2 Corinto 10 - Mam Huehuetenango New Ortography

Aju toklen Pablo te apostol

1Aqine Pablo, ax qine chin kub'sale kywitze tu'nju mans te Crist ex tb'anilxix. Ik tza'n atine kyuk'ile mans qine, ex ik tza'n mi a'l qine kyuk'ile kyuw in chin yoline kyeye, che chiye.

2Kyja'tzun chin kub'sale kywitze, ok npone kyxole kuchiwt mya il ti'j tu'n nyoline kyuw, porke b'anin ntene tu'n kyok wik'le'ne qeju in che yolin qi'je, in kyma'n qa in qb'incha'ne qexe qajb'ile, ik tza'n in kyb'incha'n txqantl xjal.

3Maske xjal qo'ye ik tza'n qe txqantl xjal, pero aju q'oj nno'k qu'ne mya ik tten ik tza'n kye xjal.

4Porke aju qmakb'ile in ajb'en tuj q'oj mya ik tza'n kye xjal, aju qmakb'ile at tipumal tu'n Dios tu'n tkub' kyi'j qeju at kyipumal ex aj q'oj qe ti'j Dios.

5Kyja'tzun, qe xjal in che q'ojl ti'j tyol Dios in che kub' nume' qu'ne, ex in kub' xitj qu'ne tkyaqilju maqb'il in kub' kyq'o'n xjal tu'n mi'n tel kynik' txqantl xjal ti'j Dios, ex in kub' ti'j kynab'l xjal qu'ne tu'n t-xi kyniman Crist,

6ex b'anin qtene tu'n tkub' qq'o'ne kycastiw qeju mib'an che niman, qa kuyin kyu'ne kykyaqile tu'n t-xi kynimane qyole.

7Kyeye o'kx tok kywitze ti'j tza'n ke'yin xjal. Qa at jun q'uql tk'u'j ti'j qa te Crist, ximanx ti'j jlu, ik tza'n te ma txi tq'on tib' te Crist, ikx qeye te Crist qo'ye.

8Ex maske nim in chin yoline ti'j qoklene tzaj tq'o'n Qajaw, pero mlay chin ch'ixwiye, porke aju qoklene tzaj tq'o'n Qajaw tu'n tok mastl kynab'le, mya tu'n tkub' xitj kynab'le.

9Mi'n waje tu'n kyximane wi'je qa in che ok nsek'pu'ne kyu'n qe u'j ma che'x nsama'ne.

10Tu'nju at junjun in q'mante: Aju u'j tu'n Pablo puro kyuw tyolb'il, atzun ok in ten quk'il minti'xix tipun ex ju tyol minti' tajb'en, che chi.

11Aju xjal in q'mante jlu, ximanx ti'j jlu, aju ma txi nma'ne tuj u'j mi a'l qine kyuk'ile, axju ok nb'incha'ye ok npone kyuk'ile.

12At tchi qi'je tu'n tok qq'on qib'e junx kyuk'il qeju in b'aj kyyolin kyib', ex mlay txi qma'ne qa junx qoklene kyuk'il. Atzun qe jlu kyu'nx nno'k kyq'o'n kyoklen, ex tuj kynab'l qa o'kx aqe b'a'n qe, pero minti' kynab'l.

13Atzun qeye minti' in qo ik'e tib'aj tu'n tb'aj qyolin qib'e, o'kx tu'n qkanune jatum ma tzaj techan Dios qeye, tu'n qpon kanune max kyuk'ile.

14Minti' in qo exe ti'jxi aju ma tzaj techan Dios qeye; noqwit mya nej o pone kyxole, ex jakulo kymaye qa noq qu'nxe ma qo exe ti'jxi, pero aqo'ye o pon neje kyxole xi qpakb'ane tqanil b'a'n kyeye, aju in yolin ti'j Crist.

15Minti' ma qo okxe tuj taq'unb'en juntl tu'n t-xi qma'ne qa qeye qaq'unb'ene. Atzun qajb'ile, tu'n tch'iy qaq'unb'ene kyxole ex tu'n tex laq'e' tu'nju kyokslab'le in ch'iy. O'kx qaje tu'n qaq'nane jatum ma tzaj techan Dios qeye.

16Atzun qajb'ile, tu'n t-xi qpakb'a'ne tqanil kolb'il kyuj txqantl tnam ti'jxi jatum ate'ye, ex mya tu'n qokxe tuj taq'unb'en juntl, ex mya tu'n t-xi qma'ne qa qeye qaq'unb'en.

17Alkye taj tu'n tjaw tniman tib' ti'j taq'unb'en, mas b'a'n tu'n tjaw tnimsa'n tb'i Qajaw tu'nju taq'unb'en.

18Porke mya aju xjal in b'aj tyolin tib' in k'met tu'n Dios, noq o'kx in k'met tu'n Dios aju xjal b'a'n nne'la taq'unb'en twitz Qajaw.