1Ok ten Job yolil juntl maj ex tma:
2Noqwit b'a'n npone ik tza'n ntene ojtxi, tej kwentintoq qine tu'n Dios,
3tej in tzaj tq'o'ntoq spik'un tuj nb'eye, ex tu'n jlu in chin b'ettoqe segurxix tuj qlolj;
4tej matoq q'i'n wipune ex kwentin njaye tu'n Dios;
5tej attoq Dios wuk'ile, aju at tipumal tu'n tb'ant tkyaqil tu'n, ex ate' qe nk'wa'le ntxlaje;
6tej in kyq'o'ntoq qe ttxu nwakẍe nim lech, ex tej attoq nim chib'j aseyt nne'l kyi'j tze' awa'n kyxol ab'j,
7tej in kub' qe'ye ttzi tlamel tnam junx kyuk'il qe aj sanjelal.
8Ok in chin ilwaje kyu'n qe ku'xun, in che el laq'e', atzun qe tij xjal in che jaw we' tu'n kyniman weye,
9ikxpe qe xjal at kyoklen, in che kub'toq txule' ex nno'k kyyek'un tal kyq'ab' kytzi' tu'n mi'n kyq'ajt;
10xi kykolin qe kawil tu'n kyyolin ex mer b'i'x nno'kx lak'e' kyaq' tuj kyk'o'n.
11Ok in chin ilwaje kyu'n xjal ex qa ok kyb'inte nyole, in chin tzaj q'olb'e'ne kyu'n ex in che yolin b'a'n wi'je,
12porke in chin kolintoqe kyi'j xjal minti' kyman ex kytxu' ex kyi'j xjal meb'a, aqeju mi a'ltoq jun in onin kyi'j.
13Ok in chin onine kyi'j qeju ch'ixtoq kynaj, in tzaj kyq'o'n chjonte weye ex ok in chin onine kyi'j qe meb'a xu'j, nimxix in che tzalaj.
14Tkyaqilju in b'ant wu'ne tz'aqlxix ex tuj tumelxix ex ik tten jlu te weye ik tza'n nxb'alune tok wi'je tkyaqil q'ij.
15Mer ik tza'n tb'aq' witzb'aj qine kye qe moẍ ex mer ik tza'n qamb'aj qine kye qe kox,
16mer ik tza'n mamb'aj qine kye qeju minti' at kye, ex kolol qine kyi'j qe xjal minti' ojtzqi'n kywitz wu'ne.
17E naj wu'ne qe xjal mya b'a'n, ex el wi'ne kye aju otoq tzyet kyu'n.
18Tuj nximb'etze qa nimtoq tuj nq'ije tu'n tten ik tza'n tajlal ttxa tza'n, ex tu'n nkyime otoq chin tijine ex ax tuj njaye.
19Iktoq ntene ik tza'n jun wi' tze' awa'n ttzi a', in che ak' tq'ab' tu'n tq'ab' che'w qonik'an.
20Kukxtoq in chin jaw nimsa'ne kyu'n xjal ex minti'toq in b'aj wipune.
21Kykyaqil xjal xi kyb'i'n qe nyole ex e kub' txule' tu'n t-xi kyb'i'n qe nconseje.
22Nb'ajlenxi yoline mi a'l jun o q'ajt. B'a'nxix e ela qe nyole te kye,
23in che ayontoq ti'j nyole ik tza'n in che ayon xjal ti'j jb'al tuj tq'ijlalil ta'w kyaq.
24Ok in chin jaw tze'ne kyuk'il, minti' in xi kyniman ex minti' nne'l kyi'n kywitz wi'je tu'nju in chin tzalaje.
25In kawine kyib'aj ex kub' nximane alkye tu'n tb'ant kyu'n, ik tza'n jun rey in kub' nej kywitz qe t-soldad. Tej in che b'isuntoq, xi nq'uqb'a'ne kyk'u'j.
Who We AreWhat We EelieveWhat We Do
2025 by iamachristian.org,Inc All rights reserved.
