1 Timoteo 6 - Mam Huehuetenango New Ortography

1Kykyaqil qeju b'i'x tzyu'n qe te majen, che ximan kyi'j kypatrón tu'n tten tchiylal kypatrón tuj kywitz, tu'ntzun mi'n kyyolin xjal mya b'a'n ti'j Dios, ax ikx ti'j ju xnaq'tzb'il in qq'o'n.

2Aqeju majen okslal kypatrón, mya tu'n mi'n t-xi kyniman kypatrón tu'nju kyerman kyib' tuj okslab'l, noq o'kx tu'n kyajb'enxix kye; porke aqeju patrón jatum in che ajb'en, okslal qe ex at kyk'u'j majen kyi'j. Xnaq'tzanxa jlu kye ex q'onxa kynab'l.

B'a'n tu'n qniman te Dios ex tu'n qtzalaj ti'j ju in tzaj tq'o'n qe

3Qa at jun xjal in tq'o'n junxitl xnaq'tzb'il, ex minti' taj ti'j ju tb'anil yol aju tyol Qajaw Jesucrist, ex minti' taj ti'j ju xnaq'tzb'il aju in tma'n tu'n qniman te Dios,

4jun xjal ikju in jaw tniman tib', ex minti' ch'in b'a'n tu'n. Tok tyab' twi', noq o'kx taj tu'n tq'ojin ti'j yol; tu'ntzun jlu in tzaj tlo'ch kyk'u'j xjal, tuk'ix q'oj, tuk'ix yasb'il, tuk'ix kyximb'etz mya b'a'n.

5Noq in che jaw kub' tuk'il yol, ex mya tuj tumel ta' kynab'l; ma che el tzpet ti'j ju yol axix tok, tuj kynab'l aju tu'n kyniman te Dios tu'n kykamb'ante nim.

6Ex qa ma qo niman te Dios ex in qo tzalaj ti'j ju in tzaj tq'o'n qe, atzun jlu jun kamb'ab'l ma'xix.

7Porke minti' ch'in q'i'n qu'n tej qul itz'j, ex minti' ch'in kxel qi'n ok qik' twitz tx'otx'.

8Kyja'tzun, qa at qwa ex at qxb'alun, qo tzalaj ti'j jlu.

9Porke aqeju kyaj tu'n kyok q'inun, in che ok tuj joyb'il kyi'j ex in che kub' tz'aq tuj k'ob'il, tu'nju in pon kyk'u'j ti'j nimku minti' tajb'en, ex in che k'ixb'i tu'n; tu'ntzun jlu in tzaj xitb'il kyib'aj ex in che'x tuj najen.

10Porke aju tu'n tpon qk'u'j ti'j pwaq, atzun tlok' tkyaqil mya b'a'n; ik tza'n junjun o che el txalpuj ti'j kyokslab'l ex nim o che k'ixb'isanjtz tu'nju o pon kyk'u'j ti'j pwaq.

Tu'n tkub' ti'j mya b'a'n qu'n tu'n qokslab'l

11Atzun teya, tel oqa ti'j tkyaqil jlu porke ajb'ela te Dios. Tz'ok tililx tu'na tu'n tb'inchanteya aju tz'aqlxix, ex tu'n tnimana te Dios, ex tu'n tten tokslab'la, ex tu'n tten tk'ujlalila, ex tu'n tten tpasensa, ex tu'n toka mans.

12Tz'ok tililx tu'na ik tza'n jun soldad tu'n tkub' ti'j mya b'a'n tu'na tu'n tokslab'la; tzyuma aju chwinqlal te jumajx, porke o txkonjtza tu'n tten tchwinqlala te jumajx tej t-xi tchik'b'a'na tokslab'la kywitz nimku testiw.

13Kxel nkyuwsa'ne teya twitz Dios aju in tzaj q'onte kychwinqlal kykyaqil, ex twitz Jesucrist aju xi chik'b'ante ti'j ju yol axix tok twitz Poncio Pilato, ex tuj tumelxix tyol.

14Kxel nkyuwsa'ne teya tu'n tjapun tu'na aju ma txi nma'ne teya, miwt b'aj tch'expu'na, ex kukx tu'n ttena minti' tpaltila okxi tul Qajaw Jesucrist.

15Tujxix tq'ijlalil ktzajel yek'un Jesucrist tu'n Dios. Ate Dios in tzalaj te jumajx, ex o'kx te at tipumal tib'aj tkyaqil. Ate Dios Rey in kawin kyib'aj kykyaqil rey, ex ate Dios Kyajaw kykyaqil qeju at kyoklen.

16O'kx te Dios mlay kyim, atzun najl tuj spik'un aju mlay qo pon laq'e' ttxlaj. Mi jun xjal o tz'ok ke'yinte Dios ex mlay b'ant tu'n tok tke'yin xjal twitz Dios. O'kxwit te Dios tu'n tnimanjtz ex tu'n tten tipumal te jumajx. Ikxwitju.

17Q'manxa kye q'inun ate' tuj tq'ijlalil ja'lo tu'n mi'n tjaw kyniman kyib', ex tu'n mi'n tok qe' kyk'u'j ti'j q'inumab'l porke mya segur te jlu; noq o'kx tu'n tqe' kyk'u'j ti'j jun Dios itz', porke tkyaqil in tzaj tq'o'n Dios qe ex nimxix in tzaj tq'o'n tu'n qtzalaj ti'j.

18Q'manxa kye tu'n kyb'inchante aju b'a'n, tu'ntzun tchmet kyaq'unb'en b'a'n ik tza'n jun q'inumab'l; q'manxa kye tu'n kyb'inchante xtalb'il ex tu'n t-xi kysipan ch'in kye txqantl.

19Atzun jlu tu'n tb'aj kychmo'n ik tza'n jun q'inumab'l tu'n tajb'en kye tuj tq'ijlalil tzul, tu'ntzun kytzyunte ju chwinqlal axix tok.

Xi tkyuwsa'n Pablo tnab'l Timoteo alkye tu'n tb'inchante

20Aya Timoteo, k'u'nxa aju ma tzaj oqxenan teya tu'n Dios. Pa'nmil tib'a ti'j kyyol qe xjal mya nimal Dios, ex mi'n txi tb'i'na aju kyyol noqx gan. Pa'nmil tib'a ti'j kyxnaq'tzb'il qeju in kyma'n qa at kyojtzqib'l pero mya ax tok kyu'n.

21Porke at junjun o che ok lpe' ti'j ju ojtzqib'l lu mya ax tok, kyja'tzun ma che el txalpuj ti'j kyokslab'l.

Tenwt t-xtalb'il Dios tuk'ila. Ikxwitju.