1Tujxi toxin q'ij e pon David kyuk'ix qe xinaq ate' tuk'il tuj tnam Siclag, ex tej kypon otoq che okx aj Amalec tuj tx'otx' Néguev, ex otoq che ok tzoqpaj ti'j tnam Siclag; b'i'x otoq b'aj naj tkyaqil kyu'n ex otoq tz'ok kyq'o'n tq'aq'al.
2Ax ikx otoq txi kyi'n qe xu'j, qe k'wa'l ex qe tij xjal ate' ma chixin, ex mi jun otoq kub' kyb'yo'n.
3Tej tpon David tuj tnam kyuk'ix qe xinaq ate' tuk'il, ex tej tkyil otoq b'aj tz'e'y tnam ex otoq che'x q'i'n qe kyxu'jil kyuk'ix qe kyky'ajal ex qe kyme'jel,
4e ok ten oq'el kyuwxix wen max tejxi tel b'aj kyipun.
5Ax ikx otoq che'x q'i'n qeju kab'e t-xu'jil David ex atzun qe jlu; Ahinoam aju aj Jezreel, ex Abigail aju t-xu'jilb'en qtzan Nabal aju aj Carmel.
6Tzaj nim t-xob'il David tu'nju in che yolintoq xjal tu'n tok kyxo'n ab'j ti'j, ex kykyaqil otoq tz'ok ta'w kyi'j tu'nju otoq che'x q'i'n qe kyk'wa'l. Maske ikju, pero o'kx ok qe' tk'u'j David ti'j Qman aju Tdios,
7ex xi tma'n te pal Abiatar aju tky'ajal Ahimelec:
—B'inchama xtalb'il, q'intza aju kapiẍay in ajb'en kyu'n qe pal.
Tejtzun tpon ti'n Abiatar aju xb'alun tuk'il David,
8ok ten qanilte te Qman ex tma:
—¿B'a'npe tu'n wok lpe'ye kyi'j qe eleq' lu? ¿Jakupe chin pon kanune kyi'j?
Atzunte Qman tzaj ttzaq'we'n:
—B'a'n tu'n tok lpe'ya kyi'j, ex jaku pon kanuna kyi'j ex jaku che kolpaj qe xjal ma che'x kyi'n.
9Jurat naj kub' b'e tu'n David kyuk'ix qe qaq syent xinaq ate' tuk'il, ex e pon ttzi' jun tq'ab' xaq Besor tb'i. Ax tuj lugar lu e kyaj ten kab' syent xinaq,
10ex ya minti' e ik'x tuj tq'ab' xaq tu'nju otoq che sikt; atzun juntl kyaje syent xi kylajo'ntl kyb'e junx tuk'il David tu'n kypon kanun kyi'j qe eleq'.
11Yajxi ch'intl knet jun xjal aj Egipto tuj kojb'il kyu'n, ex xi kyi'n twitz David ex xi kyq'o'n twa ex tk'a:
12xi kyq'o'n jun piẍ tlo' higo b'etz'a'maj ex kab'e rasim uva tzqijsa'maj. Tb'ajlenxi wa'n aj Egipto o tna' ok mas tipun, porke tuj ox q'ij ex ox qonik'an minti' ch'in wab'j otoq txi' tu'n, ex mi ch'in k'ab'j.
13Xitzun tqanin David te:
—¿Alkye tpatrona? ¿Jatum tzajniya?
Atzunte aj Egipto xi ttzaq'we'n:
—Aj Egipto qine ex tmajen jun xjal aj Amalec, ex ma b'ant-xi ox q'ij in kyaj koline tu'n npatrone tu'nju in yab'te,
14porke o qo'x aje elq'al tuj kytx'otx' aj Sereteo, tuj kytx'otx' aj Judá, ex tuj kytx'otx' aj Caleb aqeju kykub'sa'n tuj tx'otx' Néguev. Ax ikx o tz'ok qq'o'ne tq'aq'al tnam Siclag.
15—¿Jakupe txi'ya yek'ulte weye jatum ate' qe eleq' lu? Chi David xi tqanin.
Atzunte aj Egipto xi ttzaq'we'n:
—Qa ma tzaj tma'na weye jun tyola axix tok twitz Dios, tu'n mi'n nkub' tb'yo'na ex tu'n mi'n nxi' tq'o'na tuj tq'ab' npatrone, jakutzun chinxe yek'ulte teya jatum ate' qe, chi xjal.
16Xi'tzun aj Egipto yek'ulte jatum ate' qe eleq', ex tej kypon, lu qe otoq b'aj kysputun kyib' tuj kojb'il, in che wa'ntoq, in che k'antoq ex in che ik'santoq jun ninq'ij ti'j tkyaqilju otoq txi kyelq'a'n tuj kytx'otx' aj Filisteo ex tuj kytx'otx' aj Judá.
17Oktzun tzoqpaj David kyi'j, tzyet-x tu'n te qale ex maxi xi tkolin te qale te juntl q'ij tejxi kykub' b'aj kykyaqil, maske at kyaje syent ku'xun e tzoqpaj, kyjax qe kyib'aj chej camey.
18Kyja'tzun tten, el ti'n David juntl maj tkyaqilju otoq txi kyelq'a'n aj Amalec, kyuk'ix qe kab'e t-xu'jil.
19Mi jun ti'xti kyaj ten maske tal ch'in, ex mi jun k'wa'l ex mi tij xjal atxtoq taj, tu'nju otoq tz'el tkyaqil tu'n David juntl maj.
20Ax ikx tzaj ti'n David qe kyẍne'l ex qe kywakẍ, ex in kyma'ntoq qeju lajol kye kyja': Atzun jlu ma tkamb'a David.
21Tejtzun tpon meltz'aj David ttzi tq'ab' xaq Besor jatum otoq che kyaj ten kab' syent xinaq minti' e je'x tuk'il tu'n tlaj otoq che sikt, e je'tz naj kanul ti'j kyuk'ix kyi'j qeju otoq che'x aj tuk'il. Tejtzun tpon laq'e' David kyuk'il, xi q'olb'en kye.
22Pero qe xjal mya b'a'n kynab'l ex jawni qe ate' kyxol qeju otoq che'x aj tuk'il David xi kyma'n kyja': Mi'n txi qq'o'n jun ti'xti kye ti'j ju ma qkamb'a tuj q'oj, tu'nju minti' ma che'x aj quk'il, noq o'kx kyxu'jil ex kyk'wa'l b'a'n tu'n t-xi kyi'n ex tu'n kyaj meltz'aj, che chi.
23Atzunte David xi tma'n kye kyja':
—Mi'n kyb'inchaye jlu aqeye wermaniye, porke tu'n Qman ma tzaj tq'o'n jlu qe, ex tu'n ma qo klet tu'n mi'n qkyim, ex tu'n ma che kub' tz'aq qe eleq' tuj qq'ab', tu'nju otoq che ok tzoqpaj qi'j.
24Mi a'l jun jaku txi b'inte aju in kyma'ne, ex ok tkub' sipet aju ma kamb'et, parej che q'il qeju e kyaj ten kwentil makb'il, ik tza'n qeju otoq che'x aj q'ojlel, chi David.
25Atxix tuj q'ij lu, iklex in b'ant kyu'n aj Israel, ax ikx tuj tq'ijlalil ja'lo.
26Tej tpon David tuj tnam Siclag, xi t-sama'n ch'in kye qe tamiw aqeju tij xjal aj Judá, ti'j ju otoq tkamb'a kyi'j aj q'oj, ex xi tma'n kye: Lu jun oyaj lu te kyeye ti'j ju ma nkamb'aye kyi'j aj q'oj ti'j Qman, chi David.
27Xi t-sama'n oyaj kye qeju ate' kyuj qe tnam lu: Betel, Ramot aju ta' tuj tx'otx' Néguev, Jatir,
28Aroer, Sifmot, Estemoa,
29Racal, tuk'ix kye qeju ate' kyuj qe tnam ate' tuj tkwent Jerameel ex kye qeju ate' kyuj qe kytanmi aj Quenit,
30kye qeju ate' tuj tnam Horma, tuj Corasán, tuj Atac,
31tuj Hebrón, ex kyuj kykyaqil lugar jatum otoq tzik' aj David kyuk'ix qe xinaq tuk'il.
Who We AreWhat We EelieveWhat We Do
2025 by iamachristian.org,Inc All rights reserved.
