1Aqeye patrón, kyb'inchame aju tz'aqlxix ex tuj tumelxix kye kymajene, porke b'a'n kyu'ne ikx kyeye at jun kypatrone tuj kya'j.
2Kukx che na'ne Dios, che xq'uqine tuj na'j Dios ex kyq'onxe chjonte te Dios.
3Ax ikx che na'ne Dios qi'je, tu'n ttzaj tyek'un Qajaw jun tumel jatum tu'n t-xi qpakb'a'ne tyol Dios, ex tu'n t-xi qchik'b'a'ne tyol Crist aju attoq tuj ewaj nej; tu'ntzun tlaj ju yol lu pres qine.
4Che na'ne Dios wi'je, tza'n tten tu'n t-xi nchik'b'a'ne ju yol lu, porke il ti'j tu'n t-xi nma'ne.
5Tenx kynab'le tza'n tten tu'n kyb'ete tuj tumelxix kywitz xjal mya okslal qe; tz'ajb'enxwit tkyaqil q'ij kyu'ne tu'n kyb'inchanteye ju b'a'n.
6Cheb'a che yoline tkyaqil maj, atwit tchya'l kyyole, tu'ntzun tel kynik'e ti'j tza'n tten tu'n t-xi kytzaq'we'ne teyle junjun xjal.
Jun q'olb'eb'l tu'n Pablo te b'ajsb'il yol7Tkyaqilju tza'n ntene kxel ttx'olb'a'n Tíquico kyeye; atzun qerman at qk'u'j ti'j, in japunxix tu'n tuj tajb'eb'l, ex tmajen Qajaw junx quk'ile.
8Kyja'tzun ma txi nsama'ne Tíquico kyuk'ile, tu'ntzun kyb'inteye tza'n qtene, ex tu'n tq'uqb'anjtz kyk'u'je tu'n.
9Tuk'ix Onésimo ma txi nsama'ne, atzun jun erman at qk'u'j ti'j ex in japunxix tu'n tuj aq'untl, ax tzaj kyxole. Tkyaqilju in b'aj tzalu kxel kyma'n kyeye.
10In che'x q'olb'e'ne tu'n Aristarco aju at wuk'ile tuj pres; ex in che'x q'olb'e'ne tu'n Marcos, kyerman kyib' tuk'il Bernabé. O txi nma'ne jlu kyeye, qa ma pon Marcos kyuk'ile kyk'mome.
11Ex in che'x q'olb'e'ne tu'n Jesús aju Justo tb'i; o'kx qe jlu kyxol qe okslal judiy in che onin wuk'ile tu'n tpakb'et tkawb'il Dios, ex nim ma q'uqb'anjtz nk'u'je kyu'n.
12In che'x q'olb'e'ne tu'n Epafras aju tmajen Jesucrist ax tzaj kyxole. Kukx nno'k tilil tu'n tu'n tna'n Dios kyi'je, tu'ntzun kywe'xixe, ex tu'n ttz'aqet-xix kynab'le, ex tu'n tjapun kyu'ne tkyaqilju tajb'il Dios.
13Porke ma wile, tokxix tk'u'j Epafras kyi'je ex kyi'j qeju ate' tuj tman Laodicea ex kyi'j qeju ate' tuj tnam Hierápolis.
14In che'x q'olb'e'ne tu'n doktor Lucas aju at qk'u'j ti'j, ex in che'x q'olb'e'ne tu'n Demas.
15Kyq'onxe qq'olb'eb'le kye qe erman ate' tuj tnam Laodicea; ex kyq'onxe qq'olb'eb'le te Ninfas ex kye okslal nno'k kychmon kyib' tuj tja.
16Ok tb'aj sch'i'n ju u'j lu kyxole, kysamanxe tuj tnam Laodicea tu'n tjaw sch'i'n kyxol qe okslal, ax ikx ju u'j xi nsama'ne kye aj Laodicea, b'a'n tu'n tjaw kysch'i'ne.
17Kymanxe te Arquipo kyja': Q'o'nk tk'u'ja ti'j tu'n tjapun tu'na aju tajb'eb'la o tzaj q'o'n teya tu'n Qajaw.
18Aqine Pablo in xi ntz'ib'ane ju q'olb'eb'l lu tu'nx nq'ab'e. Kyna'ntze ti'j ju presb'il weye. Aju t-xtalb'il Dios tenwt kyuk'ile. Ikxwitju.
Who We AreWhat We EelieveWhat We Do
2025 by iamachristian.org,Inc All rights reserved.
