Job 38 - Mam Huehuetenango New Ortography

Ok Job tuj xjel tu'n Dios

1Tzajtzun yolin Dios tuj kyq'iq' jb'al ex tma:

2¿Alkyetzuna tu'nju in tma'na qa mya tuj tumel aju in kub' nximane ex aju in b'ant wu'ne? Ma tmaya qe yol minti' kynab'l.

3B'incham ttena qa ax tok tu'na, ex tzaq'wentza qe nxjele lu:

4¿Jatum ta'toqa tej tkub' nq'o'ne t-simyentil tx'otx'? Q'mantza weye qa b'a'n tu'na.

5¿B'a'npe tu'na alkye kub' ximante nik'pun tu'n tok, ex alkyeju aq'nal at nim tnab'l b'inchante te?

6¿Titzun tkub' tjaq' tq'uqb'il ex alkyetzun kub' q'onte nintz ab'j te tzuyb'il te,

7tej in che b'itzantoq kykyaqil qe che'w t-xe kya'j junx kyuk'il kykyaqil qe anjel in che tzalaj tuj kya'j?

8Tej tjatz tilj mar tuj tx'otx', ¿alkye ok q'onte tlamel tu'n twe'?

9Xi nq'o'ne muj te txayb'il te mar ex q'eq muj tu'n tb'aj b'oq'it tuj.

10Kub' nq'o'ne jun techal jatum tu'n twe' mar ex b'i'x ok nq'o'ne tal tlamel.

11Ex xi nma'ne te: Atzun tzul we'ya tzalu ex o'kxtzun tzul we'ya, mlay tzik'a tib'aj ex atzun kpol b'aj pulin tipumala.

12¿Tuj tanq'ib'la ope txi tma'na jun maj tu'n ttzaj spik'e' t-xe kya'j ex tu'n tjawil q'ij,

13tu'ntzun tpon b'aj spik'un tuj tkyaqil twitz tx'otx' ex tu'ntzun tb'aj tchto'na qe b'inchal mya b'a'n?

14Q'ancha'lintzun tilb'ilal twitz tx'otx' ik tza'n ok nno'k tk'a' jun xb'alun.

15In kub' t-xk'ayin Dios spik'un kye qe b'inchal mya b'a'n ex atzun in pon b'aj twi'ylal tu'n kyb'inchante mya b'a'n.

16¿Ope txi aja ke'yilte max t-xe' nintz mar jatum in jatz jlet twi a'?

17¿Ope tzaj yek'un teya aju tlamel kynajb'il kyimni qloljxix wen?

18¿B'a'npe tu'na nik'pun twitz tx'otx'? Q'mantza weye qa ax tok b'a'n tkyaqil jlu tu'na.

19¿Jatum k'u'n spik'un ex qlolj?

20¿Tzinpe in b'ant tu'na tu'n kyxi t-sama'na max t-xe kya'j ex tu'n kyajtz meltz'aj tu'n kyul tuj kyja?

21B'a'nlo tu'na ex baqa ne'xi tab'q'iyila; otoqlo itz'ja tej kyb'ant jlu.

22¿Ope txi aja ke'yilte jatum k'u'n ttxa che'w wu'ne ex saqb'aqun,

23tu'ntzun kytzaj nsama'ne tuj tq'ijlalil yajb'il ex tq'ijlalil ok tok q'oj?

24¿Alkye b'e in xi ti'n tqan q'ankyoq ok tkub' qoptz'aj? ¿Alkye tumlal in b'aj t-sipan tib' kyq'iq' twitz tx'otx', aju in tzaj tuj tjawitz q'ij?

25¿Alkye in jaqonte tb'e jb'al tu'n ttzaj nim? ¿Alkye in yek'unte tb'e tqan q'ankyoq ex kyq'iq' jb'al,

26tu'ntzun ttzaj jb'al tuj tzqij tx'otx' jatum minti' xjal najl tuj,

27ex tu'n ta'lin ti'j tzqij tx'otx', tu'ntzun ttzaj tpoq'sa'n cha'x k'ul?

28¿Atpe tman jb'al ex atpe tman tq'ab' che'w?

29¿Alkye ttxu' tq'ab' che'w ex alkye ttxu' nintz yelo?

30¿Al u'n nno'k a' kyuw wen ik tza'n ab'j, ex nno'k tib'aj nintz mar kyuw wen tu'n?

31¿Jakupe b'ant tu'na tu'n kyok tk'alo'na jun k'loj che'w Pléyades kyb'i tu'n kyten junx? ¿Jakupe b'ant tu'na tu'n kyel tpju'na juntl k'loj che'w, Orión kyb'i, tu'n tel kypa'n kyib'?

32¿Apeya nne'tz q'inte ju che'w jaqol t-xe kya'j ok tpon or tu'n tjawil? ¿Apeya ẍaqlul kye jun k'loj che'w Osa Mayor kyb'i ex juntl k'loj Osa Menor kyb'i?

33¿Tzqi'npe tu'na aju ley tkub' kyib'aj qe che'w twitz kya'j? ¿Apeya in q'onte ju ley lu twitz tx'otx'?

34¿Jakupe txi tma'na te muj tu'n ttzaj nim jb'al tib'aja tu'n?

35Qa ma txi tma'na te tqan q'ankyoq tu'n t-xi' tuj juntl part, ¿jakupe tzaj ttzaq'we'n teya kyja': Lu qine lu, alkye taja tu'n tb'ant wu'ne, chipe?

36¿Alkye xi q'onte nab'l tuj tanmi xjal? Alkye xi q'onte tojtzqib'l?

37¿Alkye jun at nimxix tnab'l tu'n tel tnik' ti'j nik'pun muj at? ¿Alkye jun jaku tz'etz q'inte jb'al tuj muj tu'ntzun ttzaj tq'o'n jb'al,

38tu'n tok tquqil tx'otx' te xoq'l ex tu'n kyok q'e't qe q'ub'in jun ti'j juntl?

39¿Apeya in tzaj jyonte kykanb' qe ttxu b'alun tu'n kychyo'n qe tal ti'j okxi kynoj,

40ok in xi kyewan kyib' tuj kyjul ex ok in che kub' ten xq'uqil tjaq' chk'ul?

41¿Alkye in q'onte kywa joj ok in che jyon qe kyal ti'j kywa ex in che q'ajt wen ok in che qanin kywa weye?