Malaquías 1 - Mam Huehuetenango New Ortography

Aju tk'ujlalil Dios kyi'j aj Israel

1Atzun yol jlu tzaj tma'n Qman te Malaquías aju t-sanjel tu'n t-xi tma'n kye aj Israel.

2Chi Dios kye kyja': K'ujla'n qeye wu'ne, atzun kyeye in kyma'ne: ¿Tza'n tten in tma'na qa k'ujla'n qo'ye tu'na?. Atzunte Qman tzaj ttzaq'we'n: ¿Baqa mya kyerman kyib' Esaú tuk'il Jacob, ex a Jacob nk'ujlaye,

3atzunte Esaú el wik'une? Aju tiwitz tx'otx' te Esaú ok wu'ne te tzqij tx'otx' ex xi nq'o'ne ttx'otx' tu'n tajb'en kye txkup te tjaq' k'ul.

4Ex qa che chi aj Edom: Maske ma qo naje pero che jawil qb'incha'ne juntl maj qe qtanmiye, qa che chi, atzunte Dios aju Tajaw Tkyaqil in tma'n: Kjawil kyb'incha'n juntl maj, atzun weye kb'el nxitune, ex aju tnam lu k'okel tb'i: Tnam jatum in b'inchet nim mya b'a'n, ex aju nasyon k'okel tb'i: Nasyon tkub' ttx'u'jil Dios tib'aj te jumajx.

5Ax qeye che ke'yilte ex ok kyma'ye: Ma'xix te Qman toklen, max ma pon b'aj tqanil ti'jxi tmojonil kytx'otx' aj Israel.

E ok ik'le'n qe pal tu'n Qman

6Chitzun Qman aju Tajaw Tkyaqil in xi tma'n kye qe pal: Qe k'wa'lb'aj in che niman kyman, ex qe majen in che nimante kypatrón. Qatzun aqine Kymane, ¿tiqu'ntzun minti' in chinx kynimane? Ex qa aqine Kyajawe, ¿tiqu'ntzun minti' in che xob'e nwitze? Ik'un qine kyu'ne ex in kyma'ne: ¿Alkyetzun ma qb'inchaye twitza tu'nju in tma'na qeye qa ik'una qu'ne?.

7Atzun ik'b'il weye kyu'ne jlu: In kub' kyq'o'ne qe pan tz'il tib'aj n-altare ex in kyma'ne weye: ¿Alkyetzun ma qb'inchaye tu'nju in tma'na qeye qa in qb'incha'ne mya b'a'n ti'ja?. Ok in kub' kyximane qa minti' toklen n-altare atzun in kyb'incha'ne mya b'a'n weye,

8ok in tzaj kyq'o'ne qe alumaj moẍ weye ex qe kox, ex qe yab': ¿B'a'npe jlu? Kyxi'chaqe ex kyq'onxe te gobernador, jakutzun kyile qa jaku tzalaj ti'j kyoyaje ex qa jaku che tzaj xtaline tu'n, chi Qman aju Tajaw Tkyaqil.

9Kyqaninxe te Dios tu'n ttzaj tz'e'y tk'u'j qi'j. Ex ¿ti tten tu'n ttzalaj Dios kyi'je qa kukx ma txi kyq'o'ne kyoyaje mya b'a'n?

10Chitzun Qman aju Tajaw Tkyaqil: Noqwit at jun kyeye xi lamolte ttzi njaye tu'ntzun mi'n tkub' k'opit q'aq' noqx gan tib'aj n-altare, porke minti' in chin tzalaje kyi'je ex mlay nk'amtle kyoyaje.

11Kykyaqil nasyon twitz tx'otx' che nimal weye, ex tuj tkyaqil part kb'el kypatun storak te nimb'il weye, ex tb'anilxix kyoyaj ktzajel kyq'o'n weye.

12Atzun kyeye nno'k kyq'o'ne n-altare te minti' tajb'en ok in kyma'ne qa tz'il ex qa minti' tajb'en aju oyaj in kub' q'ot tib'aj.

13Ax ikx in kyma'ne kyja': Ma qo sikte ti'j tkyaqil jlu. Atzun in chin el kyik'une, chi Qman aju Tajaw Tkyaqil. In che tzaj kyi'ne qe alumaj elq'a'n in che tzaj kyu'ne ex qe kox ex qe yab'. ¿Okpe che k'metel qe kyoyaje lu wu'ne? Mlay, chi Qman.

14Tzajxwit tcastiw ju xjal in nik'an yol tu'nju otoq tzaj ttziyan tu'n ttzaj tq'o'n weye jun alumaj tb'anilxix kyxol qe talun, ex te tib'ajxi in tzaj tq'o'n aju alumaj at ttzakaj. Aqine rey ma' woklene ex in che xob' qe nasyon nwitze. Atzun yol jlu in tma'n Qman, aju Tajaw Tkyaqil.