Job 36 - Mam Huehuetenango New Ortography

Yolin Eliú tkyajin maj

1Kukx ok ten Eliú yolil ex tma:

2Ten ch'intl tpasensa ex kxel nxnaq'tza'ne, ex atx txqantl yol tu'n t-xi nma'ne tu'n nkoline ti'j Dios.

3K'ajb'el wu'ne aju wojtzqib'le nimxix, tu'ntzun t-xi nma'ne qa ax tok aju in tma'n aju B'inchal weye.

4Kxel nkyuwsa'ne teya; mlay txi nma'ne jun nik'aj yol; lu qine wa'l twitza, aqine jun xjal at nimxix nnab'le.

5Ate Dios at nimxix tipumal ex at nimxix tnab'l, ex minti' nne'l tik'un aju xjal minti' til.

6Mlay kyaj anq'in ju xjal mya b'a'n tu'n, pero in xi tb'incha'n kyi'j qe meb'a xjal;

7kukx in kolin kyi'j qe xjal tz'aqlxix ex in che ok tq'o'n te kawil junx kyuk'il qe rey, ex nno'k tq'o'n ma'xix kyoklen.

8Pero qa k'alo'n qe tu'n caden, ex qa in che k'ixb'isanjtz tu'n ta'w,

9in xi tma'n Dios kye alkye il otoq kyb'incha ex tza'n tten otoq jaw kyniman kyib'.

10In yolin Dios kyuk'il tu'n tjiqumanjtz ti'j kynab'l ex in xi tma'n kye tu'n tkyaj kyq'o'n ju mya b'a'n.

11Qa ma txi kyniman ex qa ma tz'okx kyq'on kyib' tjaq' tkawb'il, che tzalajel ex ok che tel tuj txub'txaj tuj ch'intl kyanq'ib'l atx.

12Pero qa minti' ma txi kyniman, che kymel ex minti'x otoq tz'el kynik' ti'j.

13In tzaj nimxix kyq'oj aj il; maske presin qe, pero minti' in che qanin onb'il.

14Ku'xunx qe ok kykyim ex aju b'ajsb'il te kychwinqlal ch'ixb'ajilxix.

15Aju xjal in k'ixb'isanjtz, in klet tu'n Dios tuj k'ixb'isab'l; ex tu'nju ta'w in tzaj, nne'l tnik' ti'j Dios.

16Ax ikx teya ok kletela tu'n Dios kyuj qe xob'ajil, ktzajel tq'o'n nimxix teya, ktzoqpetela tu'n, ex kb'ajel noj twi tmesa tu'n kyu'n qe chib'j tb'anilxix.

17Atzun ja'lo tib'aja ma japun b'aj t-sentens ju xjal mya b'a'n, ex mlay mayet tu'na qa ma tz'oka tuj xjel ti'j ex qa ma kub' t-sentensa.

18Kwentim tib'a tu'n mi'n ttzaj tk'mo'na kotzb'aj mya tuj tumel ex tu'n mi'n t-xi tq'on tib'a tu'n tb'inchanteya jun mya b'a'n noq tu'n tlaj nim pwaq.

19Ok ttzaj b'is ti'ja, mlay tz'ajb'en tq'inumab'la ex tipumala te onb'il teya.

20Mi'n txi tachina tu'n ttzaj qonik'an ok in che kub' naj qe xjal tuj tnam.

21Q'onka kwent ti'j tu'n mi'n taj meltz'aja b'inchal mya b'a'n, porke tu'n jlu ma tzaj k'ixk'oj ti'ja.

22Q'onk tkwenta ti'j tipumal Dios. Mi jun xnaq'tzal in pon ik tza'n te Dios;

23mi a'l jun jaku q'mante te Dios alkye kb'antel tu'n, ex mi a'l jun jaku tz'ok q'mante te qa mya tuj tumel aju otoq tb'incha.

24Kykyaqil xjal in jaw kynimsa'n aju taq'unb'en Dios; ax ikx teya tzulx tk'u'ja ti'j tu'n tjaw tnimsa'na.

25Kykyaqil xjal jaku tz'ok kyke'yin, maske najchaq tzaj kyke'yin.

26Ma'xix toklen Dios ex mlay tz'el qnik' ti'j; ax ikx mlay b'ant qajlan ti'j tab'q'iyil.

27Tu'n Dios in tzaj tchmo'n junjun tz'uj a' tuj jun tkub'il, ex jurat nno'k tu'n te jb'al.

28Nne'tz chitj jb'al tuj muj ex in kub' tilj twitz tx'otx'.

29¿Alkye jun nne'l tnik' ti'j tza'n tten in b'et muj ex tza'n tten in q'ajt q'ankyoq twitz kya'j?

30Tu'n Dios in tzaj qoptz'aj xle'laj kya'j tib'aj mar, atzun t-xe'pun mar b'i'x in kyaj qlolj tkyaqil.

31Iktzun tten in kawin Dios kyib'aj kykyaqil xjal ex in tq'o'n nimxix kywa.

32Tuj tq'ab' Dios ta' q'ankyoq ex in pon ti'j jun ti'xti jatum taj Dios tu'n tpon.

33Aju tq'ajq'ajel q'ankyoq in tq'o'n tqanil qa at tulel kyq'iq' jb'al, ex tu'nju tq'oj Dios in tzaj kyq'iq' jb'al.