Éxodo 37 - Mam Huehuetenango New Ortography

B'ant kax k'ub'l tley Dios Éxodo 25.10-22

1Ax ikx tb'incha Bezaleel aju kax ti'j tze' ch'i'x acacia, te jun var tuk'il jun xk'achub' tnuqb'il, ox xk'achub' twitz ex ox xk'achub' twa'l.

2Ok tlo'tzin q'an pwaq tb'anilxix tujile ex ti'jele ex kub' tq'o'n jun adorn ttxa'nile, q'an pwaq ttx'otx'il.

3Ax ikx e kub' tb'incha'n kyaje argoy q'an pwaq kytx'otx'il, ex e ok tq'o'n kyi'j kykyajil tqan kax, kab'e jun pak' ex kab'etl juntl pak'.

4Ax ikx tb'incha kab'e tze' tolin kyi'j ti'j tze' ch'i'x acacia, ex ok tlo'tzin q'an pwaq kyi'j.

5Extzun tq'o'n qe jlu kyuj qe argoy ate'k ttxlaj kax, tu'n t-xi tanut kax kyi'j.

6B'aj tb'incha'n aju tmaqsil q'an pwaq tb'anilxix ttx'otx'il, te jun var tuk'il jun xk'achub' tnuqb'il ex ox xk'achub' twitz.

7Ax ikx b'aj tb'incha'n kab'e tilb'ilal querubín q'an pwaq kytx'otx'il tx'ino'n qe tu'n martiy, ex e kub' tq'o'n kyib'aj kykab'il pak' ttxa'n tmaqsil kax.

8Jun tkub' tib'aj jun pak' ttxa'n tmaqsil ex jun tib'aj juntl pak'. Te junx piẍ el aju tmaqsil ex qe kab'e tilb'ilal querubín.

9Lik'un tten kyxik' tu'n ttxayit tmaqsil kax, kyja'tzun aju twitz jun kub' ten twitz juntl, ex kyja' in kub' kyke'yin tib'aj tmaqsil.

B'ant mes tu'n kykub' ten pan tib'aj Éxodo 25.23-30

10B'aj tb'incha'n mes ti'j tze' ch'i'x acacia, jun var tnuqb'il, kab' xk'achub' twitz ex ox xk'achub' twa'l.

11Ok tlo'tzin q'an pwaq tb'anilxix ti'j, ex kub' tq'o'n jun adorn ttxa'nile q'an pwaq ttx'otx'il.

12Ax ikx tb'incha jun tmaqel ttxa'nile mes, kyaje q'ab' twa'l ex ok tq'o'n jun adorn ttxa'nile q'an pwaq ttx'otx'il.

13Tb'incha kyaje argoy q'an pwaq kytx'otx'il, ex e ok tq'o'n kyi'j kykyajil pak' ttxa'n mes kyi'j tqan.

14Atzun ate'k qe argoy lu tjaq' tmaqel, tu'n kyokx qe tze' tolin kyi'j kyuj, tu'n t-xi tanut mes.

15Tb'incha qe tze' ti'j tze' ch'i'x acacia, tu'n t-xi tanut mes kyi'j, ex ok tlo'tzin q'an pwaq kyi'j.

16Ax ikx tb'incha qe makb'il in che ajb'en tib'aj mes, q'an pwaq tb'anilxix kytx'otx'il: Qe laq, qe pak', qe xar ex qe matij vas in che ajb'en te qob'l oyaj ti'j ta'l twitz uva.

B'ant kykub'il kandil q'an pwaq Éxodo 25.31-40

17Ax ikx tb'incha jun kykub'il kandil, q'an pwaq tb'anilxix ttx'otx'il tx'ino'n tu'n martiy. Te junx el aju tq'uqb'il, aju tqan, qe tcopa, qe tilb'ilal xwakin kyten ex qe tilb'ilal b'ech.

18In che el qaq tq'ab' ti'j tk'u'j, ox tuj jun pak' ex ox tuj juntl pak'.

19Ti'j teyle junjun tq'ab' nne'l ti'j tk'u'j ate'k ox tilb'ilal b'ech tjaq'xi, ik tten b'inchb'en kye ik tza'n t-xmakal tze' almendro.

20Ti'j ju tqan, tuj tmij kykub'il kandil ate'k kyaje tilb'ilal b'ech tjaq'xi, ik tten b'inchb'en kye ik tza'n t-xmakal tze' almendro;

21tjaq' teyle junjun moj tq'ab' nne'l ti'j tk'u'j at jun tilb'ilal b'ech tjaq'xi, ik tten b'inchb'en kye ik tza'n t-xmakal tze' almendro.

22Qe tilb'ilal b'ech ex qe tq'ab' e je'l ti'j junx piẍ q'an pwaq tb'anilxix, ex tx'ino'n tu'n martiy.

23Ax ikx tb'incha wuq kandil ti'j q'an pwaq tb'anilxix, kyuk'il matzb'il twi mech ex qe tal tkub'il ttza'jil mech.

24Ajb'en 75 libr q'an pwaq tb'anilxix tu'n tu'n tb'ant aju kykub'il kandil ex kykyaqil qe makb'il in che ajb'en ti'j.

B'ant altar tu'n tkub' patit storak Éxodo 30.1-5

25Ax ikx tb'incha aju altar tu'n tkub' patit storak tib'aj. Tb'incha ti'j tze' ch'i'x acacia, kab' xk'achub' twitz, kab' xk'achub' tnuqb'il ex jun var twa'l; junx kyaj twitz tuk'il tnuqb'il ex kyiqlix kyib' qe tkach ti'j.

26Ok tlo'tzin q'an pwaq tb'anilxix kyi'jele kykyajil pak' ttxlaj, tuk'ix tib'aj ex kyi'j qe tkach, ex kub' tq'o'n jun adorn ttxa'nile te tib'aj, q'an pwaq ttx'otx'il.

27Kyi'j kab'e tb'utx' te jun pak' tjaq'xi adorn, e ok tq'o'n kab' argoy q'an pwaq kytx'otx'il, ex kab'e kyi'j kab'etl tb'utx' ti'j juntl pak', tu'ntzun kyex qe tze' tolin kyi'j kyuj, aqeju in che ajb'en tu'n t-xi tanut.

28Tb'incha qe tze' lu ti'j tze' ch'i'x acacia ex ok tlo'tzin q'an pwaq kyi'j.

B'inchet storak tuk'ix aseyt Éxodo 30.22-38

29Ax ikx tb'incha aju aseyt tu'n tjax qet tuj twi' jun xjal ok tok toklen, ex aju storak tb'anilxix at tk'ok'jal, ik tza'n in b'ant kyu'n xjal b'inchal perjum.