1Qman Dios, b'a'n tu'n t-xi qq'o'ne chjonte teya tuj tnam Sión ex tu'n tjapun qu'ne aju o txi qtziyane teya,
2porke in tb'i'na aju qna'j Diose.
Kykyaqil xjal in che ul tuk'ila.
3In kub' qi'je tu'nju qb'inchb'ene mya b'a'n, ex in kub' tnajsa'na qile.
4At nim tzalajb'il teju xjal in jaw t-sk'o'na ex in pon ti'na tuk'ila tu'n tten niqayin ttxlaja, ex tu'n tten tuj tjaya. Qo tzalajele tu'n tkyaqilju b'a'n at tuj tjaya, aju tjaya xjan.
5Qman Dios aju klol qeye, in qo tzaj ttzaq'we'na tu'nju tb'inchb'ena ma'xix t-xilen ex tz'aqlxix; kykyaqil xjal twitz tx'otx' in qe' kyk'u'j ti'ja, ax ikx qeju najl jlajxi mar.
6Tu'n tipumala tzyu'n qe nmaq witz tu'n mi kyyukch.
7Tu'na in q'ajen tq'ajq'ajel mar ok ttzaj pulin, ex tu'na in che mayet qe xjal ok kyjaw tilj ti'j jun yol;
8ax ikx qe xjal najl tuj tx'otx' najchaq in tzaj tchi kyi'j tu'nju tb'inchb'ena ma'xix t-xilen; in che sch'in xjal tu'n tzalajb'il ti'ja tuj jun pak' ttxa'n tx'otx' ax ikx tuj juntl pak'.
9Kwentin ju tx'otx' tu'na, ex in tzaj tq'o'na jb'al tib'aj tu'ntzun mejor ttzaj ch'iy awal tuj; tu'na in che ch'iy qe tq'ab' xaq tu'ntzun tch'iy twitz awal. Kyja'tzun tten in b'aj tb'incha'na ju tx'otx'.
10Tu'na in b'aj ta'lina aju tx'otx' ch'okimaj, ex tu'na in noj kyxol qe surc tu'n a'; tu'n jb'al in tzaj tq'o'na in q'uynix tx'otx' ex in kub' tky'iwla'na tu'ntzun ttzaj tq'o'n twitz awal.
11In tzaj tq'o'na t-xtalb'ila tuj enter ab'q'i, ex noq jatum in b'eta, atzun in chmet nim twitz awal.
12Ma ch'iy nim cha'x k'ul tuj tzqij tx'otx' ex puro mejor in che kyaj qe witz, mer ik tza'n otoq tz'ok jun kyxb'alun ak'aj.
13In noj tuj chq'ajlaj kyu'n alumaj, qe tx'otx' ttzi a' nojni twitz tu'n triw; kykyaqil in che b'itzan ex in che sch'in tu'n tzalajb'il.
Who We AreWhat We EelieveWhat We Do
2025 by iamachristian.org,Inc All rights reserved.
