1Kyja'tzun b'intza qe nyole Job; q'o'nk twi'ya ti'j yol kxel nma'ne teya.
2Lu ma b'ant tten yol tu'n t-xi ntzaq'we'ne teya:
3Axix tok aju chin yolile ti'j, kxel nma'ne aju axix tok b'a'n wu'ne.
4Ate T-xew Dios aju at tipumal tu'n tb'ant tkyaqil tu'n, kub' b'inchante weye ex tzaj tq'o'n nchwinqlale.
5Chin ttzaq'wentza, qa jaku chin tzaq'wete tu'na; b'incham ttena tu'n tyolina wuk'ile.
6Aya ex aqine junx elni qo' tuj twitz Dios; ax ikx weye ti'j tx'otx' in b'ante.
7Kyja'tzun mi'n jaw xob'a nwitze, ex mlay chin kawine kyuw tib'aja.
8O nb'iye tej tmanteya qe yol lu, chiya:
9Sakxix qine ex minti' wile, minti' npaltile ex minti' il o nb'inchaye.
10Atzunte Dios in jyon tumel alkye tu'n tok t-si'man wi'je ex in chin ok tq'o'n ik tza'n aj q'oj ti'j;
11ma che ok tk'alo'n qe nqane tu'n caden ex nno'k tq'o'n tkwent ti'j tza'n in chin b'ete, chitzuna.
12Pero tkyaqil aju in tkyuwsa'na mya tuj tumel, porke ate Dios mas ma' toklen kywitz xjal.
13¿Tiqu'n nno'k tma'na tib'aj twitz tu'nju minti' in che tzaj tzaq'we'n qe tyola tu'n?
14Ate Dios in yolin tuj nimku tumel, atzun qe minti' nne'l qnik' ti'j.
15At maj in yolin qonik'an tuj jun witzik' ex qa in tzaj tyek'un mer ik tza'n tuj jun witzik' ok in che tan xjal ex ok in tzyet kyk'u'j tu'n watl.
16Nno'kx tjask'u'n Dios tuj kyẍkyin xjal, in che ok tmayo'n ex in tzaj kyxob'il tu'n,
17tu'ntzun kyel tpa'n kyi'j kyb'inchb'en mya b'a'n ex tu'n mi'n tjaw kyniman kyib'.
18Kyja'tzun in che klet tu'n tu'n mi'n kynaj, in che klet tu'n tu'n mi'n kykyim.
19At maj in kawin Dios kyi'j xjal, in tzaj tq'o'n yab'il kyi'j tuk'il nim ta'w tuj tkyaqil kyximlal.
20Tkyaqil kychi', ikxpe aju mas k'ok'jxix, nne'l tik'un kyk'u'j.
21Nno'k tzqij kychib'jal kyi'j ex in kyaj q'anchalin qe kyb'aqil.
22Ya ch'ix kykyim ex ch'ix kyxi q'i'n tuj muqb'il.
23Pero kyxol jun mil anjel, qa at jun niqayin ta' ttxlaj tu'n tyolin ti'j ex qa ma txi tma'n te alkye tu'n tb'inchante,
24qa ma tzaj q'aq'an tk'u'j ti'j ex qa ma txi tma'n te Dios: Kloma ju xjal lu tu'n mi'n tkyim porke ma knet chojb'il til wu'ne, qa chi,
25k'eleltzun yab'il ti'j ex k'okel juntl maj ik tza'n tej ku'xunxtoq.
26Ok kub'sal twitz Dios ex ktzajel b'i'n tu'n; ex tuk'il nim tzalajb'il k'okel kyke'yin kywitz tuk'il Dios ex kk'metel tu'n Dios juntl maj.
27Kxe'ltzun tma'n kye xjal: O chin b'inchane il, o nb'inchaye aju mya tz'aqlxix, pero minti' kub' tq'o'n Dios ncastiwoye;
28noqpe ma chin klete tu'n te kamik ex kukx tok nke'yine t-spik'umal q'ij.
29Atzunju in tb'incha'n Dios kyi'j xjal nimku maj;
30in che klet tu'n te kamik ex in xi tq'o'n amb'il tu'n kukx tok kyke'yin t-spik'umal q'ij.
31Chin tb'intza Job ex q'o'nk twi'ya ti'j nyole; txulekuya akux in chin yoline.
32Qa at jun tyola tu'n ttzaj tma'na weye, chin ttzaq'wentza; qa ax tok tyola, jaku txi nma'ne qa tuj tumel in yolina,
33pero qa minti' tyola, txulekuya b'ilte nyole, ex aqine chin xel xnaq'tzante teya tu'n tok tnab'la.
Who We AreWhat We EelieveWhat We Do
2025 by iamachristian.org,Inc All rights reserved.
