Proverbios 24 - Mam Huehuetenango New Ortography

-19-

1Mi'n tzaj tlo'ch tk'u'ja kyi'j qe xjal b'inchal mya b'a'n, ex mi'n pon tk'u'ja ti'j tu'n tok tuk'in tib'a kyuk'il,

2porke qe xjal lu o'kx in che ximan ti'j tu'n kyelq'an ex o'kx in che yolin ti'j tu'n kyb'inchante mya b'a'n.

-20-

3Tu'n nab'l in jaw b'inchet jun ja, ex tu'n ximb'etz in kub' qe' t-simyentil,

4tu'n ojtzqib'l in b'aj noj kyuj qe cuart kyu'n qe ti'xti wi'yilxix ex tb'anilxix che ke'yin.

-21-

5Mas nim toklen jun xjal at tnab'l twitz jun xjal at nim tipun, ex mas b'a'n tu'n tten tojtzqib'l jun xjal twitzju tu'n tten tipun;

6ex qa ma tz'ok jun q'oj, cheb'a in kub' ximet tza'n tten tu'n ttzyet, ex qa at nim xjal in kyq'o'n consej, jaku kub' ti'j aj q'oj.

-22-

7Aju xjal minti' tnab'l, minti' b'a'n tu'n alkye yol tu'n t-xi tma'n kywitz aj sanjelal, tu'nju ma' t-xilen ju nab'l ex mlay tz'el tnik' ti'j.

-23-

8Aju xjal o'kx in ximan ti'j tu'n tb'inchante mya b'a'n, k'okel tb'i kyu'n xjal jawni sb'un.

9Aju xjal minti' tnab'l, o'kx in ximan ti'j tu'n tb'ant il tu'n; ex aju xjal b'a'n xmayin, ik'un twitz kyu'n xjal.

-24-

10Qa ma tzaj b'aj tk'u'ja ok ttzaj yajb'il ti'ja, myatzun nim tipuna at ikju.

-25-

11Kloma qe xjal tkub' kysentens tu'n kykyim; ex kloma qe xjal ch'ix kyxi q'i'n tu'n kykub' b'yo'n.

12Maske txi tma'na: Minti' we b'i'n wu'n, qa chiya, baqa mlay tz'el tnik' Dios ti'j jlu, aju in b'aj ke'yinte kyanmi xjal; aju tok tkwent ti'j tchwinqlala ya b'a'ntl tu'n, ex tu'n in xi tq'o'n chojb'il te xjal ik tza'n tb'inchb'en.

-26-

13Nk'wa'l, lo'nxa aju ta'l kab' puro chi', aju tjaq' k'ul kab'; nik'b'enxa ex puro chi' lob'lte wen.

14Ax ikxtzun puro chi' k'elel te teya aju nab'l ex ju ojtzqib'l; qatzun ma che knet tu'na, te tib'ajxi puro b'a'n k'elel te teya, ex aju in ayona ti'j mlayx kub' xitun.

-27-

15Mi'n kub' t-ximana tu'n tb'inchanteya mya b'a'n ti'j jun xjal tz'aqlxix, ex mi'n tz'etz telq'ana aju at tuj tja.

16Maske kub' tz'aq wuq maj ju xjal tz'aqlxix, pero in jaw we' juntl maj; atzun qe xjal b'inchal mya b'a'n, noq kyja' in che'x tuj ju mya b'a'n.

-28-

17Mi'n jaw tzalaja ok tkub' tz'aq aju aj q'oj ti'ja ex ok ttzaj jun mya b'a'n tib'aj,

18ex ok tlonte Qman jlu, mlay tzalaj ti'j, ex jaku kyaj tkolin tu'n mi tq'ojin ti'j.

-29-

19Mi'n jaw q'ojla tu'n kylaj qe xjal b'inchal mya b'a'n, ex mi'n tzaj tx'a'l tk'u'ja ti'j xjal ploj tmod,

20porke aju xjal b'inchal mya b'a'n, minti'x jun ok tkamb'a'; ik k'okel ik tza'n jun kandil in ku'x yupj.

-30-

21Nk'wa'l, nimana te Dios ex te rey, mi'n tz'ok tmojb'an tib'a kyuk'il xjal mib'an che niman,

22ex minab'en che najel ex mi jun b'a'n tu'n aju kycastiw ktzajel tu'n Dios ex tu'n rey.

Txqantl yol te xnaq'tzb'il kyu'n qe xjal at kynab'l.

23Ax ikx qe jlu ax kyyol qe xjal at kynab'l:

Qa nno'k kyke'yin qe jwes aju t-xilen xjal, mya b'a'n jlu.

24Aju nno'k q'onte jun xjal te minti' til ex at til, kxel qanin mya b'a'n tib'aj kyu'n tnam xjal ex k'elel ik'un kyu'n qe nasyon;

25atzun qeju in che kub' q'onte tcastiw, at tzalajb'il kye ex ktzajel kyqanin xjal ky'iwb'il kyib'aj.

26Aju xjal in xi tq'o'n jun tzaq'web'l b'a'nxix, nimxix in che tzalaj xjal ti'j.

27B'inchama kyi'j qe taq'una ex txi'ya b'inchalte taq'una tuj kojb'il, ex te tib'ajxi b'a'ntzun tu'n tjaw tb'incha'na tjaya.

28Mi'n tz'oka jun testiw nik'al yol ti'j tuk'ila, ex mi'n txi tkyuwsa'na jun ti'xti qa mya ax tok.

29Mi'n kub' t-ximana tu'n taj tq'o'na t-xel mya b'a'n, mi tu'n tb'inchanteya ti'j juntl ik tza'nx otoq tb'incha ti'ja.

30In exe tuj tkojb'il ju xjal ky'aj ex kyxol tqan t-uva ju xjal minti' tnab'l:

31aju o wile, jun tx'otx' nojni tu'n ch'i'x, ex qe ab'j tok te tpe'nil otoq che el tilj.

32Tej twile jlu, in ok tene ximal ti'j; o wile ex ok te jun xnaq'tzb'il weye.

33Tu'n tlaj kukx ttana ex kukx tpich'je' twi'ya tu'n watl ex kukx tkub' ttz'ulin tq'ab'a tu'n ttana,

34tzul meb'ayil ti'ja ex k'okel tzoqpaj ti'ja ik tza'n jun xjal eleq' q'i'n ub'l tu'n.