1 Crónicas 11 - Mam Huehuetenango New Ortography

Ok David te rey kye aj Israel ex kye aj Judá 2 Samuel 5.1-5

1Ok kychmon kyib' kykyaqil aj Israel tu'n kyxi' yolil tuk'il David tuj tnam Hebrón, ex atzun xi kyma'n te kyja': Ax termaniya qo'ye,

2axix tok, maske atoq te Saúl tok te rey, pero aya in xi ẍaqlunte kye aj Israel tuj q'oj. Ax ikx o tzaj tma'n Qman aju Tdiosa teya kyja': Aya k'okel kwentin kye xjal etzan wu'ne, ex aya k'okel te nejenel kye, che chi aj Israel.

3Kyja'tzun tten e je'x kykyaqil qe kytijil xjal aj Israel yolil tuk'il David max tuj tnam Hebrón; atzunte David b'ant ti'j jun tyol kyuk'il, ex ok tq'o'n Qman te testiw ti'j. Atzun kye ok kyq'o'n toklen David tu'n tok te rey kyib'aj aj Israel, ik tza'n otoq tzaj ttziyan Dios te Samuel.

Kub' ti'j cuartel tuj Sión tu'n David 2 Samuel 5.6-10

4E je'x David kyuk'ix kykyaqil aj Israel tuj Jerusalén aju tok juntl tb'i Jebús. Atzun najl qe aj Jebuseo tuj tx'otx' lu,

5ex xi kyma'n te David: Teya mlayx tz'oktza tzalu, che chi. Maske ikju, pero kub' ti'j cuartel tuj Sión tu'n David, aju tok tb'i ja'lo Ttanmi David.

6Atzunte David otoq tma kyja': Alkye ma tz'ok tzoqpaj q'ojlel tnejel kyi'j aj Jebuseo, k'okel nq'o'ne toklen te nejenel kye soldad, chi David. Ex aju ok tzoqpaj tnejel tu'n tq'ojin, atzun Joab aju tal Sarvia, ex oktzun q'o'n toklen xjal lu te nejenel kye soldad.

7Atzunte David ax kyaj ten najal tuj cuartel; tu'ntzunju ok kyq'o'n tb'i lugar lu Ttanmi David.

8Ex jaw tb'incha'n David tnam ti'jele, xi qe' ti'j lugar otoq b'aj nojsa'n tuj tu'n tok te chq'ajlaj, ex jaw tb'incha'n muro tkyaqil ti'jele. Atzunte Joab xi tb'incha'n mijtl tnam.

9Aju tipumal David kyja' t-xi' jawni ex attoq Qman tuk'il, aju Tajaw Tkyaqil.

Qe t-soldad David kyuw kyk'u'j tuj q'oj 2 Samuel 23.8-39

10Atzun qe soldad lu ate' tuk'il David mas kyuw kyk'u'j tuj q'oj, ax ikx e onin ti'j tu'n tkawin, kyuk'ix kykyaqil aj Israel, ex ok kyq'o'n David te rey, ik tza'nx otoq kyaj tma'n Qman kye.

11Atzun jun tajlal lu kyi'j qe soldad kyuw kyk'u'j tuj q'oj ate' tuk'il David: Ox kyb'aj soldad kyuwxix kyk'u'j tuj q'oj, ex ate Jasobeam aju tky'ajal Hacmoni tok te nejenel kye. At jun maj kub' tb'yo'n ox syent xinaq tu'n tlans.

12Atzun tkab'in Eleazar tb'i, aju tky'ajal Dodo aju aj Ahohitas, atzun jun kyxol qeju oxe kyuwxix kyk'u'j tuj q'oj.

13Ate Eleazar o ten tuk'il David tuj Pas-damim tej tok kychmon kyib' aj Filisteo tuj lugar lu tu'n kyq'ojin kyi'j aj Israel. Tuj lugar lu attoq jun kojb'il awa'n tqan sebad tuj, ex tej kyel oq qe soldad aj Israel kywitz aj Filisteo,

14atzunte Eleazar minti' el oq, ax kyaj we' kywitz aj Filisteo tuj tmij kojb'il kyuk'ix qe tuk'il, e ok ten q'ojlel ex kub' kyi'j kyu'n. Kyja'tzun tten, ate Qman tzaj oninte kye tu'n kykamb'an.

15At jun maj at ox kyxol qe 30 soldad kyuw kyk'u'j tuj q'oj e je'x kanul ti'j David t-xe pik Adulam. Atzun qe soldad aj Filisteo atzun kykub'sa'n tuj chq'ajlaj Refaim.

16Atzun ta'toq David tuj cuartel tej kypon txqan soldad aj Filisteo tuj Belén.

17Tzajtzun txqetle'n ti'j David ex tma kyja': Noqwit at jun saj q'inte ch'in nk'a'ye a', aju tku'x tuj xoch tkub' ttzi tlamel tnam Belén, chi David.

18Aqeju ox xinaq kyuwxix kyk'u'j tuj q'oj e okx tuj campament kye aj Filisteo, jatz kyi'n a' tuj xoch tkub' ttzi tlamel tnam Belén, ex xi kyi'n tuk'il David. Ex minti' tkuya David tu'n t-xi tk'a'n, noq o'kx kub' tqo'n twitz tx'otx' te jun oyaj te Qman,

19ex tma: Awt Dios onin weye tu'n mi'n t-xi nk'a'ne a' lu, ex qa ma txi nk'a'ne, junx ta' jlu mer ik tza'n a kychk'el qe xinaq kxel nk'a'ne, aqeju xi kyoyin kyib' tu'n kykyim tej ẍe'x aj q'ilte a', chi David, ex minti' xi tk'a'n.

Atzun jlu o b'ant kyu'n qeju ox soldad kyuwxix kyk'u'j tuj q'oj.

20Ate Abisai aju terman Joab toktoq toklen te nejenel kyi'j qeju 30 soldad kyuw kyk'u'j tuj q'oj. At jun maj ok tzoqpaj q'ojlel kyi'j ox syent xinaq tu'n tlans ex e kub' tb'yo'n. Kyja'tzun e yolin xjal ti'j qa mas at tnab'l tu'n tq'ojin kywitz qeju 30 xinaq,

21ex o tk'am mas nimb'ilte kywitz qe txqantl tuk'il, ex ok q'o'n toklen te nejenel kye. Ex minti' o pon ik tza'n qeju oxe te tnejel.

22Ax ikx ate Benaía aju tky'ajal Joiada, aju najl tuj tnam Cabseel. Aju xinaq lu kyuwxix tk'u'j tuj q'oj, o tb'incha nimku b'inchb'en ex kub' tb'yo'n kab'e xjal aj Moab nim kyipun. At jun q'ij tej tkub' nim ttxa che'w, ku'x tuj jun toy' jul ex tujx jul lu kub' tb'yo'n jun b'alun.

23Ax ikx kub' tb'yo'n Benaía jun aj Egipto ma'xix twa'l, aju twa'l b'alo te ox var, ex q'i'ntoq jun tlans ma' tk'itz ex ma' tqan. Ok tzoqpaj Benaía ti'j xjal lu tuk'il jun tze', el ti'n tlans tuj tq'ab', ex kub' tb'yo'n tu'nx tlans.

24Tu'nju tb'inchb'en Benaía lu, aju tky'ajal Joiada, e yolin xjal ti'j qa mas at tnab'l tu'n tq'ojin kywitz qeju 30 xinaq kyuw kyk'u'j tuj q'oj,

25ex o tk'am mas nimb'ilte kywitz qe txqantl tuk'il, ex minti' pon ik tza'n qeju oxe tnejel. Ex ok tq'o'n David toklen Benaía te nejenel kye qeju xq'uqil te.

26Aqeju kyuw kyk'u'j tuj q'oj, atzun qe jlu: Asael aju terman Joab, Elhanán aju tky'ajal Dodo, aju aj Belén,

27Samot aju aj Harod, Heles aju aj Pelón,

28Ira aju tky'ajal Iques, aju aj Tecoa, Abiezer aju aj Anatot,

29Sibecai aju aj Husa, Ilai aju aj Ahoh,

30Maharai aju aj Netofa, Heled aju tky'ajal Baana, ex ax aj Netofa,

31Itai aju tky'ajal Ribai, ex aj Gabaa aju ta' tuj tx'otx' kye aj Benjamín, Benaía aju aj Piratón,

32Hurai aju najl ttzi tq'ab' xaq Gaas, Abiel aju aj Arba,

33Azmavet aju aj Bahurim, Eliaba aju aj Saalbón,

34qe tky'ajal Jasem aju aj Gizón, Jonatán aju tky'ajal Sage ex aj Harar,

35Ahíam aju tky'ajal Sacar, aju ax aj Harar, Elifal aju tky'ajal Ur,

36Hefer aju aj Mequera, Ahías aju aj Pelón,

37Hezro aju aj Carmel, Naarai aju tky'ajal Ezbai,

38Joel aju terman Natán, Mibhar aju tky'ajal Hagrai,

39Selec aju aj Amón, Naharai aju aj Beerot, a jlu iqal qe makb'il in che ajb'en tuj q'oj tu'n Joab aju tal Sarvia,

40Ira aju aj Jatir, Gareb aju ax aj Jatir,

41Urías aju aj Heteo, Zabad aju tky'ajal Ahlai,

42Adina aju tky'ajal Siza aju aj Rubén, ex aju xjal lu nejenel kye qe tiyjil Rubén ex uk'in 30 xinaq tu'n,

43Hanán aju tky'ajal Maaca, Josafat aju aj Mitán,

44Uzías aju aj Astarot, Sama tuk'ix Jehiel, aqe jlu tky'ajal Hotam qe ex aj Aroer qe,

45Jediael aju tky'ajal Simri, tuk'ix Joha aju ax terman, aqe jlu aj Tiza,

46Eliel aju aj Mahavi, Jerebai tuk'ix Josabía, aqe jlu tky'ajal Elnaam qe, Itma aju aj Moab,

47Eliel, Obed ex Jaasiel, aqe jlu aj Soba qe.