Levítico 8 - Mam Huehuetenango New Ortography

Tej t-xjanset Aarón kyuk'ix qe tky'ajal Éxodo 29.1-37

1Tzaj yolin Qman tuk'il Moisés ex tma:

2Q'intza Aarón kyuk'ix qe tky'ajal, ax ikx q'intza qeju kyxb'alun pal, tuk'ix aseyt te xjansab'l, tuk'ix jun tor tu'n tkub' te chojb'il il, kyuk'ix kab'e tman ẍne'l ex jun tal chi'l pan minti' t-samel kyuj tu'n tjaw mal kyk'u'j,

3ex chmo'n oka kykyaqil xjal ttzi ja xb'alun te mojb'ab'l tib'il.

4Tb'inchatzun Moisés ik tza'nx otoq tma Qman, ex oktzun kychmon kyib' kykyaqil xjal ttzi ja xb'alun te mojb'ab'l tib'il.

5Xitzun tma'n Moisés kye kykyaqil xjal kyja': Atzun jlu ma tma Qman tu'n tb'ant.

6Xitzun tma'n Moisés tu'n tpon laq'e' Aarón kyuk'ix qe tky'ajal ex e b'aj tchi'n tu'n a'.

7Te tib'ajxi ok tq'o'n Moisés aju ẍjow' ti'j Aarón, ex ok tk'alo'n k'alb'il k'u'jb'aj tk'u'j ex te ti'jxi ok tq'o'n jun mant ti'j ex te ti'jxi lu ok tq'o'n ju tkapiẍay pal ti'j ex ok tk'alo'n tk'u'j tu'nxju k'alb'il te kapiẍay.

8Ex ti'jxi kapiẍay ok tq'o'n jun xb'alun tb'anilxix, ttzi t-xu'k, ex tujxitzun ju xb'alun lu okx tq'o'n Urim ex Tumim.

9Ok tq'o'n jun xb'alun te k'alb'il twi', ex ti'jtzun xb'alun lu ok tq'o'n jun tal tz'lom q'an pwaq ttx'otx'il tib'aj twitz Aarón, te jun techal qa otoq tz'ok toklen te pal ik tza'nx otoq tma Qman.

10Te tib'ajxi tzaj ti'n Moisés aseyt te xjansab'l ex kub' tqo'n ch'in tib'aj ja xb'alun ex kyib'aj kykyaqil ti'xti ate' tuj, ex kyja'tzun tten e xjanset tu'n.

11Ax ju aseyt lu xi ttx'ito'n wuq maj tib'aj altar, ex kub' tqo'n ch'in tib'aj altar ex kyib'aj kykyaqil makb'il in che ajb'en tuk'il, ax ikx kub' tqo'n ch'in tib'aj pil ex tib'aj tq'uqb'il tu'ntzun kyxjanset.

12Kub'tzun tqo'n Moisés aseyt te xjansab'l tib'aj twi Aarón tu'ntzun t-xjanset tu'n tok te pal.

13Te tib'ajxi e tzaj ti'n Moisés qe tky'ajal Aarón, ex ok tq'o'n kyẍjo'w ex ok tk'alo'n kyk'u'j tu'n k'alb'il k'u'jb'aj, ex ok tq'o'n jun xb'alun te k'alb'il kywi', ik tza'nx otoq tma Qman.

14Te tib'ajxi xi tma'n Moisés tu'n ttzaj q'it tal tor tu'n t-xi q'ot te chojb'il il, atzunte Aarón kyuk'ix qe tky'ajal kub' kyq'o'n kyq'ab' tib'aj twi' tal tor.

15Okxtzun tqesin Moisés tjaq' tqul tal tor, tzaj ti'n ch'in chik' kyu'n qe twi' tal tq'ab' ex ok t-su'n kyi'j qe tkach altar tuk'ix ti'jele tu'ntzun t-xjanset, atzunju chik' kyaj ten ku'x tqo'n t-xe tqan altar. Kyja'tzun tten xjanset altar tu'ntzun tchjet kyil xjal kyu'n qe chojb'il che xel q'ot tib'aj.

16Ax ikx tzaj ti'n Moisés tkyaqil sebo toksa'n kyi'j qe tuj tk'u'j tor, tuk'ix sebo toksa'n ti'j ttx'otx' ex kykab'il tchenaq' ex sebo toksa'n kyi'j, ex kub' tpatun tkyaqil jlu tib'aj altar;

17atzunju tchib'jal tal tor tuk'ix ttz'umal ex ttxa', kub' tpatun ti'jxi campament ik tza'nx otoq tma Qman.

18Te tib'ajxi tzaj ti'n Moisés jun tman ẍne'l tu'n tkub' patit te jun oyaj, atzunte Aarón kyuk'ix qe tky'ajal kub' kyq'o'n kyq'ab' tib'aj twi' tman ẍne'l.

19Okxtzun tqesin Moisés tjaq' tqul tman ẍne'l, ex ok ttx'ito'n tchk'el ti'jele tk'u'j altar,

20kub' tpaẍu'n tman ẍne'l tuj piẍun, ex okx tpatun twi' tuj q'aq', tuk'ix chib'j otoq b'aj tpaẍu'n ex tuk'ix t-sebyil;

21ex b'aj ttx'jo'n qe tuj tk'u'j tman ẍne'l tu'n a', kyuk'ix qe tqan ex qe tkux, ex kub' tpatun tkyaqil jlu tib'aj altar te jun oyaj patun in kub' at tk'ok'jal in tzalaj Qman ti'j, ik tza'nx otoq tma Qman te Moisés.

22Xi tma'ntl Moisés tu'n ttzaj q'it juntl tman ẍne'l, aju tu'n tajb'en te xjansab'l, atzunte Aarón ex qe tky'ajal kub' kyq'o'n kyq'ab' tib'aj twi' tman ẍne'l.

23Te tib'ajxi okx tqesin Moisés tjaq' tqul tman ẍne'l, tzaj ti'n ch'in chik' ex ok t-su'n ti'j tje' t-ẍkyin Aarón tuj tb'anq'ab', tuk'ix ti'j tman tal tb'anq'ab' ex ti'j tman tal tqan tuj tb'anq'ab'.

24Ax ikx xi tma'n Moisés tu'n kyul laq'e' qe tky'ajal Aarón, ex ok t-su'n ch'in chik' ti'j tje' kyẍkyin tuj kyb'anq'ab', tuk'ix kyi'j qe tal tman kyb'anq'ab' tuk'ix kyi'j qe tal tman kyqan tuj kyb'anq'ab'; atzun chik' kyaj ten ok ttx'ito'n ti'jele tk'u'j altar.

25Tzajtzun ti'n Moisés t-sebyil, tuk'ix tje', tuk'ix tkyaqil sebo toksa'n kyi'j qe tuj tk'u'j, tuk'ix ju toksa'n ti'j ttx'otx', kyuk'ix kykab'il tchenaq' ex ju sebo toksa'n kyi'j, ex tkux tuj tb'anq'ab'.

26Tuj tal chi'l tkub'il pan minti' t-samel kyuj tu'n tjaw mal kyk'u'j, aju in kub' ten twitz Qman, jatz ti'n Moisés jun pan minti' t-samel tuj tu'n tjaw mal tk'u'j, tuk'ix jun pan at aseyt tuj, ex jun tal pan xaxj, ex kub' tq'o'n junx tuk'il sebo ex tkux alumaj tuj tb'anq'ab';

27tkyaqiltzun jlu xi tq'o'n tuj tq'ab' Aarón ex tuj kyq'ab' qe tky'ajal, tu'ntzun t-xi kyyukun jlu te jun chojb'il twitz Qman.

28Tzajtzun ti'n Moisés tkyaqil jlu tuj kyq'ab', ex kub' tpatun tib'aj altar junx tuk'il oyaj patun in kub', te jun oyaj te xjansab'l at tk'ok'jal ex patun in kub' te Qman.

29Te tib'ajxi tzaj ti'n Moisés ttzi t-xu'k tman ẍne'l ex xi tyukun twitz Qman. Atzun jlu tu'n tel q'it ti'j tman ẍne'l te xjansab'l, ex tu'n t-xi q'ot te Moisés, ik tza'nx otoq tma Qman.

30Tzaj ti'n Moisés ch'in aseyt te xjansab'l tuk'ix ch'in chik' tkub'sa'n tib'aj altar, ex xi ttx'ito'n tib'aj Aarón ex ti'j t-xb'alun, ax ikx xi ttx'ito'n kyib'aj qe tky'ajal ex ti'j kyxb'alun. Kyja'tzun tten o xjansanjtz Aarón tuk'ix t-xb'alun, junx kyuk'il qe tky'ajal tuk'ix kyxb'alun.

31Te tib'ajxi jlu xi tma'n Moisés te Aarón ex kye tky'ajal: Kytxko'n jaxe ta'l chib'j ttzi ja xb'alun te mojb'ab'l tib'il, ex axtzun kxel kychyo'ne tuk'il pan te xjansab'l tku'x tuj chi'l, ik tza'nx o tzaj tma'n Qman weye tej tmante kyja': A Aarón kyuk'ix qe tky'ajal che xel chyo'nte chib'j lu.

32Atzunju chib'j ex pan kjel ten, il ti'j tu'n tkub' patit tkyaqil.

33Ex tuj wuq q'ij mi'n che el laq'e'ye ttzi ja xb'alun te mojb'ab'l tib'il; max che elel laq'e'ye ok tjapun b'aj xjansab'l kyeye, ex wuq q'ij kxel ti'n tu'n kyxjansete.

34O tzaj tma'n Qman tu'n tb'ant jlu, ik tza'n ma b'ant ja'lo, tu'ntzun tnajset kyile.

35Kyja'tzun wuq q'ij ax che kyjel tene q'ijl ex qonik'an ttzi ja xb'alun te mojb'ab'l tib'il. Kynimanxe orden lu tu'ntzun mi'n kykyime, ex atzunju orden lu o nk'ame tu'n Qman, chi Moisés, xi tma'n kye.

36Atzunte Aarón kyuk'ix qe tky'ajal o kyb'incha tkyaqil ik tza'nx otoq tzaj tma'n Qman te Moisés.