Proverbios 6 - Mam Huehuetenango New Ortography

Jun yol tu'n mi'n qkyaj we' ti'j tk'as jun xjal

1Nk'wa'l, qa ma kyaj we'ya ti'j tk'as jun tuk'ila ex qa ma txi ttziyana tu'n tchjet tk'as jun xjal minti' ojtzqi'n tu'na,

2tu'nxa in b'aj tk'ob'an tib'a, ex tu'nx ju tyola in tzyeta.

3Nk'wa'l, klom tib'a yake ma kub' tz'aqa tuj tq'ab' tuk'ila. Aju tu'n tb'inchanteya ja'lo, atzun jlu: Mansin kub' tib'a ex kub'sana twitz ju k'asb'enal tu'n tel ti'n tb'iya ti'j tk'as.

4Mi'n tzik' tana ex mi'n ojlana qa na'nxtoq tb'ant ti'j jlu tu'na,

5tel oqa ik tza'n nne'l oq jun masat twitz jun kamb'al, ex ik tza'n nne'l oq jun chyu'j ti'j jun k'ob'il.

Jun consej kye qe xjal ky'aj

6Aya xjal ky'aj, txi'ya ke'yil kye qe snik; q'o'nka kwent kyi'j alkye in kyb'incha'n ex kano'mila kyi'j:

7Maske minti' jun nejenel kyxol ex minti' jun caporal kyi'j ex minti' jun q'malte kye alkye tu'n tb'ant kyu'n,

8in b'aj kyk'u'n kywa tuj koresma, ex in b'aj kychmo'n tuj tq'ijlalil ok in jaw twitz awal.

9Aya xjal ky'aj, ¿jtoj b'an tel ti'n twatla? ex ¿jtoj b'an tjaw we'ya?

10Tu'n tlaj kukx ttana ex kukx tpich'un twi'ya tu'n watl ex kukx tkub' ttz'ulin tq'ab'a tu'n ttana,

11tzul meb'ayil ti'ja ex k'okel tzoqpaj ti'ja ik tza'n jun b'etin xjal q'i'n ub'l tu'n.

Aju tmod xjal b'inchal mya b'a'n

12Aju xjal b'inchal mya b'a'n ex ik'b'il twitz, o'kx nik'aj yol in yolin ti'j;

13in kub' t-xmutz'in ttzi twitz tu'n tyek'unte qa mya ax tok aju in tma'n ex in tyek'un qe señ tu'n tqan, ex in xi tch'ikun kyu'n qe tal tq'ab';

14aju tnab'l xjal lu jumajx tuj mya b'a'n ta', o'kx in ximan tu'n tb'inchante mya b'a'n, ex nno'k tilil tu'n tu'n kyq'ojin xjal kyxolx.

15Kyja'tzun noq minab'en ktzajel jun xitb'il ti'j; jurat knajel, ex mlay b'ant tklon tib'.

Aju nne'l tik'un Qman Dios

16At qaq ti'xti ex qa wuq jumajx ik'un tu'n Qman, ex atzun qe jlu:

17Aju xjal in jaw tniman tib', aju xjal nik'al yol, aju xjal in kub' b'yonte kye qe xjal minti' kyil,

18aju xjal in ximan ti'j alkye mya b'a'n tu'n tb'ant tu'n, aju xjal in xi qelan tu'n tb'inchante mya b'a'n,

19aju testiw sb'ul ex nik'al yol, ex aju in to'yin kye xjal kyerman kyib' tu'n kyq'ojin kyxolx.

Aju in tzaj tu'n tlaj in kyb'incha'n xjal aj pajil

20Nk'wa'l, nimanxa qe tmandamyent tmana, ex mi'n tz'el tik'una aju xnaq'tzb'il in tq'o'n ttxu'ya.

21Awa'n ku'xa qe tuj tanmiya, ex q'on kub'a qe tqula;

22atzun qe jlu che ẍaqlul teya tuj tb'eya ex k'okel kwentina kyu'n ok tkub' tana, ex ok che yolil tuk'ila ok tel twatla.

23Porke qe mandamyent ik kyten ik tza'n ttxa'n tzaj, ex qe xnaq'tzb'il jun spik'un qe. Ok ttzaj q'o'n xnaq'tzb'il teya ex ok tkub' kawina, atzun jlu b'e te chwinqlal te teya.

24Ok che kolil ti'ja twitz ju xu'j aj pajil ex twitz junxitl xu'j aju jawni xmoxin tu'n tyol.

25Ex mi'n tz'ok tachina tu'nju mejorxix ke'yin; ex mi'n txi tq'on tib'a tu'n ttzyeta tu'n, tu'nju in tzaj tke'yin ti'ja.

26Aju xu'j jawni twitz kyuk'il xinaq in qe' tk'u'j noq tu'n ch'in twa, atzun teju xu'j aj pajil, o'kx nno'k lpe' ti'j jun xjal q'inun ma' t-xilen.

27Qa at jun ma tz'ok tq'o'n q'aq' ttzi t-xu'k, ktz'e'yil t-xb'alun.

28Qa at jun ma tzik'x b'et tib'aj ttxa'n xq'a'l in k'ant q'aq' ti'j, ktz'e'yil tqan.

29Ax ikxtzun ktemb'il aju xinaq in kub' tan tuk'il t-xu'jil tuk'il; mlay tzik'x ti'j tu'n mi'n tkub' tcastiw.

30Minti' nne'l kyik'un xjal aju eleq' qa in elq'an noq tu'n tnoj tk'u'j;

31ex qa ma knet lu in elq'an, il ti'j tu'n taj tq'o'n wuq maj t-xel, ex tu'n t-xi tq'o'n tkyaqil aju at te.

32Minti' tnab'l ju xinaq in tb'incha'n aj pajil. Aju xinaq in tb'incha'n ikju, tu'nx tib' in naj.

33Kb'ajel b'aju'n, k'elel ik'un, ex aju tch'ixwi mlayx naj.

34Aju xinaq at twitz ti'j t-xu'jil, jurat in tzaj tq'oj ex mlay kub' tnajsa'n til juntl; il ti'j kb'el tcastiw tu'n;

35mlay tk'am chojb'il ti'j ju otoq b'ant tu'n juntl ex mlay kub' tk'u'j tu'n nimku oyaj.