Levítico 19 - Mam Huehuetenango New Ortography

Qe ley tu'n kyanq'in aj Israel tuj kytx'otx'

1Tzaj yolin Qman tuk'il Moisés, ex tma:

2—Q'manxa kye tnam xjal aj Israel qe yol lu: Che okxe xjan, porke weye xjan qine, aqine Kymane ex Kydiose.

3Teylex junjun kyeye nimanx tman ex ttxu'.

Ax ikx mi'n che aq'nane tuj q'ij te ojlab'l. Aqine Kymane ex Kydiose.

4Mi'n che k'ulune kywitz qe tilb'ilal, ex mi'n b'aj kyb'incha'ne jun kydiose ti'j k'uxb'il otoq kub' ulj tuj q'aq'. Aqine Kymane ex Kydiose.

5Ok t-xi kyq'o'ne jun oyaj te mojb'ab'l tib'il nwitze, kyq'ontze tujxix tumel, tu'ntzun tk'met wu'ne.

6B'i'x kxel chyo't alumaj tujx q'ij ok ttzaj q'ot te weye, ax b'a'n tu'n t-xi kychyo'ne tuj tkab'in q'ij; qatzun ma kyaj ten ch'intl tuj toxin q'ij, il ti'j tu'n tkub' patit.

7Qatzun ma txi kychyo'ne ch'in oyaj tuj toxin q'ij, a jlu mya b'a'n tuj nwitze ex mlay k'met wu'ne.

8Qa at jun ma txi chyo'nte te at til ti'j, tu'nju mya xo'n tu'n aju oyaj otoq tzaj tq'o'n weye, ex b'i'x k'elex lajet tu'ntzun mi'n ttentl kyxol t-xjalil.

9Ok tjaw kychmo'ne twitz kyawale, il ti'j kyjel kyq'o'ne ch'in ttxa'nile kojb'il, ex mi'n che aje sakwilte aju otoq kyaj tz'aq,

10ex mi'n che aje sakwilte junjun pnuj twitz uva otoq kyaj ten twi tqan, ex mi'n jaw kysk'o'ne aju otoq tzaj tz'aq; kyq'onkje jlu kye meb'a ex kye b'etin xjal. Aqine Kymane ex Kydiose.

11Mi'n che elq'ane. Mi'n b'aj kysb'un kyib'e ex mi'n che nik'ane yol kyxolxe.

12Mi'n txi kyma'ne tzqan Dios tu'n tajb'en nb'iye kyu'ne ti'j jun yol mya ax tok, porke tu'n jlu nno'k kyq'o'ne nb'iye te minti' tajb'en, aqine Dios.

13Mi'n kub' kyyajla'ne kyuk'ile ex mi'n tz'el kyi'ne aju at kye.

Mi'n kub' kytzyu'ne twi tk'u'j kymajene tu'n tchjet kyu'ne tujxi juntl q'ij.

14Mi'n tz'ok kyyaso'ne aju xjal chkyin twi'.

Mi'n kub' kyq'o'ne tolsab'l tuj kyb'e moẍ. Noq o'kx ten tchiylal Dios kyeye. Aqine Kymane.

15Mi'n txi kyb'incha'ne ti'j xtis mya tuj tumel: Qa at til xjal, mya noq tu'nju meb'a xjal mi'n kub' t-sentens kyu'ne, ax ikx mya noq tu'nju ma' toklen xjal mi'n kub' t-sentens kyu'ne qa at til, noq o'kx tuj tumel tu'n kykawine kyib'aj kykyaqil.

16Mi'n che si'mine yol kyi'j kyuk'ile kyxol kyxjalile.

Mi'n jaw kysi'mine yol ti'j kyuk'ile tu'n tkub' b'yo'n. Aqine Kymane.

17Mi'n tz'el kyik'une jun kyermaniye tuj kyanmiye; qa at jun mya b'a'n ma tb'incha jun kyuk'ile, kykawinxe, tu'ntzun mya kyuk'ixe at kyoklene ti'j til.

18Mi'n tz'aj kyq'o'ne t-xel mya b'a'n kyi'j kyxjalile qa at jun mya b'a'n ma kyb'incha kyi'je, ex mya kukx tu'n t-xi kyk'u'ne q'oj tuj kyanmiye kyi'j. Noq o'kx kyk'ujlame qe kyuk'ile ik tza'nx kyeye in kyk'ujlan kyib'e. Aqine Kymane.

19Japunx qe nleye kyu'ne.

Mi'n kyb'inchaye tu'n t-saqchan jun alumaj ti'j juntl qa mya ax tiyjil.

Mi'n ku'x kyawa'ne kab'e wiq awal tuj jun kojb'il.

Mi'n tz'ok kyq'o'ne kyxb'alune b'animaj kyi'j ela txkaj noq'.

20Qa at jun xinaq ma kub' tan tuk'il jun xu'j majen tk'ayin tib' b'anin ti'j tu'n tmoje' tuk'il juntl xinaq, ex qa na'nxtoq tlaq'et xu'j ex na'nxtoq ttzoqpet, kykab'il kb'el kycastiw, ex mi'n che kub' b'yet, tu'nju na'nxtoq ttzoqpet xu'j.

21Atzunte xinaq ktzajel ti'n jun tman ẍne'l nwitze te chojb'il til, ex kpol ti'n ttzi ja xb'alun te mojb'ab'l tib'il.

22Kb'el b'yet ẍne'l lu te chojb'il til xjal, ex ktzajel tqanin pal weye tu'n tnajset til xjal, ex knajseteltzun aju il otoq tb'incha xjal.

23Ok kypone tuj tx'otx' kxel nq'o'ne kyeye, ex ok tku'x kyawa'ne tkyaqil txkaj tze' b'a'n tlonjtz twitz, tuj ox ab'q'i mi'n kub' kyi'ne twitz ex mi'n txi kylo'ne twitz.

24Tuj tkyajin ab'q'i tkyaqil twitz ktzajel kyq'o'ne weye tuk'il jun ninq'ij te aq'b'il chjonte.

25Tujtzun tjwe'yin ab'q'i b'a'ntzun tu'n t-xi kylo'ne twitz. Iktzun tten k'okel mas twitz kyawale. Aqine Kymane ex Kydiose.

26Mi'n txi kychyo'ne chib'j qa minti' ma tz'el tchk'el.

Mi'n b'aj kyxnaq'tzan kyib'e tu'n tb'ant kyq'ijine, ex mi'n kymaye qa nne'l kynik'e ti'j aju tzul ti'j jun xjal.

27Mi'n tz'el kymatzo'ne ttzmal kywi'ye se'w tten, ex mi'n tz'el kymatzo'ne twi kyxmatze.

28Mi'n b'aj kyqesune kyximlale noq tu'n tlaj jun kyimni, ex mi'n tz'ok kyq'o'ne jun tilb'ilal ti'j kychib'jale. Aqine Kymane.

29Mi'n txi kyq'o'ne kyme'jele tu'n kyyaẍin kyuk'il xinaq porke mya b'a'n jlu, ex jakulo che ok kykyaqil xjal aj pajil ex kchmetel mya b'a'n ikju.

30Mi'n che aq'nane kyuj q'ij te ojlab'l, ex tenwt tchiylal njaye kyeye. Aqine Dios.

31Mi'n che'xe kyuk'il qe xjal in tzaj kytxko'n kyanmi kyimni; ex mi'n che'xe kyuk'il chman. Mi'n txi kyqanine jun kyxjele kye, porke tu'n jlu jaku b'aj kytz'ilsan kyib'e. Aqine Kymane ex Kydiose.

32Che we'ktze kywitz tij xjal ex che nimane kye. Tenxwit nchiylale kyeye. Aqine Kymane.

33Ok tul jun stranjer xjal najal kyxole, mi'n kub' kyyajla'ne.

34Kyq'onke stranjer xjal ik tza'nx ax jun kyxjalile, ex kyk'ujlame ik tza'n kyeye in kyk'ujlan kyib'e, ax ikx kyeye stranjer xjal qeye tej kytene tuj Egipto. Aqine Kymane ex Kydiose.

35Kyb'inchame ti'j xtis tuj tumelxix; mi'n che sb'une ti'j echb'il tx'otx', mi'n che sb'une ti'j talil k'aẍjel ex mi ti'j kymalb'ile.

36Balans tz'aqlxix, marc tz'aqlxix ex malb'il tz'aqlxix k'ajb'el kyu'ne. Aqine Kymane ex Kydiose aju etz q'inte kyeye tuj Egipto.

37Kynimanxe kykyaqil qe nleye ex qe nmandamyente ex japunx kyu'ne. Aqine Kymane.