Isaías 3 - Mam Huehuetenango New Ortography

Aju castiw tzul kyib'aj aj Judá ex aj Jerusalén

1Tz'elx kynik'e ti'j. Ate Qman aju Tajaw Tkyaqil, k'elel ti'n kye aj Jerusalén ex kye aj Judá tkyaqilju in qe' kyk'u'j ti'j, tuk'ix tkyaqil kywa ex tuk'ix a'.

2Ax ikx che najel xjal tu'n, aqeju kyuw kyk'u'j tuj q'oj, kyuk'ix qeju elni qe twitz q'oj, kyuk'ix qe jwes ex qeju nno'k kyq'on kyib' te t-sanjel Dios, kyuk'ix qe xjal b'a'n che q'ijin, kyuk'ix qe kytijil xjal,

3kyuk'ix qe capitán, aqeju at 50 soldad tuj kykwent, kyuk'ix qe nejenel ma'xix kyoklen, kyuk'ix qeju b'a'n che q'on consej, kyuk'ix qeju at kynab'l tu'n tb'ant tkyaqil txkaj aq'untl kyu'n, ex qe chman,

4ex k'okel tq'o'n Qman qe ku'xun te nejenel kyxol, ex qe k'wa'l che kawil kyib'aj.

5Aju kb'ajel tuj tnam atzun jlu: Che okel ten xjal yajlal jun ti'j juntl, ax ikx qe xjal kyvesin kyib' che okel tzoqpaj jun ti'j juntl. Kjawil kyi'n kyib' qe ku'xun kyi'j qe tij xjal, ex qe xjal minti' kyoklen kjawil kyi'n kyib' kyi'j qe xjal ma' kyoklen.

6Tuj ju q'ij lu kxel tma'n jun xjal te terman ax tuj tja kyman: Teya at t-xb'aluna, kyja'tzun toka te nejenel qxole ex kawina qib'aje kyxol qe ttx'aqan ja lu, chilo.

7Atzunte terman kxel ttz'aq'we'n kyja': Mlay b'ant tu'n wonine kyeye ti'j ju mya b'a'n ma tzaj kyi'je, minti' nwaye at tuj njaye ex minti' nxb'alune tu'n tok nq'o'ne. Mi'n chin ok kyq'o'ne te nejenel kye tnam xjal, chilo.

8Ax tok ma naj tnam Jerusalén ex aju tnam Judá ma kub' xitj, porke in che yolin mya b'a'n ex in kyb'incha'n mya b'a'n ti'j Qman ex minti' tchiylal tajwalil Qman tuj kywitz.

9Ax kywitz in yek'unte ti'j kyil; minti' in kub' kyewan kyil; ik kyten qe ik tza'n qe xjal aj Sodoma, in xi kyyek'un kyil kye kykyaqil xjal. B'ek'b'il kywitz porke kyu'nx in tzaj kyi'n castiw kyib'aj.

10Kymanxe kye qe xjal tz'aqlxix: Tkyaqil k'elel b'a'n te kye ex che tzalajel ti'j twitz kyaq'unb'en.

11Ay b'ek'b'il kywitz qe xjal b'inchal mya b'a'n, ex tkyaqil k'elel mya b'a'n te kye. Kxel q'o'n chojb'il kye ik tza'n kyaq'unb'en mya b'a'n.

12Kyuwxix in che kawin qe k'wa'l kyib'aj qe ntanmile ex aju kawb'il tuj kyq'ab' xu'j ta'. Aqeye ntanmile, kyu'nx qe nejenel ate' kyxole ma che kub' sb'u'ne ex ma che el tzpete ti'j kyb'eye kyu'n.

13Ma b'ant tten Qman tu'n kyok qe xjal tuj xjel tu'n, ma b'ant tten tu'n tkub' tq'o'n kycastiw xjal ate' kyuj nimku tnam.

14Kb'el tq'o'n Qman kysentens qe kytijil xjal ex qe nejenel kye xjal etzan tu'n, ex kxel tma'n kye kyja': Kyu'ne ma che b'aj naj qe tqan uva etzan wu'ne; ma tz'el kyelq'a'ne aju at kye qe meb'a ex aju ma tz'el kyelq'a'ne ma tz'okx kyk'u'ne tuj kyjaye.

15¿Ti kyoklene tu'nju in b'aj kyyajla'ne qe xjal etzan wu'ne ex in b'aj kywab'ane qe xjal meb'a? Chi Qman in tma'n, aju Tajaw Tkyaqil.

Aju kycastiw qe xu'j aj Jerusalén

16Ax ikx in tma'n Qman kyja': Qe xu'j aj Sión in jaw kyniman kyib' ex tjaw kywitz twitz kya'j ok in che b'et in che xmutxb'en tuj kywitz xinaq, ch'in t-xol kyqan ok in che b'et ex in che chilin qe adorn kyok kyi'j kyqan,

17kyja'tzun kb'eletz pulj ttzmal kywi' tu'n tx'a'k wu'ne ex b'i'x ktzajel kych'ixwi ok kyok ke'yin minti' kyxb'alun tok, chi Qman.

18Tuj tq'ijlalil tzul, che najel kykyaqil qe adorn lu tu'n Qman: Qe adorn nno'k kyq'o'n ti'j kyqan, kyuk'ix qeju in che ok ten ti'j kywi', kyuk'ix uwj,

19qe tuj ẍkyinb'aj, qe tqul q'ab'aj ex qe xb'alun te txayb'il kywitz,

20qe k'alb'il kywi', qe tal caden tok te adorn ti'j kyqan, qe k'alb'il kyk'u'j, qe tal botey tku'x perjum kyuj, qe pwaq tok kyi'j xjal tu'n mi'n kyok ky'a'n,

21qe xmulq'ab'aj, qe adorn nno'k ten ti'j kytxa'n,

22qe kyxb'alun tb'anilxix, qe xb'alun in che ajb'en kyu'n te kyxmuj, qe xb'alun in che ajb'en te txayb'il kyi'j ex qe pa,

23qe respej, qe xb'alun tb'anilxix, qe si'pj ex qe xb'alun xaxj.

24Te t-xel perjum ktel ttzuwil; te t-xel k'alb'il kyk'u'j, k'ajb'el jun saqb'aq; te t-xel puro xeb'an kywi', kb'eletz pulj ttzmal kywi'; te kyxel qe xb'alun tb'anilxix, k'okel kyq'o'n xb'alun ch'i'x twitz kyi'j, te t-xel mejor che ke'yin, k'okel q'o'n marc kyi'j tu'n k'uxb'il in sk'olin tu'n q'aq'.

25Atzun qe xinaq aj Jerusalén che b'el b'yo'n tu'n spad, qe xinaq elni twitz q'oj che najel tuj q'oj.

26K'okel oq'el ex b'is tuj tnam ex te jumajx kyjel kolin.