Jeremías 48 - Mam Huehuetenango New Ortography

Tqanil tu'n Dios kyi'j aj Moab

1Atzun tqanil lu ti'j tnam Moab tu'n Qman aju Tajaw Tkyaqil ex Kydios aj Israel: Ay b'ek'b'il twitz tnam Nebo, porke b'i'x kb'ajel xitj, kb'el ti'j tnam Quiriataim ex kb'el kych'ixwi xjal najl tuj; ax ikx qe ja ma' kywa'l te kykolb'il kyib' che b'el xitj.

2Knajel toklen Moab. Tuj tnam Hesbón kb'antel ti'j kyu'n aj q'oj tu'n tkub' naj ex tu'n mi'n toktl Moab te nasyon. Ikx kyeye aqeye aj Madmena, kb'el xitun kytanmiye ex che q'ojl xjal kyi'je.

3Tuj tnam Horonaim kb'injtzel tq'ajq'ajel kywi xjal kyja': Ma qo naj ex ma kub' xitun qtanmi.

4B'i'x kb'el xitj tnam Moab, ex che jawil sch'in qe tal kyk'wa'l tu'n ta'w k'ixk'oj.

5Che oq'el ok kyjax tk'u'j witz Luhit ex kb'injtzel tq'ajq'ajel kywi' in che sch'in wen tu'n ta'w k'ixk'oj ok kyku'x tib'aj tnam Horonaim.

6Kyel oqe, kyklom kyib'e, kyoke ik tza'n jun wi' tal tze' retama tb'i at tuj tzqij tx'otx'.

7Tu'nju ok qe' kyk'u'je ti'j kyipune ex ti'j kyq'inumab'le, ax ikx kyeye kb'el kyi'je kyu'n aj q'oj. Kxel q'i'n kydiose Quemós tuj juntl nasyon, kyuk'ix qe pal in che ajb'en te ex txqantl xjal ma' kyoklen.

8Kykyaqil tnam che b'el xitj ex mi jun kyjel ten; ax ikx kb'ajel naj mlaj tx'otx' ex tiwitz tx'otx'. Aqine Dios in chin q'mante jlu.

9Kyq'onxe kyxik' aj Moab tu'ntzun kyel lipan; che b'el xitun kytanmi ex mi jun xjal ktel kyuj.

10Tzajxwit mya b'a'n tib'aj ju xjal minti' in tb'incha'n tu'n tkyaqil tanmi aju aq'untl ktzajel tma'n Qman te. Tzajxwit mya b'a'n tib'aj ju xjal tk'i' b'iyan tu'n spad.

11Tuj txub'txaj ma che anq'in aj Moab atxix ttzajlen ojtxi, na'nx tkanun jun maj tu'n kyxi q'i'n pres tuj juntl tnam. Ik kyten ik tza'n ta'l twitz uva in kyaj q'o'n tuj jun tkub'il ex minti' in b'aj ch'expu'n tkub'il, kyja'tzun, minti' in b'aj tchya'l ex tk'ok'jal.

12Ex chi Qman kyja': Kpol tq'ijlalil tu'n kyxi nsama'ne xjal tu'n tku'x kyqo'n ta'l twitz uva lu kyuj junxitl tkub'il ex tu'n tkub' kyb'uchin tnejel tkub'il.

13Ex ktzajel kych'ixwi aj Moab ti'j kydios Quemós tb'i, ik tza'n tzaj kych'ixwi aj Israel tej tok qe' kyk'u'j ti'j Betel.

14¿Tza'ntzun tten in kyma'n aj Moab kyja': At qipune ex kyuw qk'u'je tuj q'oj?

15Kb'el xitj Moab kyuk'ix qe tnam ate' tuj tkwent, ex che kymel qe ku'xun tb'anilxix at kyxol, chi Rey aju tok tb'i Qman Tajaw Tkyaqil.

16Ch'ix tul laq'e' tq'ijlalil tu'n kynaj aj Moab ex noq tu'n tulku kanun mya b'a'n ktzajel kyi'j.

17Aqeye tnam kyvesin kyib' tuk'il Moab, ex kykyaqil qeju b'i'n tqanil kyu'n ti'j, che oq'e ti'j ex kymanxe kyja': Kyke'yinxe tza'n tten ma naj tkawb'il aju at nimxix tipun ex ma' toklen.

18Kyku'tze tuj kyq'uqb'ile aqeye in jaw kyniman kyib'e tuj tnam Dibón, ex che qe'kuye twitz tzqij tx'otx', porke aju ma kub' xitunte Moab, lu in ojqelan ttzaj tu'n tok tzoqpaj kyi'je ex ma b'aj t-xitun qe ja ma' kywa'l te kykolb'il kyib'e.

19Aqeye najl tuj tnam Aroer, che we'kuye ttxlaj b'e ex kyke'yinxe, kyqaninxe kye qeju ma che el oq ex ma che tzoqpaj: ¿ti ma b'aj? Che chikuye.

20Ma kub' kych'ixwi aj Moab tu'nju ma kub' xitj kytanmi. Che oq'e ex che ayayane ti'j tnam; kymanxe tqanil lu kye qeju najl ttzi nima Arnón: Ma kub' xitj tnam Moab, che chikuye.

21Ma tzaj jwisi kyib'aj tnam ate' tuj tiwitz tx'otx', ex atzun qe jlu: Holón, Jahaza, Mefaat,

22Dibón, Nebo, Bet-diblataim,

23Quiriataim, Bet-gamul, Bet-meón,

24Queriot, Bosra ex kykyaqil qe tnam te Moab, aqeju ate' niqayin ex najchaq.

25Ma naj tipumal Moab ex ma b'aj xitj tkawb'il, chi Qman.

26E tchyo'n twi' Moab kyu'ne, porke ma jaw tniman tib' twitz Qman. Tol k'ik'el Moab tuj t-xa'w, ex kykyaqil xjal che xmayil ti'j.

27Aqeye aj Moab: ¿Minti'petzun o che xmayine kyi'j aj Israel ex kykyaqil maj e yoline kyi'j tuk'il ik'b'il mer ik tza'n eleq' qe'?

28Kykolin kyaje kytanmiye aqeye aj Moab, kyxi'ye najal kyuj qe toy' pik ik tza'n qe paloma in b'ant kyq'u' twitz pik.

29Ojtzqi'n qe aj Moab qu'ne, nim in jaw kyniman kyib', tx'u'j kywi' ex jawni kywitz.

30Chi Qman: Ojtzqi'n wu'ne tx'u'j kywi' aj Moab, in jaw kyniman kyib' ex noqx gan jlu.

31Kyja'tzun, chin oq'ele ex chin b'isule kyi'j kykyaqil aj Moab ex kyi'j qe xjal te tnam Kir-hares.

32Mas nim chin oq'ele ti'j tqan uva te tnam Sibna, ik tza'n in oq'e kyi'j aj Jazer. Aju twi ttxa'n uva ponin b'aj max ti'jxi mar ex ponin qe max tuj tnam Jazer. Atzun ja'lo ma naj twitz ky-uvaye q'an kyu'n qe xitul te.

33Ya minti'tl in che sch'in xjal tuk'il tzalajb'il kyuj qe tqan awal tb'anilxix kye aj Moab. Wu'ne ya minti'tl ta'l twitz uva jatum nne'l yatz'et ta'l, ya mi a'l jun in b'itzan tuk'il tzalajb'il ok tkub' twab'an twitz uva tjaq' tqan tu'n tel yatz'et ta'l. Aju tq'ajq'ajel kywi xjal in b'injtz ya mya b'itz te tzalajb'il, noq o'kx te q'oj.

34Qe xjal najl tuj tnam Hesbón in che sch'in tu'n ta'w, ex max in pon tq'ajq'ajel kywi' tuj tnam Eleale ex tuj tnam Jahaza, in xi tq'ajq'ajel kywi' tuj tnam Zoar, in pon max tuj tnam Horonaim ex tuj tnam Eglat-selisiya, porke qe twi a' in che b'et tuj tq'ab' xaq Nimrim ma che aj tzqij.

35Chi Qman: Che najel aj Moab wu'ne, aqeju in che jax kywi' qe witz tu'n t-xi kyq'o'n chojb'il kye qe tilb'ilal nno'k kydiosin ex tu'n tkub' kypatun storak kywitz.

36Kyja'tzun, ik tza'n in q'ajt chqitz' ok in kyim jun xjal, iktzun in b'isun wanmiye kyi'j aj Moab ex kyi'j xjal te tnam Kir-hares, porke ma b'aj naj kyq'inumab'l otoq b'aj kychmo'n.

37Kykyaqil xjal ma tz'el kymatzo'n ttzmal kywi' ex kyxmatz, ex kykyaqil ma b'aj kyqesin tuj kyq'ab', ex ma tz'ok kyq'o'n kyxb'alun ch'i'x twitz.

38In b'injtz oq'el kywi' kykyaqil kyja aj Moab ex kyuj kykyaqil cay, porke ma che b'aj naj aj Moab ik tza'n in b'aj b'uchit jun tal ẍoq' minti' tajb'en. Aqine Dios in chin q'mante jlu.

39Che oq'e kyi'j aj Moab porke ma che b'aj naj. Ma tz'ajtz kyq'o'n ttzal kyi'j tu'n kych'ixwi. Ma che ok te kyxmayb'il xjal kyvesin kyib' kyuk'il, ex ma tzaj kyxob'il xjal tu'n tlaj aju ma b'aj kyi'j aj Moab.

40Chi Qman kyja': Ma che ok tzoqpaj aj q'oj kyi'j aj Moab ik tza'n jun t'iw in tzaj lipan kyuk'il tq'ab' lik'un tten.

41Che tzyetel qe tnam ex qe ja ma' kywa'l te kykolb'il kyib' kyu'n aj q'oj. Tuj tq'ijlalil lu, aqeju kysoldad aj Moab kyuw kyk'u'j tuj q'oj che tzajel lu'lun tu'n kyxob'il, ik tza'n jun xu'j ok nnu'l itz'j tal.

42B'i'x kb'el xitj tnam Moab ex k'elel q'i'n toklen te nasyon, porke ma jaw tniman tib' twitz Qman.

43Kyja'tzun aqine Dios kxel nma'ne jlu: Qe xjal najl tuj tnam Moab che okel ik tza'n qe jil lajo'n kyu'n qe kamb'al, in che xob' tu'n kyku'x tz'aq tuj jun toy' jul ex qa tu'n kytzyet tu'n jun k'ob'il.

44Aju xjal nne'l oq twitz xob'ajil, kb'elex tz'aq tuj toy' jul, ex alkye ma jatz tuj toy' jul, ktzyetel tu'n k'ob'il, porke tzul tq'ijlalil tu'n tkub' kycastiw aj Moab wu'ne. Aqine Dios in chin q'mante jlu.

45Qe xjal ma b'aj kyipun ma che el oq tu'n tpon kyklon kyib' tuj tnam Hesbón jatum o kawin rey Sehón, ex ma tz'ok tq'aq'al tnam Hesbón, ex aju q'aq' ma tz'el laq'e' ex ma che b'aj tz'e'y qe witz te Moab tu'n, jatum najl qe xjal jawni kywitz.

46Ay b'ek'b'il kywitze aqeye aj Moab. Aqeye in che k'ulune twitz tilb'ilal Quemós ma che najxe, qe kyky'ajale ex qe kyme'jele ma che'x q'i'n pres tuj juntl nasyon.

47Ex tuj tq'ijlalil tzul, che ajetz wi'ne juntl maj aj Moab tu'n kyul tuj kytanmi. Aqine Dios in chin q'mante jlu.

O'kxtzun jlu in yolin ti'j kysentens aj Moab kub' tu'n Qman.