1Atxtoq Apolos tuj tnam Corinto, xi'tzun Pablo b'etel tuj tkyaqil lugar tuj tiwitz tx'otx'; pontzun tuj tnam Efeso, ex atzun e knet junjun okslal tu'n.
2Xitzun tma'n kye:
—¿Ope kyk'ame Xewb'aj Xjan tej kyokslane?
Atzun kye tzaj kytzaq'we'n:
—B'ajx qb'iye qa at Xewb'aj Xjan.
3Xitzun tma'n Pablo:
—¿Alkyetzun b'yab'l ma kyk'ame?
Tzajtzun kytzaq'we'n:
—Aju b'yab'l tu'n Juan, atzunju ma qk'ame.
4Xitzun tma'n Pablo kye:
—Ate Juan e b'yan xjal tu'n tuj a', ex tma tu'n tajtz ti'j kyanmi, ex xi tma'n kye tu'n kyokslan ti'j ju lepchix ttzaj ti'j, atzun Jesúsju, aju Crist aju at toklen tu'n Dios, chi Pablo.
5Tejtzun kyb'inte jlu, e b'yantzun tuj a' tuj tb'i Qajaw Jesús.
6Ex kub' tq'o'n Pablo tq'ab' tib'aj kywi', kub'iltzun Xewb'aj Xjan kyuk'il; ex e yolin tuj junxitl yol, ex e ok ten chik'b'alte aju in tzaj tma'n Dios kye.
7Tu'n tkyaqil b'alo kab'laj kyb'et xinaq.
8Ex tuj ox xjaw kok'x xi aj Pablo tuj ja te k'ulb'il kye xjal judiy, in yolintoq ti'j tkawb'il Dios, minti' t-xob'il ex in kub' ti'j kynab'l tu'n.
9Ex at junjun minti' okx tuj kywi', ex kyk'i' txi kyoksla'n, e yolin mya b'a'n ti'j ju Okslab'l lu kywitz xjal. Kyja'tzun el tpa'n tib' Pablo kyi'j, ax ikx qe okslal e je'tz ti'n, ex tkyaqil q'ij xi' pakb'al tuj t-skwel jun xjal Tirano tb'i.
10Axtzun pakb'an tuj kab' ab'q'i; kyja'tzun kykyaqil qeju najl qe tuj tx'otx' Asia o kyb'i tyol Qajaw Jesús, tza'nx qe xjal judiy ax ikx qe xjal mya judiy.
11Ex o tb'incha Dios tb'inchb'en nim kyipumal noq tu'n Pablo; na'nxtoq tb'inchanjtz jun maj ikju,
12ex ok kyq'o'n xjal qe tal k'alb'il ex gavach ti'j t-ximlal Pablo, ex xi kyi'n tu'n tkub' kyq'o'n kyib'aj qe yab' ex b'i'x in che b'anixtoq, ex qe ju'ẍ in che etztoq tuj kyanmi xjal.
13Ex at junjun xjal judiy noq jachaq in che b'et, ok tilil kyu'n tu'n tajb'en tb'i Qajaw Jesús kyu'n tu'n kyetz qe ju'ẍ tuj kyanmi xjal, ex in kyma'n kyja':
—Aqeye ju'ẍ, kyetze tu'n tipumal tb'i Jesús aju in pakb'anjtz tu'n Pablo.
14Ex at jun xjal judiy Eseva tb'i, nejenel kye pal, at wuq tky'ajal in kyb'incha'n jlu.
15Ex tej t-xi kyma'n te ju'ẍ tu'n tetz tuj tanmi xjal, tzaj ttzaq'we'n ju'ẍ kyja':
—Ojtzqi'n Jesús wu'ne; ex b'a'n wu'ne alkye Pablo; yajtzun kyeye, ¿alkyetzun qeye? Chi ju'ẍ.
16Atzunte xinaq aju attoq ju'ẍ tuj tanmi, xi tzoqpaj kyi'j, ex kub' kyi'j tu'n tu'nju at-xix tipun kywitz; kyja'tzun e je'tz oq tuja, minti' kyxb'alun ex otoq che k'ixb'i.
17Kykyaqiltzun qeju najl tuj Efeso, o kyb'i jlu, tza'nx qe xjal judiy ax ikx qe xjal mya judiy; kyja'tzun tzaj nimxix kyxob'il kykyaqil ex in jaw kynimsa'ntoq tb'i Qajaw Jesús.
18Ex nimku xjal otoq che okslan in che ul, in jatz kypa'n kyil ex in kyma'n aju kyb'inchb'en mya b'a'n.
19Ex nimku xjal b'a'n mañ kyu'n nej, tzaj kyi'n kylibro, kub' kypatun kywitz kykyaqil xjal; ex jaw kyi'n tajlal twi', japuntzun tajlal twi' 50 mil saq pwaq.
20Ex kyja'tzun tten o ch'iy tyol Qajaw ex okxix tipumal.
21Tb'ajlenxitzun jlu, kub' t-ximan Pablo tu'n t-xi' tuj Jerusalén tik'lenxi aj tuj tx'otx' Macedonia ex tuj tx'otx' Acaya, ex tma:
—Nponlenxitzune tuj Jerusalén, ax ikx ilxix ti'j tu'n nxi'ye tuj tnam Roma.
22E je'xtzun t-sama'n Pablo kab' erman tuj Macedonia, aqeju in che onin tuk'il, atoq Timoteo tuk'ix Erasto; atzun te kyaj ten kab'e q'ijtl tuj tx'otx' Asia.
Tej kyjaw tilj xjal tuj tnam Efeso23Atxtoq Pablo tuj tnam Efeso, e jaw tilj nimku xjal tu'n tlaj in che okslan xjal ti'j tyol Dios.
24Tu'nju at jun xjal tx'inol saq pwaq Demetrio tb'i in b'inchantoq kyi'j qe tal ja saq pwaq kytx'otx'il, tal ch'in qe, ik che ke'yin ik tza'n tja ju dios Diana tb'i, ex tu'nju aq'untl lu nim pwaq in kykamb'a'n qeju in che onin tuk'il.
25E b'aj tchmo'n Demetrio qe tuk'il kyuk'ix txqantl ax kyaq'un lu, ex xi tma'n kye:
—Aqeye tat, b'a'n kyu'ne, ti'j ju aq'untl lu in knet qq'inumab'l;
26ex in kyke'yine ex in kyb'i'ne aju in tb'incha'n Pablo, in tma'n, mya dios qeju in che b'inchanjtz tu'n kyq'ab' xjal. Kyja'tzun, nimku xjal ma kub' ti'j kynab'l tu'n ex ma che el txalpuj tu'n, mya noq o'kx tuj Efeso, ikx tuj tkyaqil tx'otx' Asia.
27Kyja'tzun mya yajku mi'n tz'ajb'entl qaq'unb'en, ax ikx k'elel ik'un tja qtxu Diana, aju nintz dios, ex knajel tajwalil Diana, aju in k'ulunjtz kyu'n kykyaqil xjal tuj Asia ex kyu'n kykyaqil xjal twitz tx'otx'.
28Tejtzun kyb'inte xjal ju yol lu, tzaj nimxix kyq'oj ex e jaw sch'in in kyma'n:
—Ma'xix toklen Diana aju kydios aj Efeso.
29Kykyaqiltzun xjal te tnam el tzpet kynab'l, ex e okx qelan tuj lugar jatum nno'k kychmon kyib' tnam xjal, tzyu'n Gayo kyu'n tuk'ix Aristarco, aj Macedonia qe, ex tuk'il Pablo qe.
30O tajb'e Pablo tu'n tokx yolil kyxol xjal, ex minti' xi tzoqpi'n kyu'n okslal.
31Ax ikx at junjun aj sanjelal te Asia tamiw Pablo qe, xi kysama'n jun xjal q'malte te Pablo tu'n mi'n tokx kyxol xjal.
32Atzun kye xjal otoq tz'ok kychmon kyib' in che sch'in, junxitl in kyma'n junjun, ax ikx txqantl; porke tzpetnitoq ta' kynab'l, atzun tnimal xjal minti' el kynik' ti'j tiqu'n otoq tz'ok kychmon kyib'.
33Ex at junjun kyxol xjal xi kyma'n te Alejandro tu'n tkub' we' yolil, tu'nju otoq txi lamo'n kyu'n xjal judiy tu'n tkub' ten kywitz xjal. Xitzun tyek'un tq'ab' Alejandro tu'n kyq'ajen xjal, o tajb'e tu'n tyolin te tkolb'il tib' kywitz xjal kyuk'ix qe tuk'il.
34Ex tej tel kynik' xjal ti'j qa judiy xjal, kykyaqil e jaw sch'in junx, b'alo tuj kab'e or in kyma'n:
—Ma'xix toklen Diana aju kydios aj Efeso.
35Atzunte secretario te tnam, tej kyq'ajen xjal tu'n, tma:
—Aqeye xinaq aj Efeso, kykyaqil xjal b'a'n kyu'n qa aqe aj Efeso kwentil tja qtxu Diana, aju nintz dios, ex kwentil ju tilb'ilal aju tzaj tz'aq tuj kya'j.
36Ate jlu mi a'l jun b'a'n tmante qa mya ax tok, kyja'tzun mas b'a'n tu'n mi'n kyq'ajte ex minti' tu'n kyb'inchanteye jun ti'xti te jurat naj.
37Porke ma che ul kyi'ne qe xjal lu, minti' in che elq'an tuj tja qdios ex minti' in che yolin mya b'a'n ti'j.
38Qatzun at tq'oj Demetrio ti'j jun xjal, kyuk'ix qeju in che aq'nan tuk'il, atzun til jusgad at, ex ate' qe jwes; b'a'n tu'n ttzaj kyma'n alkye kyq'oj at ti'j juntl.
39Ex qa at juntl kyajb'ile, jaku b'ant ti'j kywitz qe nak'ul ti'j ley ok tok sesyon kyu'n.
40Mya yajku qo kub' tz'aq tuj qil ok tpon tqanil tuk'il jwes ti'j ju ma che jaw tilje ti'j ja'lo, porke minti' jun yol b'a'n tu'n t-xi qma'n tiqu'n ma tz'ok kychmon kyib'e ex ma che jaw tilje, chi secretario.
41Tejtzun tb'aj tma'n secretario jlu, xitzun tma'n tu'n kyetz kykyaqil qeju otoq tz'ok kychmon kyib'.
Who We AreWhat We EelieveWhat We Do
2025 by iamachristian.org,Inc All rights reserved.
