1Te tib'ajxi jlu xi tma'n rey David kye tkyaqil tnam xjal: Aju nky'ajale Salomón, o'kxku a ma jaw t-sk'o'n Dios, ma ku'xunx ta' ex na'nx tok tnab'l, ex aju aq'untl lu matijxix, porke aju ja kb'antel mya tja jun xjal, sino atzunju tja Dios aju Qman.
2Tu'n tkyaqil wipune ma b'aj nchmo'ne aju k'ajb'el ti'j tja Qman Dios, ex atzun qe jlu: Q'an pwaq, saq pwaq, q'an k'uxb'il, k'uxb'il ex qe tze'. Ax ikx o b'aj nchmo'ne tal ab'j tb'anilxix cornalina tb'i, ex qe tal ab'j tu'n kyokx lo'tzit ti'j jun ti'xti, ex qe tal ab'j in che qoptz'aj, ex kykyaqil tal ab'j ela' txkajin che ke'yin, ex nimku tajlal ab'j alabastro tb'i.
3Ex te tib'ajxi tkyaqilju ma b'aj nchmo'ne tu'n tajb'en ti'j tja Dios, ex tu'nju at nk'ujlalile ti'j tja Qman Dios, kxel nq'o'ne aju wexe nq'inumab'le tu'n tajb'en ti'j tja Dios, kxel nq'o'ne q'an pwaq ex saq pwaq;
4kab' mil tuk'il kab' syent quintal q'an pwaq aju mas tb'anil, ex jwe' mil tuk'il kab' syent quintal saq pwaq mas tb'anilxix tu'n tok lo'tzit kywitz qe tkajonil ja te tujxi,
5aju q'an pwaq tu'n kyb'ant qe makb'il q'an pwaq kytx'otx'il, ex aju saq pwaq tu'n kyb'ant qe makb'il saq pwaq kytx'otx'il ex tu'n kyajb'en ti'j tkyaqil aq'untl kb'antel kyu'n qeju at kynab'l ti'j aq'untl. Ex atzun ja'lo, ¿alkye tajb'il tu'n tonin tu'n tex tgan tu'n t-xi tq'o'n jun toyaj te Qman?
6Kyja'tzun, aqeju nejenel kye junjun k'loj at kyxilen kyxolx, kyuk'ix qe nejenel kye kab'laj k'loj kyiyjil aj Israel, qe nejenel kye soldad aqeju at jun milchaq soldad tuj kykwent, ex qeju at jun syentchaq soldad tuj kykwent, ex qe mayordom kwentil taq'un rey, xi kyq'o'n kyoyaj tu'n kyex kygan;
7xi kyq'o'n ox mil tuk'il wajxaq syent quintal q'an pwaq tu'n tajb'en ti'j tja Qman, ex laj mil pwaq q'an pwaq, ex wuq mil tuk'il jwe' syent quintal saq pwaq, ex oxlaj mil tuk'il jwe' syent quintal q'an k'uxb'il, ex 75 mil quintal k'uxb'il.
8Ax ikx qeju at qe tal ab'j tb'anilxix kyuk'il, xi kyq'o'n tuj k'ub'l q'inumab'l ti'j tja Qman aju tkyajsa'n tuj tkwent Jehiel, aju tiyjil Gersón.
9E jaw tzalaj tnam xjal ti'j ju otoq tz'ok kychmo'n, tu'nju otoq txi kyq'o'n tkyaqil jlu te Qman tu'n tkyaqil kyanmi ex tu'n kyex kygan. Ax ikx te rey David nimxix o tzalaj wen.
10Jawtzun tnimsa'n David tb'i Qman kywitz kykyaqil tnam xjal ex tma kyja':
Nimanxwit tb'iya te jumajx, aya Dios aju Tdios qtzan qxe'chele Israel.
11Nman, nimxix toklena, nim tipumala, nim tajwalila, teya ju kawb'il ex aya rey. Ex tkyaqilju at twitz kya'j ex twitz tx'otx' teya tkyaqil, ex aya in kawin tib'aj tkyaqil, ex mas ma' toklena kywitz kykyaqil.
12Ex tuk'ila in tzaj q'inumab'l ex nimb'il. Aya in kawin tib'aj tkyaqil. Tuk'ila in tzaj ipumalj, ex tu'na in tzaj tq'o'na kyoklen ex kyipumal xjal.
13Kyja'tzun Qman Dios, in xi qq'o'ne chjonte teya ja'lo ex in jaw qnimsa'ne tb'iya ma' toklen.
14Aqine ex qe xjal ate' tjaq' nkawb'ile minti' qoklene tu'n t-xi qq'o'ne qe oyaj lu teya. Ax tok tuk'ila in tzaj tkyaqil, ex tkyaqilju ma txi qq'o'ne teya tuk'ila in tzaj.
15Porke tuj twitza ik qtene ik tza'n stranjer xjal ex b'etin xjal, ik tza'n o b'aj kyi'j kykyaqil qtzan qxe'chele, ex aju qchwinqlale twitz tx'otx' ik tten ik tza'n jun xlekun mya nim tuj in ten.
16Aya Qman Dios, tkyaqilju q'inumab'l lu aju ma b'ant tten qu'ne tu'n tjaw b'inchet jun ja jatum tu'n ttzaj na't ju tb'iya xjan tuj, teya tkyaqil ex tu'na ma tzaj tq'o'na.
17Aya Nman Dios, b'a'n wu'ne in b'aj tke'yina aju at tuj kyanmi xjal, ex in jaw tzalaja kyi'j qeju tuj tumel in che b'et twitza. Kyja'tzun tu'n tkyaqil wanmiye ma txi nq'o'ne tkyaqil jlu teya. Ex atzun ja'lo ma wile aju tnam etzan tu'na, aqeju kychmon kyib' tzalu, tuk'il tzalajb'il ma txi kyq'o'n kyoyaj teya tu'n tkyaqil kyanmi.
18Nman, aya Tdios Abraham, Isaac ex Israel, aqeju qtzan qxe'chele, yolina tuj kyanmi tnam xjal etzan tu'na tu'n kukx tu'n tten kygan ti'ja ex kukx tu'n kyniman teya.
19Ax ikx onintza nky'ajale Salomón tu'n tten tanmi tuj tumelxix, tu'n kyjapun qe tmandamyenta tu'n, kyuk'ix qe tkawb'ila ex qe t-xnaq'tzb'ila, ex tu'n tjaw tb'incha'n tjaya, aju ma b'aj nchmo'ne tkyaqilju k'ajb'el ti'j tu'n tb'ant.
20Ax ikx xi tma'n David kye tnam xjal: Kynimsa'nktze tb'i Qman aju Kydiose. Ex kykyaqiltzun tnam xjal jaw kynimsa'n tb'i Qman aju Kydios qtzan kyxe'chel, e kub' ẍmeje' ex kub' mok'e kywi' twitz Qman ex twitz rey.
21Tuj juntl q'ij xi kyq'o'n chojb'il te Qman ex qe oyaj patun in che kub'. Xi kyq'o'n jun mil tal tor, jun mil tman ẍne'l, jun mil tal tman ẍne'l, tuk'ix ta'l twitz uva in xi q'ot te tmoj oyaj ex nimxix chojb'il xi kyq'o'n kykyaqil aj Israel.
22Tuj q'ij lu e wa'n ex e k'an tuk'il nim tzalajb'il twitz Qman. Te tib'ajxi ok kyq'o'n toklen Salomón aju tky'ajal David te rey, tkab'inmaji'n twitz Qman; jax kyqo'n aseyt tuj twi' tu'n tok te kawil, ax ikxte Sadoc, jax kyqo'n aseyt tuj twi' tu'n tok toklen te pal.
23Kyja'tzun tten ok Salomón te rey, ex kub'tzun qe' tuj tq'uqb'il Qman te t-xel David aju tman, ex b'a'n ela tkyaqil te. Ex kykyaqil aj Israel e niman te.
24Ex kykyaqil qe nejenel kye tnam xjal ex qe nejenel kye soldad, ex kykyaqil qe tk'wa'l rey David, b'a'n ela tuj kywitz tu'n tok Salomón te rey.
25Ex jaw nimsa'n Salomón tu'n Qman kywitz kykyaqil xjal aj Israel, ex xi tq'o'n nim tajwalil tej tkawin. Qe rey kye aj Israel e ten nej twitz, minti' jun o pon tajwalil ik tza'n te.
Tej tkyim David 1 Reyes 2.10-1226Ate David aju tky'ajal Isaí o kawin kyib'aj kykyaqil aj Israel.
27O kawin 40 ab'q'i kyib'aj aj Israel; wuq ab'q'i o kawin tuj Hebrón ex 33 ab'q'i tuj Jerusalén.
28Tuj txub'txaj o kyim David tej otoq tijin wen. Nim ab'q'i o ten twitz tx'otx'; attoq nimxix tq'inumab'l ex otoq tk'am nimxix nimb'il te. Ex aju kyaj ten kawil te t-xel, atzun Salomón aju tky'ajal.
29-30Aju tx'olb'ab'en ti'j tb'inchb'en rey David, atxix tej ttzaj qe' ex tejxi tpon b'aj, tuk'ix tkyaqilju o tb'incha tuj tkawb'il ex tkyaqil tipumal, ax ikx ti'j tkyaqilju o b'aj ti'j ex kyi'j aj Israel ex kyi'j qe txqantl nasyon, atzun tz'ib'an kyuj qe u'j e kyaj tz'ib'an tu'n Samuel ex Natán aqeju t-sanjel Dios, ex kyuj qe u'j e kyaj tz'ib'an tu'n Gad aju b'a'n nab'in tu'n Dios.
Who We AreWhat We EelieveWhat We Do
2025 by iamachristian.org,Inc All rights reserved.
