1 Samuel 3 - Mam Huehuetenango New Ortography

Tej ttxkonjtz Samuel tu'n Qman

1Aju ku'xun Samuel in ajb'entoq te Qman ttxlaj Elí. Tuj tq'ijlalil lu minti'xix in yolin Qman kyuk'il qe tmajen ti'j jun tqanil; ex minti'xix in yolin ik tza'n tuj witzik'.

2At jun qonik'an koẍltoq Elí tuj tja, ex ch'ixtoq tok yupj kyi'j tb'aq' twitz ex minti'toq in tilxix.

3Atzunte Samuel in tantoq tuj tja Dios jatum ta' ju kax k'ub'l tley Dios. Ex aju kandil tuj tja Dios kukxtoq tk'ant.

4Txkettzun Samuel tu'n Qman ex tma:

—Samuel.

Atzunte Samuel xi ttzaq'we'n:

—Lu qine lu.

5Xitzun qelan Samuel jatum ta'toq Elí, ex tma:

—Lu qine lu; ¿ti wile teya?

Atzunte Elí tma:

—Minti' we in chin txokon ti'ja, taja ex koẍekuya.

Ajtzun meltz'aj ex kub' koẍe'.

6Ex txokl juntl maj Samuel tu'n Qman:

—Samuel, chi Qman.

Jawtzun we' Samuel, ul tuk'il Elí, ex xi tma'n:

—Lu qine lu; ¿ti wile teya?

Atzunte Elí tma:

—Nky'ajal, minti' we in chin txokon ti'ja, taja ex tanxa.

7Na'nxtoq tel tnik' Samuel ti'j Qman, ex b'ajxtoq yolin Qman tuk'il.

8Txkettzun Samuel toxinmaji'n tu'n Qman, jawtzun we' ex ul tuk'il Elí, ex tma:

—Lu qine lu; ¿ti wile teya? Eltzun tnik' Elí ti'j qa a Qman in txokon ti'j ku'xun lu.

9Kyja'tzun xi tma'ntl:

—Txi'ya koẍeb'il ex qa ma txokliya juntl maj tu'n Qman, q'manxa kyja': Yolina Nman, lu qine in chin b'ine, aqine tmajena, chikuya.

Xi'tzun Samuel ex kub' koẍe' jatum in tantoq.

10Ultzun Qman ex kub' we', ex axju yol tma:

—Samuel, Samuel.

Atzunte Samuel xi tma'n:

—Yolina Nman ex lu qine in chin b'in, aqine tmajena.

11Xitzun tma'n Qman te Samuel:

—Kb'inchetel jun ti'xti wu'ne xob'ajilxix kyxol aj Israel, kykyaqil qeju ok kyb'i', b'i'x k'elel twinqil kyẍkyin tu'n.

12Atzun q'ij kjapunel wu'ne tkyaqilju o txi nma'ne kyi'j tiyjil Elí, ex mlay tzik'x ti'j.

13O txi nma'ne, kb'el kycastiw qe tiyjil wu'ne te jumajx, tu'n tlaj kyil aju b'a'ntl tu'n; porke qe tky'ajal ma che yolin mya b'a'n wi'je ex minti' ma che'x tkawin.

14Kyja'tzun ma txi nma'ne jun nyole axix tok kyi'j qe tiyjil Elí, aju kyil mlay najset te jumajx, mi tu'n chojb'il ex mi tu'n oyaj, chi Qman te Samuel.

15Tb'ajlenxi jlu kub' tan Samuel, ex jaw we' te prim tejxi tjawil q'ij, ex jaqettzun tlamel tja Dios tu'n. In xob'toq Samuel tu'n t-xi tma'n te Elí aju otoq til mer ik tza'n tuj witzik',

16ex tzaj txko'n Samuel tu'n Elí ex tma:

—Nky'ajal Samuel.

—Lu qine lu, chi Samuel:

17—¿Alkye yol saj q'ma'n teya tu'n Qman? B'inchama xtalb'il tu'n mi'n tkub' tewana jun yol nwitze. Awt Dios kub' q'onte tcastiwoya kyuw qa ma kub' tewana jun yol ti'j tkyaqilju ma tzaj q'ma'n teya, chi Elí.

18Xitzun ttx'olb'a'n Samuel tkyaqil ex minti' jun yol kub' tewan, ex tmatzun Elí kyja':

—Ate Qman xq'mante jlu. B'ant-xwit tu'n alkye b'a'n tuj twitz.

19O ch'iy Samuel ex a Qman o tzo'nin te; tkyaqilju yol tma Dios te o japun b'aj, ex mi jun kyaj naj.

20Ex kykyaqil xjal aj Israel tzajnix qe' tuj Dan ex ponin b'aj max tuj Beerseba, el kynik' ti'j qa ate Samuel jun t-sanjel Dios axix tok.

21Ex kub' tyek'untl tib' Qman twitz Samuel tuj lugar Silo, tu'nju atzun lugar jatum in tzaj tma'n Qman ju tyol te Samuel. Tb'ajlenxi yolin Qman, in xi tma'n Samuel qeju yol lu kye kykyaqil aj Israel.