Proverbios 14 - Mam Huehuetenango New Ortography

1Aju xu'j at tnab'l in jaw tb'incha'n tja; atzunju xu'j minti' tnab'l tu'nx in kub' t-xitun tja.

2Qe xjal in che b'et tuj tumel in che niman te Qman; atzun qeju mya tuj tumel in che b'et, ik'un Qman kyu'n.

3Tuj ttzi xjal minti' tnab'l yol nne'tz te tnimb'il tib'; atzunju xjal at tnab'l at kolb'ilte tuj tyol.

4Qa minti' boys tu'n kych'okin twitz tx'otx', ax ikx minti' twitz awal tuj tx'utx'; tu'n kyipun boys in jaw nim twitz awal.

5Aju testiw axix tok tyol minti' in nik'an yol; atzunju testiw mya ax tok tyol nimxix in nik'an yol.

6Aju xjal b'a'n xmayin in jyon ti'j nab'l ex minti' in knet tu'n; atzunju xjal at tojtzqib'l jurat nne'l tnik' ti'j.

7Pa'n el tib'a ti'j ju xjal minti' tnab'l, ex mlay tk'ama jun yol te ojtzqib'l tu'n.

8Aju xjal at tnab'l, tu'nju ojtzqib'l nne'l tnik' ti'j alkye tu'n tb'ant tu'n, atzunju xjal minti' tnab'l, in kub' t-sb'un tib' tu'nx t-ximb'etz mya b'a'n.

9Qe xjal minti' kynab'l minti' in che xob' tu'n kyb'inchante mya b'a'n, atzun qe xjal in che b'et tuj tumelxix in che tzalaj kyuk'il txqantl.

10B'a'n tu'n tanmi xjal alkye ta'w tok ti'j, ex mi a'l juntl xjal jaku tz'el tnik' ti'j ttzalajb'il.

11Aju kyja xjal b'inchal mya b'a'n kb'ajel xitj; atzun qeju ate' tuj kyja qe xjal tz'aqlxix kukx che tel tuj tzalajb'il.

12At b'e jiqun ti'j tuj twitz xjal, ex aju b'ajsb'ilte in pon tuj kamik.

13At xjal in che tze'n ex tuj kyanmi at ta'w, ex oktzun tb'aj tzalajb'il in tzaj b'is.

14Aju xjal nne'l tpa'n tib' ti'j Dios, ax qe tb'inchb'en tzul q'inte b'is ti'j, atzunju xjal b'a'n, ax qe tb'inchb'en tzul q'inte tzalajb'il te.

15Aju xjal minti' tnab'l in xi tniman tkyaqil aju in tzaj q'ma'n te; atzunju xjal at tnab'l tok tkwent ti'j jatum in b'et.

16Aju xjal at tnab'l in xob' ti'j ju mya b'a'n ex nne'l tpa'n tib' ti'j, atzunju xjal minti' tnab'l jurat in jaw kyaqpaj ex tuj twitz qa b'a'n ta'.

17Aju xjal jurat in jaw q'ojl in b'ant jun ti'xti tu'n mya tuj ttxolil; atzunju xjal jawni twitz tu'n t-sb'u'n k'elel ik'un.

18Qe xjal minti' kynab'l in che ok te tajwil ju minti' tajb'en; atzun qe xjal at kynab'l nojni kywi' tu'n ojtzqib'l.

19Qe xjal mya b'a'n che b'el mok'e' kywitz qe xjal b'a'n kymod; ex qe xjal b'inchal mya b'a'n che kub'sal ttzi kyja qe xjal tz'aqlxix.

20Aju xjal meb'a nne'l ik'un kyu'nx qe tamiw; atzunju xjal q'inun nim tamiw at.

21Aju xjal nne'l ik'unte tuk'il, in b'inchan il tu'n jlu, atzunju xjal in tzaj tz'e'y tk'u'j kyi'j qe xjal meb'a, at tzalajb'il te.

22Qe xjal in che ximan tu'n kyb'inchante mya b'a'n, in che el tzpet ti'j b'e; atzun qeju in che ximan tu'n kyb'inchante b'a'n, ktel kyk'ujlalil xjal kyi'j ex kjapunel yol tziyimaj kye.

23Aju xjal in aq'nan, at tkamb'ab'l ti'j jlu, atzunju xjal noq la'jb'il nno'k tilil tu'n, noq meb'ayil in tzaj ti'j.

24Aju tq'inumab'l ju xjal at tnab'l ik tten ik tza'n jun coron tjax tuj twi'; atzun qeju minti' kynab'l, o'kx in kyb'incha'n aju mya tuj ttxolil.

25Aju testiw axix tok tyol in che klet xjal tu'n; atzunju testiw mya ax tok tyol, in nik'an yol.

26Qa in qo xob' twitz Qman Dios ex qa in qo niman te, tu'n jlu in qe'xix qk'u'j, ex tu'nx jlu che tel qe qk'wa'l tuj segur.

27Aju tu'n qniman te Qman Dios, chwinqlal in tzaj tq'o'n, ex in qo klet tu'n tu'n mi'n qtzyet tu'n kamik.

28Qa in kawin rey kyib'aj nimku xjal, a jlu jun nimb'il te, ex qa in kawin kyib'aj nik'xi xjal, a jlu jun xitb'il te.

29Aju xjal mya jurat in tzaj tq'oj, at nim tnab'l, atzunju xjal jurat in tzaj tq'oj, minti' tnab'l.

30Qa q'uql tk'u'j jun xjal, chwinqlal jlu te t-ximlal, atzunju xjal kye lo'ch tk'u'j, in che b'aj q'ay qe tb'aqil.

31Aju xjal in b'aj yajlante kye xjal meb'a, ik'un Dios tu'n, aju B'inchalte kye, atzunju xjal at tq'aq'b'il tk'u'j kyi'j qe xjal meb'a, in niman te Dios.

32Aju xjal b'inchal mya b'a'n in naj tu'nxju mya b'a'n in b'ant tu'n; atzunju xjal tz'aqlxix at kolb'il te ok tkyim.

33Atzun ta' nab'l tuj tanmi xjal at tojtzqib'l, atzun qe xjal minti' kynab'l minti'x nne'l kynik' ti'j.

34Qa tz'aqlxix qe xjal tuj jun nasyon, tu'n jlu kjawil nimsa'n, qatzun mya b'a'n kyb'inchb'en xjal tuj jun nasyon, noq ch'ixb'il in tzaj tu'n.

35In tzalaj rey kyi'j qe xjal sek' kynab'l, aqeju in che ajb'en te, ex in tzaj tq'oj kyi'j qeju mya sek' kynab'l.