Éxodo 8 - Mam Huehuetenango New Ortography

1tzaj tma'n Qman te Moisés:

—Tokxa twitz Faraón ex q'manxa te: Chi Qmane aju Qdiose kyja': Che ttzoqpi'mexa qe xjal etzan wu'ne tu'n kyk'ulun weye.

2Qatzun mi'n ma che ex ttzoqpi'na, che k'ixb'iseteltzun xjal wu'ne kyu'n ẍal tuj tkyaqil tx'otx' Egipto.

3Che ul tpoq'sa'n nima nim ẍal, che jawitz tuj a', che okex tuj tjaya, che okex jatum in tana, che jawix twi twatb'ila, che okex tuj kyja qeju at kyoklen ttxlaja ex tuj kyja qe t-xjalila, che okex tuj kyjorniye, ex che b'elex kyuj qe kychoke jatum in xyoq'it pan.

4Che jawix t'ikpaj tib'aja, kyib'aj qe t-xjalila ex kyib'aj kykyaqil qeju at kyoklen ttxlaja, chikuya te Faraón, chi Dios.

5Tzaj tma'ntl Qman te Moisés:

—Q'manxa te Aarón tu'n t-xi tnuqpi'n tq'ab' tuk'il tky'aqo'ch kyib'aj qe nima, kyib'aj qe toma ex kyib'aj qe najab', tu'n kyjatz ẍal kyuj, tu'n tnoj twitz tx'otx' Egipto kyu'n.

6Xitzun tnuqpi'n Aarón tq'ab' kyib'aj qe nima tuj Egipto, e jatztzun ẍal, ex b'aj noj tkyaqil twitz tx'otx' Egipto kyu'n.

7Ax ikx kye chman o kyb'incha jlu tu'n kymañ, ex e jatz ẍal kyu'n tuj a' tuj tx'otx' Egipto.

8E tzajtzun txko'n Moisés ex Aarón tu'n Faraón ex xi tma'n kye kyja':

—Che kub'sane twitz Kymane aju Kydiose tu'n kyel ti'n qe ẍal wi'je ex kyi'j qe nxjalile, ex jakutzun che ex ntzoqpi'ne qe kyxjalile tu'n kyxi' q'olte chojb'il te Kymane aju Kydiose, chi Faraón.

9Xi ttzaq'we'n Moisés te Faraón:

—Q'mantza jtoj taja tu'n nkub'sane ti'ja, kyi'j qeju at kyoklen ttxlaja ex kyi'j qe t-xjalila, tu'ntzun kyel q'i'n qe ẍal kyi'je ex tuj kyjaye ex o'kx tu'n kykyaj ten tuj nima.

10Xi ttzaq'we'n Faraón:

—Nchi'jxi, chi Faraón.

Xi tma'n Moisés te:

—Kb'antel ik tza'n ma tmaya, tu'ntzun tel tnik'a ti'j qa mi a'l juntl ik tza'n te Qmane, aju Qdiose.

11K'elel kypa'n kyib' qe ẍal ti'ja, kyi'j qe tjaya, kyi'j qeju at kyoklen ttxlaja ex kyi'j qe t-xjalila, ex o'kxtzun che kyjel ten tuj nima, chi Moisés.

12E etztzun Moisés ex Aarón twitz Faraón ex kub'san Moisés twitz Qman tu'n kyel ti'n qe ẍal, aqeju otoq che tzaj t-sama'n ti'j Faraón.

13O tb'incha Qman ik tza'n o tma Moisés. E b'aj kyim qe ẍal tuj kyja xjal, ttxa'n kype'n ex tuj kojb'il.

14E b'aj chmo'n qe ẍal kyu'n aj Egipto, junx e kub' kyb'uyb'a'n, ex b'aj tzuwix tkyaqil tx'otx' Egipto kyu'n.

15Tejtzun tke'yinte Faraón otoq che el q'i'n qe ẍal ex minti'tltoq in yajlanjtz, kub' tkyuwsa'n tanmi ex minti' xi tq'o'n twi' ti'j tyol Moisés ex Aarón, ik tza'n otoq tma Qman.

Aju k'ixb'isab'l kyu'n xmisaq

16Xitzun tma'n Qman te Moisés kyja':

—Q'manxa te Aarón tu'n t-xi tnuqpi'n tky'aqo'ch, ex e tkub' tpeq'un tquqil tx'otx', tu'n tok te xmisaq tuj tkyaqil tx'otx' Egipto.

17Kyb'inchatzun ikju. Xi tnuqpi'n Aarón tq'ab' tuk'il tky'aqo'ch, kub' tpeq'un tquqil tx'otx', ex e ok chmet xmisaq kyi'j qe xjal ex kyi'j qe alumaj, ex ok tkyaqil tquqil tx'otx' te xmisaq tuj tkyaqil tx'otx' Egipto.

18Ax ikx ok tilil kyu'n chman tu'n kyjaw jlet xmisaq tu'n kymañ, ex minti' o b'ant kyu'n. E ok kychmon kyib' xmisaq kyi'j xjal ex kyi'j alumaj.

19Xitzun kyma'n qe chman te Faraón kyja':

—Tu'n Dios te jlu, che chi.

Maske ikju, ex kub' tkyuwsa'n tanmi Faraón, ex minti' xi tq'o'n twi' ti'j tyol Moisés ex Aarón, ik tza'n otoq tma Qman.

Aju k'ixb'isab'l kyu'n xkatz

20Xi tma'n Qman te Moisés kyja':

—Primx jaw we'ya nchi'j, we'kuya twitz Faraón ok tku'x ttzi a', ex q'manxa te, chi Qmane kyja': Che ttzoqpi'mexa qe xjal etzan wu'ne tu'n kyk'ulun weye.

21Qatzun mi'n ma che ex ttzoqpi'na, che tzajeltzun nsama'ne xkatz ti'ja, kyi'j qeju at kyoklen ttxlaja, kyi'j qe t-xjalila ex kyuj qe kyjaye. Knojel kyja aj Egipto kyu'n xkatz, ax ikx tkyaqil tx'otx' jatum najl qe.

22Tuj q'ij lu k'elel npa'ne tx'otx' Gosén, jatum najl qe xjal etzan wu'ne, ex mlay jaw jlet xkatz ma chixin, tu'ntzun tel tnik'a ti'j qa aqine Kyman aju Kydios aj Israel, ex atine tuj tx'otx' Egipto.

23Che elel npa'ne qe xjal etzan wu'ne kyi'j qe t-xjalila. Nchi'j b'ant aju techal lu, chikuya te Faraón.

24Tb'inchatzun Qman ikju. Chmet nimxix xkatz tuj tja Faraón ex tuj kyja qeju attoq kyoklen ttxlaj, ex b'aj naj tkyaqil tx'otx' Egipto kyu'n xkatz.

25E tzajtzun txko'n Moisés ex Aarón tu'n Faraón, ex xi tma'n kye kyja':

—Kyxi'ye, ex kyq'onxe chojb'il te Kydiose, pero ax tuj tx'otx' lu, chi Faraón.

26Xitzun ttzaq'we'n Moisés:

—Mya b'a'n tu'n tb'ant qu'ne ikju, porke aju chojb'il kxel qq'o'ne te Qmane aju Qdiose, mya b'a'n tuj kywitz aj Egipto, ex qa ma txi qq'o'ne chojb'il mya b'a'n tuj kywitz, jakulo qo ok xo'ne tu'n ab'j kyu'n.

27Il ti'j tu'n qxi b'ete ox q'ij tuj tzqij tx'otx', ex atzun kxel qq'o'ne chojb'il te Qmane aju Qdiose, ik tza'n o tzaj tma'n qeye, chi Moisés.

28Xitzun tma'n Faraón kye:

—Jaku txi nq'o'ne amb'il kyeye tu'n kyxi'ye q'olte chojb'il te Kymane aju Kydiose tuj tzqij tx'otx', pero mi'n che'xe najchaq. Che na'ne Dios wi'je, chi Faraón.

29Xi ttzaq'we'n Moisés:

—Ok wexe twitza, chin kub'sale twitz Qmane aju Qdiose tu'n kyel ti'n qe xkatz nchi'j, tu'n kyel ti'n ti'ja, kyi'j qeju at kyoklen ttxlaja ex kyi'j qe t-xjalila, pero mi'n qo kub' t-sb'u'na tu'n mi'n qex ttzoqpi'na, aqo'ye aj Israel, tu'n t-xi qq'o'ne chojb'il te Qmane aju Qdiose, chi Moisés.

30Etztzun Moisés twitz Faraón, ex o kub'san twitz Qman.

31Tb'inchatzun Qman ik tza'n tma Moisés, e je'l ti'n qe xkatz ti'j Faraón, kyi'j qeju attoq kyoklen ttxlaj ex kyi'j qe t-xjalil, ex mi jun xkatz kyaj ten.

32Ex kub' tkyuwsa'n Faraón tanmi ex minti' e je'tz ttzoqpi'n qe aj Israel.