1Tej matoq in patun Jeroboam storak tib'aj altar tuj Betel, pon jun t-sanjel Dios tzajni tuj Judá, sama'n tu'n Qman,
2jaw tq'ajq'ajel twi' kyuwxix ex xi tma'n qe yol ti'j altar ik tza'nx otoq tzaj q'ma'n te tu'n Qman: Aya altar, aya altar, ma tma Qman jlu ti'ja: Tzul itz'j jun tiyjil David, Josías k'okel tb'i, ex tib'aja che b'el patun qe pal tu'n, aqeju in che ajb'en kyuj ja te kyk'ulb'il xjal mya nimal Dios qe, aqeju in che kub' patunte storak tib'aja; ex tib'aja kb'el tpatun qe kyb'aqil xjal.
3Ax q'ij lu xi tma'n t-sanjel Dios tu'n tb'ant jun techal ma'xix t-xilen ex tma: Atzun jun techal ma'xix t-xilen jlu, aju ma tma Qman: Aju altar lu kb'ajel xitj ex aju tza'j tkub' tib'aj kb'ajel sputj.
4Tejtzun tb'inte rey Jeroboam aju sentens otoq tma t-sanjel Dios ti'j altar at tuj Betel, max ttxlaj altar xi tnuqpi'n tq'ab' ex tma: Kytzyuntze xjal lu. Ex aju tq'ab' xi tnuqpi'n, b'i'x tx'i'lix ti'j ex ya minti' b'ant tyukch.
5Tujx or lu b'aj pax altar ex aju tza'j tkub' tib'aj b'i'x b'aj sputj, ik tza'nx ju techal otoq txi tma'n Dios te t-sanjel.
6Atzunte rey xi tma'n te t-sanjel Dios:
—In chin kub'sane teya tu'n tkub'sana wi'je twitz Qman aju Tdiosa, tu'ntzun tb'anix nq'ab'e.
Atzunte t-sanjel Dios ok ten kub'sal twitz Qman, ex aju tq'ab' rey o b'anix ik tza'n tten nej.
7Xitzun tma'n rey te t-sanjel Dios kyja':
—Qo' wuk'ile ma njaye tu'ntzun twa'na, ex jaku txi nq'o'ne jun oyaj teya.
8Atzunte t-sanjel Dios xi ttzaq'we'n te rey kyja':
—Maske tzaj tq'o'na mijku tetzb'ila weye, mlay chinxe tuk'ila, mlay chin wa'ne pan ex mlay chin k'ane a' tuj ju lugar lu;
9porke iktzun tten tzaj tma'n Qman weye, chi tma kyja': Mi'n txi twa'na pan, mi'n txi tk'a'na a', ex mi'n tz'ajtz meltz'aja tujx ju b'e jatum kxe'laya.
10Ajtzun meltz'aj t-sanjel Dios tuj juntl b'e, mya tujx ju b'e jatum otoq txi' tu'n tpon tuj Betel.
11Attoq jun t-sanjel Dios otoq tijin, najltoq tuj Betel. Ax q'ij lu e pon qe tky'ajal tuk'il ex xi kyma'n te tkyaqil aju otoq tb'incha t-sanjel Dios tzajni tuj Judá, ax ikx xi kyma'n te kyman aju otoq txi tma'n t-sanjel Dios te rey.
12Xitzun tqanin kyman kye:
—¿Alkye b'e ma txi ti'n?
Atzun qeju tky'ajal xi kyma'n alkye b'e otoq txi ti'n t-sanjel Dios aju tzajni tuj Judá.
13Xitzun tma'n kye qe tky'ajal:
—Chux kyq'onke t-siy nburre.
Kyb'inchatzun ikju, jaxtzun t-sanjel Dios tij xjal tib'aj bur
14ex xi lpe' ti'j t-sanjel Dios aju tzajni tuj Judá. Lu o knet tu'n q'uql tjaq' jun wi' tze' k'ol, ex xi tqanin te:
—¿Apeya aju t-sanjel Dios tzajni tuj Judá?
—Aqine, chi xi ttzaq'we'n.
15Tzaja wa'l wuk'ile tuj njaye, chi t-sanjel Dios tij xjal.
16Atzunte t-sanjel Dios xi ttzaq'we'n:
—Mlay chinxe tuk'ila, mi tu'n wokxe tuj tjaya, mi tu'n nwa'ne pan ex mi tu'n nk'ane a' tuk'ila tuj lugar lu;
17ex clarxix tzaj tma'n Qman weye: Mi'n wa'na pan ex mi'n k'ana a' tzalu, ex mi'n tz'ajtz meltz'aja tujx ju b'e jatum kxe'laya.
18Atzunte tij xjal xi tma'ntl:
Ax ikx weye ax t-sanjel Dios qine ik tza'n teya, ex at jun t-anjel Qman ma tzaj q'mante weye tu'n t-xi wi'ne njaye, ex tu'n t-xi nq'o'ne twaya ex tk'a'ya, chi tij xjal. Ex noq o nik'an tij xjal yol twitz t-sanjel Dios.
19Xi'tzun t-sanjel Dios tuk'il, o wa'n ex o k'an tuj tja.
20Tej q'uqlqe'toq ti'j mes, tzaj yolin Qman tuk'il t-sanjel Dios tij xjal, aju otoq tz'ajtz q'inte t-sanjel Dios tzajni tuj Judá,
21ex xi tma'n te tuk'il tq'ajq'ajel twi' kyuwxix:
—Chi Qman ma tma: Tu'nju minti' ma txi tnimana aju yol tzaj tma'n Dios teya,
22ex tu'nju ma tz'ajtz meltz'aja tu'n twa'na ex tu'n tk'ana jatum xi tma'n Qman teya tu'n mi'n tb'inchanteya, mlay tz'okx maqu'n t-ximlala tuj kypantyón qtzan t-xe'chela, chi tij xjal.
23Tejtzun tb'aj wa'n ex tej tb'aj k'an t-sanjel Dios tzajni tuj Judá, oktzun q'o'n t-siy tbur tu'n t-sanjel Dios tij xjal,
24ex ajtzun t-sanjel Dios tzajni tuj Judá. Ex etz jun b'alun tuj b'e ex kub' b'yo'n t-sanjel Dios tu'n ex kub' pale' t-ximlal tuj b'e, ex ax kub' ten bur tuk'ix b'alun ttxlaj t-ximlal.
25E ik' junjun xjal ex o kyil aju t-ximlal palch kub' tuj b'e, ex aju b'alun axtoq wa'l tkub' ttxlaj. Tejtzun kypon tuj tnam jatum najltoq t-sanjel Dios tij xjal, xi kyma'n te aju otoq kyil.
26Tejtzun tb'inte t-sanjel Dios aju otoq tz'ajtz q'inte te, tma: Atzunju t-sanjel Dios lu aju minti' xi tniman aju otoq tzaj tma'n Dios te. Kyja'tzun ma txi tq'o'n Qman te jun b'alun tu'n tb'aj tzaqun tu'n ex tu'n tkub' b'yo'n tu'n, ik tza'nx o tzaj tma'n Qman te.
27Ex xi tma'n kye tky'ajal tu'n tok kyq'o'n t-siy tbur, ex o b'ant kyu'n ikju.
28Xi'tzun t-sanjel Dios tij xjal, ex ok noj ti'j t-ximlal kyimni palch kub' tuj b'e, axtoq wa'l tkub' bur tuk'ix b'alun ttxlaj. Minti' xi tchyo'n b'alun t-ximlal kyimni ex minti' tb'incha jun mya b'a'n ti'j bur.
29Jaw ti'n t-sanjel Dios tij xjal t-ximlal t-sanjel Dios tzajni tuj Judá, jax tq'o'n tib'aj bur ex aj ti'n tuk'il tu'n tpon tuj tnam, tu'ntzun tb'isun ti'j ex tu'n tku'x tmaqu'n.
30Okx tmaqu'n tuj tex tpantyón, ok ten oq'el ti'j ex tma: Ay wermaniye.
31Tokxlenxi tmaqu'n, xi tma'n kye tky'ajal:
—Ok nkyim weye, b'ix chin okx kymaqu'ne tujx ju pantyón jatum ma tz'okx nmaqu'ne aju xinaq t-sanjel Dios. B'ix kub' kyq'o'ne nximlale junx kyuk'il qe tb'aqil,
32ex ax tok kjapunel aju o tzaj tma'n Qman te, tej tmante ti'j altar at tuj Betel ex kyi'j kykyaqil qe ja te k'ulb'il kye qe xjal mya nimal Dios qe, aqeju ate' kyuj qe tnam te Samaria, chi tij xjal.
33Maske o til Jeroboam tkyaqil jlu, ex minti' e kyaj tkolin qe tb'inchb'en mya b'a'n; noq o'kx e ok tq'o'n juntl maj noq alkyexku xjal te pal tu'n kyajb'en kyuj qe ja te k'ulb'il kye xjal mya nimal Dios qe. Qa at jun xjal taj tu'n tok te pal, b'i'x in b'aj xjansa'n tu'n Jeroboam, tu'ntzun tajb'en kyuj qe ja te kyk'ulb'il xjal mya nimal Dios qe.
34Tu'ntzun jlu e b'inchan qe tiyjil Jeroboam il, ex tu'ntzunju e naj te jumajx.
Who We AreWhat We EelieveWhat We Do
2025 by iamachristian.org,Inc All rights reserved.
