xix ju tk'ujlalila ex axix tok tyola.
16Chin tke'yintza, q'aq'antz tk'u'ja wi'je. Chin tkloma aqine tmajena. Q'ontza wipune.
17Q'ontza jun yek'b'il ti'j t-xtalb'ila, tu'ntzun kyjaw ch'ixwi qeju in che ik'unte wi'je ok kyke'yinte jlu. Nman Dios, tu'na in tzaj tq'o'na onb'il weye ex q'uqb'ab'l nk'u'je.
Who We AreWhat We EelieveWhat We Do
2025 by iamachristian.org,Inc All rights reserved.
