2 Timoteo 4 - Mam Huehuetenango New Ortography

1Kxel nkyuwsa'ne teya twitz Dios ex twitz Qajaw Jesucrist; porke tu'n Jesucrist che okel qe xjal tuj xjel tza'nx qeju itz' ikx qe kyimni ok tyek'unte tib' tuj tkawb'il.

2Kyja'tzun kxel nkyuwsa'ne teya tu'n t-xi tpakb'a'na tyol Dios, noq b'anin ttena, qa at amb'il ti'ja ex qa minti' amb'il ti'ja, pero il ti'j tu'n tyolina; na'ntza kyil xjal, mayonxa qe tu'n mi'n kyb'inchante mya b'a'n, q'onxa kynab'l tu'n tkyaqil tpasensa ex tuk'ix xnaq'tzb'il kye.

3Porke tzul tq'ijlalil mlay tzik'x kyu'n aju b'a'n xnaq'tzb'il, noq o'kx k'okel kyq'o'n nim xnaq'tzal kye ik tza'nx ju kyex kyajb'il, tu'nju at-xix kygan tu'n kyb'inte junxitl yol,

4ex mlay txi kyb'i'ntl aju yol axix tok, noq o'kx che elel txalpuj tu'n t-xi kyb'i'n ju yol la'jb'il.

5Atzun teya, kukx tu'n tten tnab'la, tzik'xku tu'na tuj tkyaqil, tz'aq'nana, pakb'anxa tqanil kolb'il, japunx tu'na aju tajb'eb'la.

6Ex ch'ix tpon or tu'n nkub'e ik tza'n jun oyaj, ex in laq'ex ttzaj tu'n wik'e tzalu twitz tx'otx'.

7Ma tz'ok tililxix wu'ne ik tza'n jun soldad tu'n tkub' ti'j mya b'a'n wu'ne, ma japun b'aj ju wojqelb'ile, ma tz'ok nkwentine ju okslab'l.

8Ja'lotzun at jun coron b'anin te weye tu'nju ma chin b'ete tuj tumelxix, aju ktzajel tq'o'n Qajaw weye tuj tq'ijlalil ok tul juntl maj, porke ate Qajaw jwes tz'aqlxix. Mya o'kx weye ktzajel tq'o'n oyaj, ax ikx kye kykyaqil qeju tok kyk'u'j ti'j ju tulel.

In tma'n Pablo te Timoteo alkye tu'n tb'inchante

9Aya Timoteo, tz'ok tililx tu'na tu'n tul naja ke'yilte weye.

10Porke ma chin kyaj koline tu'n Demas tu'nju ma tz'ok tq'o'n tk'u'j ti'j ju te twitz tx'otx' ex ma txi' tuj tnam Tesalónica. Atzunte Crescente ma txi' tuj tx'otx' Galacia, ax ikx te Tito ma txi' tuj tx'otx' Dalmacia.

11Junx te Lucas at wuk'ile. Tik'a q'ilte Marcos tu'n ttzaj tuk'ila, tu'nju at tajb'en weye tu'n tajb'en tuj aq'untl.

12Atzunte Tíquico ma txi nsama'ne tuj tnam Efeso.

13Oktzun ttzaja, q'intza nxb'alune ẍjo'w, aju kyaj nq'o'ne tuj tja Carpo tuj tnam Troas. Ex q'intza qe libro kyuk'ix qe libro tz'u'm; atzun mas il ti'j qe libro tz'u'm.

14Ate Alejandro aju tx'inol k'uxb'il, nimku mya b'a'n tb'incha wi'je. Awt Qajaw q'onte chojb'il te ti'j ju tb'inchb'en.

15Ax ikx teya kwentin ok tib'a te, ex nimxix in jaw q'ojl ti'j ju yol in xi qpakb'a'ne.

16Tej npon q'i'ne tnejel maj twitz kawil tu'n nyoline te kolb'il wib'e, mi jun o ten wuk'ile te onil weye; in kyaj koline kyu'n kykyaqil; kuchiwt minti' kyil ti'j jlu.

17Ex ate Qajaw o ten wuk'ile ex tzaj tq'o'n wipumale tu'ntzun t-xi npakb'a'ne tqanil kolb'il kye kykyaqil, tu'ntzun kyb'inte kykyaqil xjal mya judiy. Kyja'tzun in klete tuj ttzi b'alun.

18Ate Qajaw klolte weye te tkyaqil mya b'a'n, ex ok chin kletele tu'n, tu'n wokxe tuj tkawb'il tuj kya'j. Nimanxwit tb'i Qajaw tuj tkyaqil tab'q'iyil te jumajx. Ikxwitju.

Jun q'olb'eb'l tu'n Pablo te b'ajsb'il yol

19Q'onxa nq'olb'eb'le te Prisca ex te Aquila, ex kye qeju ate' tuj tja Onesíforo.

20Ate Erasto ma kyaj ten tuj tnam Corinto, atzunte Trófimo o yab't ex kyaj nq'o'ne tuj tnam Mileto.

21Tz'ok tililx tu'na tu'n ttzaj naja na'nxtoq tul jb'alil. In xi q'olb'e'na tu'n Eubulo, tu'n Pudente, tu'n Lino, tu'n Claudia ex kyu'n kykyaqil erman.

22Tenwt Qajaw Jesucrist tuk'ila. Tenwt t-xtalb'il Dios kyuk'ile kykyaqile. Ikxwitju.