Hebreo 7 - Mam Huehuetenango New Ortography

Ate Jesús pal ax toklen ik tza'n te Melquisedec

1Porke ate Melquisedec reytoq tuj tnam Salem, ex paltoq in ajb'en teju Dios ma'xix toklen. Ate Melquisedec etz kanil ti'j Abraham tej tajtz Abraham tuj q'oj, tkub'lenxi kyi'j rey tu'n, ex kub' ky'iwla'n Abraham tu'n Melquisedec.

2Tkyaqilju o tzyet tu'n Abraham tuj q'oj xi tq'o'n tlaji'n te Melquisedec; tnejelxix aju tnab'l tb'i Melquisedec, jun rey tz'aqlxix; ex juntl tb'i, rey tuj Salem; atzun in tma'n ju yol lu: Aju rey q'olte kymojb'ab'l kyib' xjal.

3Minti' tz'ib'an alkye tman ex alkye ttxu', ex minti' in tma'n alkye qe t-xe'chel; ex minti' in tma'n jtoje tz'itz'j ex jtoje kyim; ikx tten ik tza'n Tk'wa'l Dios, kukx o ten te pal te jumajx.

4Che ximane ti'j, ma'xix t-xilen ju xjal lu, ex tkyaqilju el ti'n qxe'chel Abraham kye rey tej tok q'oj, xi tq'o'n tlaji'n te Melquisedec.

5Aqeju tiyjil Leví in kyk'mo'n kyoklen tu'n kyok te pal, ex q'ma'maj kye tu'n tley Moisés tu'n kyk'monte tlaji'n te tkyaqil xjal, ax qe kyerman in xi kyq'o'n tlaji'n kye maske ax kyiyjil, pero ax e je'l itz'j ti'j Abraham.

6Atzunte Melquisedec, mya junx tiyjil kyuk'il tiyjil Leví, pero xi tq'o'n Abraham tlaji'n te; ex kub' ky'iwla'n Abraham tu'n Melquisedec, ate Abraham o tzaj ttziyan Dios jun yol te.

7Ex clar ta' te yol, aju ch'in toklen in kub' ky'iwla'n tu'nju ma' toklen.

8Aqeju aj Leví in kyk'mo'n tlaji'n, pero in che kyim; atzunte Melquisedec xi tk'mo'n tlaji'n ex in tma'n tuj Tu'jil qa itz'xte.

9Jaku b'ant tu'n t-xi qma'n ja'lo: Qe pal tiyjil Leví maske in kyk'mo'n tlaji'n kye xjal, pero ax ikx kye mer ik tza'n xi kyq'o'n tlaji'n tej t-xi tq'o'n Abraham te Melquisedec.

10Maske na'nxtoq kyitz'j tej tetz Melquisedec kanil ti'j Abraham, pero tu'nju ax tzaj kyiyjil ti'j Abraham, kyja'tzun mer ik tza'n kyuk'ix qe e je'x q'onte tlaji'n.

11Qe aj Israel kyk'am ju ley kyu'n qe pal tiyjil Leví, ax tiyjil Aarón. Noqwit at tumel tu'n kyok aj Israel tz'aqlxix kyu'n qe pal tiyjil Leví, tu'n jlu myawtlo il ti'j tu'n ttzaj junxitl pal ikx toklen ik tza'n te Melquisedec, ex myatzun toka kyxol qe tiyjil Aarón.

12Porke qa ma che ch'expet qe pal, ax ikx il ti'j tu'n tch'expet ley.

13Porke junxitl tiyjil Jesucrist aju in qo yolin ti'j, mi jun kye o tz'ajb'en twitz altar.

14Porke clarxix ta', ate Qajaw ul itz'j ti'j tiyjil Judá, minti' o tma Moisés tu'n kyok tiyjil Judá te pal.

15Ex aju in qo yolin ti'j mas clarxix ta', porke ma tzaj junxitl pal ax toklen ik tza'n te Melquisedec.

16Minti' ma tz'ok te pal tu'nju tiyjil ik tza'n in tma'n ley, noq o'kx ma tz'ok te pal tu'nju tipumal tchwinqlal mlay naj.

17Porke in yolin Dios tuj Tu'jil ti'j:

Aya k'okel te pal te jumajx. Ax toklena k'okel ik tza'n te Melquisedec, chi Dios.

18Kyja'tzun, aju mandamyent at ojtxi ma naj tu'nju minti' tipun ex minti' tajb'en.

19Porke minti' jun kolb'il tz'aqlxix tzaj tq'o'n tley Moisés. Atzun ja'lo ma tzaj q'o'n jun mas b'a'nxix jatum tu'n tok qe' qk'u'j ti'j, tu'ntzun qpon laq'e' ttxlaj Dios.

20Tej tok Jesucrist te pal tzaj tna'n Dios ax tb'i ti'j tyol.

21Atzun qe txqantl pal o che ok te pal ex minti' tzaj tna'n Dios tb'i kyi'j tu'n kyok te pal; atzunte Jesucrist ma tz'ok te pal tu'nju yol tzaj tna'n Dios tb'i tej t-xi q'ma'n te:

Ax tb'i Qman tzaj tna'n ti'j tyol ex mlay ch'expet. Chi Qajaw: Aya k'okel te pal te jumajx. Ax toklena k'okel ik tza'n te Melquisedec.

22Kyja'tzun, ma tz'ok Jesús te piador ti'j jun yol mas b'a'nxix kyaj b'ant ti'j tu'n Dios quk'il.

23Aqeju txqantl pal nim kyb'aj e chmet, porke tu'nju in che kyimxi minti' tumel kukx tu'n kyten.

24Atzunte Jesús atx toklen te pal tu'nju kukx tten te jumajx.

25Kyja'tzun tten at tipumal tu'n kyklet te jumajx aqeju in che pon laq'e' ttxlaj Dios tu'n Jesús, porke itz' te Jesús te jumajx tu'n tkub'san twitz Dios kyi'j.

26Porke atzun jlu jun tnejel pal b'a'n tu'n tajb'en qe, xjan te, ex minti' til, ex minti' tz'il ti'j, ex tpa'n tib' kyi'j aj il, ex ma tz'ok q'o'n toklen te ma'xix kywitz kykyaqil qeju ate' tuj kya'j.

27Mya il ti'j tu'n t-xi tq'o'n Jesús chojb'il tkyaqil q'ij ik tza'n in kyb'incha'n txqantl tnejel pal; tnejel in xi kyq'o'n ju chojb'il tu'n tnajset kyil, ex te tib'ajxi in xi kyq'o'n chojb'il tu'n tnajset kyil xjal. Pero mya ik tten te Jesús, porke noq junx maj xi tq'o'n ju chojb'il tej t-xi tq'on tib' tu'n tkyim.

28Porke tu'n tley Moisés in che ok q'o'n te tnejel pal qe xjal minti'xix kyipun; atzunju yol tzaj tna'n Dios tb'i ti'j, o tzaj q'ma'n tu'n Dios te tib'ajxi ju ley; tzaj q'ma'n tu'n tok aju Tk'wa'l te tnejel pal, aju tz'aqlxix te jumajx.